5-тӥ созыв дыръя депутатъёс 451 закон кутӥзы

Удмурт Дунне
By Удмурт Дунне 27 июня, 2017 11:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кун Кенешлэн Тӧроез Владимир Невоструев 5-тӥ созывлэн ужамезлы йылпумъянъёс лэсьтӥз, журналистъёслэн юанъёссылы валэктон сётӥз.

В. Невоструев йылпумъянъёс лэсьтӥз Кун Кенешлэн 5-тӥ ӧтчамезлэн ужамезлы.

Мар лэсьтэмын

Берло 5 ар ӵоже  Кун Кенешлэн 38 сессиез ортчиз. Депутатъёс 451 закон кутӥзы, та пӧлысь 109-эз — шаерысьтымы калыклэсь улон-вылонзэ радъянын тужгес кулэ луисьёсыз. Огез герӟаськемын врачъёсты но фельдшеръёсты гуртъёсы кельтонэн. Ёросъёсысь больницаосы ужаны интыяськем 35 аресозь врачъёслы табере 500 сюрс манет сётӥське. Фельдшеръёслы висъяськись субсидилэн быдӟалаез — 300 сюрс манет. Гуртысь школаосы лыктэм дышетӥсьёслы субсидия висъяськыны кутскиз: нырысетӥ араз 40 сюрс манет, кыкетӥяз 60, нош куинетӥяз 80 сюрс манет  тыриське. Владимир Невоструев пусъемъя, 250 мурт юрттэт басьтӥз ни.

Ӧз вунэтэ арлыдоосты но. Быдӟым ож вакытэ уноез нылпиос курадӟыса будӥзы, пичиысен ужазы. Тросэзлэн льготаоссы ӧвӧл, пенсизы но пичи. Кутэм законъя 1946-тӥ арын 1-тӥ январёзь вордӥськем муртъёслы толэзьлы быдэ пенсизы вӧзы ватсаськыса тыриське 300 манет, нош 1937-тӥ арын 1-тӥ январёзь вордӥськемъёслы — 500 манет.

Таяз созывысь депутатъёслы бадӟымгес луонлык сётӥськиз округъёсазы ужаны. Кылсярысь, котькуд депутатлы висъяськиз 1 миллион манет. Депутатъёс та уксёез кутыны быгатӥзы школаосты, садъёсты, спортобъектъёсты юнматонлы, нылпи площадкаос лэсьтыны. Владимир Невоструев верамъя, Быдӟым ожлы сӥзем уноез синпелетъёс но таин валче выльдӥськизы. Оглом ог 350 объект тупатэмын.

Бадӟым саклык висъяськиз таза улонлы. Курытэныз шаерамы ӧжытгес вуз мед карозы шуыса, законэ воштонъёс пыртэмын. Куашкатэмын уноез ларёкъёс но киоскъёс. Кудӟытӥсьсэ вузаны алэмын 25-тӥ мае, 1-тӥ июне, 1-тӥ сентябре, 11-тӥ сентябре — Россиын сазь улонлы сӥзем нуналэ. Владимир Невоструев верамъя, берло 5 ар ӵоже 33 процентлы кулэсмиз курытэныз вуз карон. Уж азьланьтӥськоз. Чакламын трос этажъем коркаосысь 1-тӥ этажъёсын аракыен вуз каронэз алыны. Зэм, талы туннэ магазинъёс пумитъясько на, уноез доходзы уго аракылэсь лыктэ.

Воштонъёс пыртэмын ёросъёслэн ужазы но. Азьвыл районын 2 мурт кузёяськылӥз: ёрослэн йырыз но ёрос администрацилэн кивалтӥсез. Табере валтӥсез луиз ёрос йыр. Со сяна, азьвыл ёрос йырез райсоветэ депутатэ потэмъёс пӧлысь быръё вал ке, табере сое конкурсъя но бырйыны луоз.

Кун Кенешлэн нуналъёсыз ортчылыны кутскизы ёросын но городъёсын. Та  муниципал кылдытэтъёсын матэгес тодматскыны, отысь депутатъёсын валче ужаны юрттӥз. Кун Кенеш кусып возе Кун Думаысь депутатъёсын но. Табере кыӵе ке законэ воштонъёс пыртон пумысен меӵак соослы вазиськыны луэ, нимысьтыз кичӧлтонэн Кун Думае потытэк.

Кун Кенешын удмурт кыллы но тросгес дыр висъяськыны кутскиз: ортчылӥзы удмурт кылъя курсъёс. Инты сюриз спортлы но. Озьы Кун Кенешлэн кубокез понна валэн ӵошатсконъёс радъяськыны кутскизы. Туэ Кун Кенешлэн хоккеен шудонъя аслаз командаез кылдӥз, Чувашиысь Кун Кенешлэн но «Белкамнефть» огазеяськонлэн командаосынызы нюръяськизы ни.

Мар возьма

Кун Кенеше быръёнъёс ортчозы 10-тӥ сентябре. Вуоно 6-тӥ созыве 60 депутат гинэ быръёмы. Кылем созывын соос 90 вал. Таин валче кулэсмемын быръёнъёсъя округъёс но. Но Владимир Невоструев верамъя, калыклэн улэм-вылэмез вылын та воксё но уз шӧдӥськы. Кылсярысь, 2018-тӥ арын депутатъёслы округъёсазы ужаны озьы ик висъяськоз 90 миллион манет. Зэм, Кун Кенешысь ялан ужась комиссиослэн лыдзы ичияны быгатоз. Ог 15-20 процентлы кулэсмыны быгатоз Кун Кенешлэн аппаратэз но.

Туннэ Кун Кенешлэн ужаз 4 партия пыриське. Быръёнъёс пыр потыны партиос ичизэ 5 процент куара люканы кулэ, азьвыл та лыдпус 7 процент вал.  Озьы партиослэн лыдзы, оло, йылоз. Но Владимир Невоструев верамъя, макем тросгес партиос ужалозы, сокем тросгес малпанъёс луозы, со юрттоз шонер решение кутыны.

5-тӥ созывысь депутатъёс 10 законэз кутыса ӧз вуттэ. Соосты учкозы ни выль быръем депутатъёс. Кылсярысь, огезъя гуртын личной подсобной хозяйство возьыны малпасьёслы дунтэк музъем висъяны чакламын.

Оскисько, 6-тӥ созыв ас азяз пуктэм ужпумъёсты быдэстоз, шуиз В. Невоструев.

Елена Сараматова

 

Удмурт Дунне
By Удмурт Дунне 27 июня, 2017 11:00 Updated