Секыт пиналъёсты визьман понна шаерамы ужа «Нодъян» проект

Удмурт Дунне
By Удмурт Дунне 14 июня, 2017 12:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Югдурез утёнъя министерствое учётэ басьтэмын 1 сюрс 800-лэсь уно пинал. Таосты визьман вылысь шаерамы вордскиз «Нодъян» («Наставничество») проект. Сое усьтонэ пыриськиз Россилэн Президентэз бордын ужась Нылпилэсь правооссэ утёнъя уполномоченной Анна Кузнецова.

Секыт пиналъёслэн кылдо визьнодасьёссы.

Учётын сылӥсь нылпиос пӧлын 49-эз будо анайёсынызы яке бубыосынызы гинэ. Таослы тужгес бадӟым саклык висъяны кулэ, угось соос юзырес учыръёсы ӵемгес сюро, шуэ Удмуртиысь Нылпилэсь правооссэ утёнъя оскем мурт Ольга Авдеева. Огпол йыруж лэсьтэм пинал кырыж сюрес вылэ султэ. Кылсярысь, миым ик 291 сыӵе учыр пусъемын. Секыт пиналъёсты нодъян, соослэсь тазалыксэс юнматон вылысь Ижын ужа МВД-лэн быдэ вуымтэ нылпиосты огдыре возёнъя центрез. Татын шорлыдын 11 пинал реабилитация ортче. Уноез соос пӧлысь ёросъёсысь. Толэзь ӵоже котькудӥныз ужало специалистъёс, мылкыдзэс ӝутыны выро, визьнодало. Соин но «Нодъян» проектэз нырысь ик татын мертано кариськизы.

Шаерамы 140 секыт сямо нылпиос борды  юнматэмын калык пӧлысь 140 воспитатель. Но та тырмыт ӧвӧл на. Соин ик кылдӥз «Нодъян» проект. Пинал умой пала мед воштӥськоз шуыса, со вӧзын гажамон адями луыны кулэ, шуэ югдурез утёнъя министр Александр Первухин. Та капчи уж ӧвӧл, уката ик аслад семьяед, ужед вань дыръя. Мурт пиналэз воштыны тыршон, солы шуг-секытъёсаз юрттон понна бадӟым мылкыд луыны кулэ. Туннэ центрысь 3 пиналлы нодъясь сюриз ни: Удмуртилэн Тӧроезлэсь ужзэ быдэсъясь Александр Бречалов, полициысь полковник, «Гром» отрядлэн командирез Денис Зарецкий но юрист, педагогика наукаосъя кандидат Эдуард Сабиров. Соос пиналъёсынызы, соослэн анай-атайёсынызы тодматскемын ни. Александр Бречалов верамъя, пиналъёс юрттэмез возьмаса гинэ медаз улэ,  маке понна кыл кутыны но мед быгатозы.

— Ас шаерзэ гажась патриотэз будэтэме потэ, — шуэ Денис Зарецкий. — Соин ик кенешим: кутэм пиналы январь толэзьлы ГТО-лэсь нормаоссэ сётоз. Азьланяз эшшо кыӵе ке этапъёсты дэмен ортчомы.

Денис кадь наставникъёсын артэ будыса, нылпиос, оло, асьсэос будэмзы бере секыт сямо пиналъёслы пыкъет луозы на. Азьланяз проектэз паськытатыны чакламын. Кылсярысь, Пермьын нылпиосты уж пыр нодъяло. Кинэ ке корка пуктыны дышето, кинэ ке ужбергатонэн тодмато. Отын ужа фермеръёслэн школазы. Туннэ шаерамы «Нодъян» калыклэн мылкыдыз вылын возиськоз, Александр Бречалов но Ольга Авдеева чаклам улсын ужалоз. Проектэ 22-сен 60 аресозь мыло-кыдо адямиосты куто. Ольга Авдеева верамъя, куриськисьёс вань ни.

Зэм, учётэ басьтэм пиналъёс сяна, шаерамы арлы быдэ 1 сюрс пинал сюре йыртэмасьёс ки улэ. Удмуртиысь Следствиея управлениен кивалтӥсь Владимир Никешкин верамъя, сыӵе пиналъёс куштэмын.

— Одӥг нылаш допрос дыръя гожтэ: монэ, пуные сяна, нокин уг яраты. Эшшо ке сюратаез сантэмаса возе вылэм. Сыӵе нылпиослы улонын юрттӥсь кулэ. Соос уго ӵемысь асьсэды асьсэос быдто, — шуэ Владимир Никешкин.

Та ужпум борды но басьтӥськыны оскытӥз Александр Бречалов. Нылпиосын ужанъя специалистъёсты дасян, кун ласянь юрттэт сётон сярысь малпаськомы, шуиз.

Уката ик та нуналъёсы Президент Владимир Путин 2018-тӥ-2028-тӥ аръёсы нылпиосын ӟеч-ӟеч ужан понна «Десятилетие детства» указ юнматӥз.

— Указ кутэм бере «Нодъян» — Россиын нырысетӥез мытэм проект, — шуиз Анна Кузнецова. — Оскисько: проект котыраз калыкез но кивалтӥсьёсты огазеялоз. Туж потэ, мукет улосвылъёслы но со адӟем карымон мед луоз. Марлэсь туннэ нылпиосты утёно шуыса юало ке, верасько: югдур шоры чиньы пыртӥ кӧс учконлэсь.

Елена Сараматова

 

 

Удмурт Дунне
By Удмурт Дунне 14 июня, 2017 12:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<