Журналист Елена Сараматова ЕГЭ гожтӥз

Удмурт Дунне
By Удмурт Дунне 11 мая, 2017 14:47

Йылпумъяськиз ЕГЭ сётонлэн нырысетӥ люкетэз. Россиын со пыр потӥз 26,5 сюрс адями, Удмуртиын 600-лэсь уно люкаськизы.

Сюлмаськон

Таӵе луонлык сётӥськиз школаез азьвыл йылпумъямъёслы, экзаменысь результатъёссэс умоятыны малпасьёслы. Зэм, таяз рад ЕГЭ сётӥсьёс пӧлы уногес сюризы школаез миым быдтэмъёс. Мынам аттестат басьтэме дырысен 13 ар ортчемын ни. Котьма ке но асме эскереме потӥз.

Иж город администрациысь дышетонъя управлениысь специалист-эксперт Светлана Михайлова верамъя, ӝыныез сямен экзамен сётӥсьёс — ёросъёсысь егитъёс. Ми ваньмы Иже люкаськимы. Татын 2 школаын ЕГЭ сётонъя пунктъёс усьтэмын. Тужгес трос ӟуч кылэз быръемъёс: 230 кузя, математикаез гажасьёс 180 кузя, обществознаниез кулэ карисьёс — 131.

Быгато-а мон, репетиторъёс дортӥ ветлытэк, нимысьтыз дасяськытэк, ӟуч кылэз, литератураез но обществознаниез сётыны? Макем со секыт?

27-тӥ мартэ 5 часын ӵукна ик султӥ. Ӟуч кылъя правилоосты ке но учкыса пото шуыса, киям брошюраос кутӥ. Лыдӟытозям йырам вань тодэме но ӝук кадь сураськиз-пожаськиз. Осто, малпасько, малы асме курадӟытӥсько на? Аслам йыры вань, шуи но коркась потӥ.

Буйган

9 час 10 минутэ Ижысь 69 номеро школае вуыкум, коридоре люкаськем егитъёс лачак вал ни. Кин ке эшъёсыныз серекъяса пуке, мукетъёсыз малпаськон дуннее усиллям.

— Курткадэс кыле, сумкадэс кельтэ но кабинетъёсы вамыштом, — вазизы экзаменэз радъясьёс.

Сьӧре кутыны лэзизы ручка но паспорт гинэ.

— Трос дасяськид-а? — юай востэм вамышъясь нылашлэсь.

— Быдэс арзэ киям дырын-дырын книга кутылӥ.Кылем арын вузэ пырыны баллъёсы ӧзгес тырме бере, туэ анай-атаелы кылме сётӥ, одно ик пыро шуыса. Колхозэ кыльыны вазьгес на, шуизы. Фермаямы мӧйыос гинэ ужало. Диплом басьтэме потэ. Кышкасько.

Тодӥсько вал: кабинетын камераос, быдэс экзамен ӵоже соос сак чаклалозы милемыз. Камераез адӟылымтэ мурт ӧвӧл мон, но классэ сюрыса, пытсэтэ вуэм кадь потӥ. Котькудмес оген шахматын сямен пуктӥзы. Котыр уӵертылыны, паспортэн шальтыртыны, ог-огмылы ручка сётъяны ӧз лэзе. Сьӧразы ву но шоколад ваемъёсты вань доброзэс коридорысь укно доры кельтытӥзы. Бланкъёс вылэ одӥг шапык ву усиз ке, компьютерлэн сое лыдӟемез уз луы ни, шуизы экзаменэз радъясьёс. Шоколад бумагаен но, мукетъёслы люкетыса, шальтыртыса уд пукы ук. Нялтас вераса, 4 час ӵоже куртчыны потасьёс пӧламы ӧз сюре. ЕГЭ сётон интыын медпункт ужа. Воксё шулӟектӥды ке, отын сакырен чай секталозы. Нош мон куалекъяны кутски аудиториысь принтер сӧриськем бере. Котькуд бланкез уго печатлано, собере гинэ люкылоно. Нош милям кабинетысьтымы техника шӧдтэк шорысь тӥяськиз. Кин но ӧз пыра сое тупатыны. Ярано коть, ӝыны час ортчыса, тупатӥзы. Но эскерисьёслэн но техникаез тупатъясьёслэн шугъяськемзы милемлы но паласькиз кадь. Оло, соин но киям заданиосын бланкъёс вуэм бере туж кышкатски, ваньзэ лэсьтыса уг вутты шуыса. Собере аслым шуи: Лена, тырмоз, буйга, вуттод. Синъёсме кыни, дасозь лыдӟи, ганяк шокчи но уж борды басьтӥськи. Астэ кие кутыны быгатон туж юрттэ вылэм. Быдэс часлы азьвылгес вань тодэмме гожъяса быдтӥ.

Удалтон

Экзаменысь потэме бере мылкыды куашказ. Куд-ог юанъёслы валэктонъёсты уго соку ик Интернет пыр учки. Эх, куд-ог янгышъёсме шедьтӥ. Соин но малпай: всё, ӧй быгаты. Кыӵе мон лӧптӥ кык арня ортчыса йылпумъянъёсты адӟеме бере: 68 балл люкаськем, ичизэ 24 балл люкано вал.

Тужгес зол кышкай мон литературалэсь. Школа дырысен уго произведениослэн пуштроссы тодын на ке но, куд-ог геройёслэн нимтулъёссы вунэмын ни, нош соосты тодэмез одно ик эскерозы. Но таяз рад мыным удалтӥз. М. Шолоховлэн «Тихий Дон» роман-эпопеяысьтыз люкетэз сюриз уго. Сое мон ас вакытаз туж яратыса лыдӟи но, учки но вал. Шумпотыса камераос сярысь ик вунэтӥ. Н. Некрасовлэн «Школьник» кылбурез хорей амалэн гожтэмын шуыса, кылбурлы анализ лэсьтыны но быгатӥ кадь. Обществознаниен гинэ ке шат кемагес йырме тӥяй. Туж кескич амалэн гожтэмын уго заданиосыз: одӥг юанэз ик озьы но, тазьы но валаны луэ. Туж тросэз потэ малпаськыны, дунне шоры котыр ласянь учкыны быгатон бордысь.

Туннэ та 2 предметэн баллъёс тодмоесь ӧвӧл на. Соосты 26-тӥ апрель бере шараялозы. Котьма ке но экзаменысь кырӟаса ик кошки. Курадӟон вылымтэ со.

Елена Сараматова

Туспуктӥз А. Горбунов  

Удмурт Дунне
By Удмурт Дунне 11 мая, 2017 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<