Вормонлы но яратонлы — 72 ар

Удмурт Дунне
By Удмурт Дунне Май 5, 2017 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Туэ Быдӟым Вормонлы 72 ар тырме. Сомында ик — Ижын улӥсь Евдокия но Афанасий Мадьяровъёслэн семьязылы но. Вазьгес паръяськысалзы, дыр, Быдӟым ож ке ӧй люкетысал…

Мадьяров кузпалъёс.

Санитарка Колесникова

Войналэсь азьвыл Вавож ёросысь Вуж Воли черкогуртысь егитъёс, быдэс кунысь огъёзъёссы сямен ик, дышетскизы, юртъер котыразы бергазы, шудыны потазы.

Евдокиялэн анаез улэп дыръя Колесниковъёслэн семьязы шудо улӥз. Нылаш школае ветлӥз, уксё поттыны юрттӥськиз. Атаез чорыгалляз, нош Евдокия сое вузалляз. Соку лавкаосын чорыг вылымтэ, соин вуз карыса умой коньдон вуэ вылэм. Атаез трос чорыг вае ке, Евдокия сое пичи уробоен бускель гуртэ нуэ — отын шурзы ӧвӧл, озьыен, чорыг ӝоггес но, дуноенгес но мынэ.

Но 1939-тӥ арын Евдокиялэн анаез улонысь кошкиз. Ӝоген солэн интыяз сюранай кылдӥз. Со ик юрттӥз атайзылы Евдокияез но Николай вынзэ будэтыны.

Быдӟым ож пуромем бере атайзэс трудовой армие басьтӥзы, со тыршиз Ижысь андан ӵыжатон заводын. Солэн киосыз зарни вал, котькыӵе ужез быдэсъяз, быдэс улонзэ плотникын тыршиз, вера Евдокия Матвеевна.

Нош нылаш, 7-тӥ классэз йылпумъяса, Вавожысь судэ уже интыяськиз (быдэ вуымтэосты олокыӵе но ужъёсы нырысь ӧз кыскалэ). Но 1941-тӥ арын ик шӧдӥськиз ини, фронтын ож тӥрлык но, сиён-юон но, дӥськут но уг тырмы шуыса, соин ваньзэсты ужатыны кутскизы.

— Монэ Ижысь 622 номеро (механической) заводэ келязы, — вера Евдокия Матвеевна. — Но отын кема ужаса ӧй вутты, ӝоген Вавож военкомат мобилизовать кариз Увае. Отын фронтэ набор вылэм, но ми отчы ӧм сюре: ог 40 иськемез пыдын мынӥмы. Жадьыса шутэтскыны но дугдылӥмы ай. Увае вуыкумы, эшъёсмес нуиллям ни вылэм (ӧз вералэ кытчы, но ми валатскимы, фронтэ шуыса). Озьы ке но милемыз бертыны ӧз лэзе — огдырлы ӝегатске, пе. Уваысь госпитальын ужаны кутскимы. Мынам 7 класс сяна дышетскеме ӧй вал бере, санитаркае гинэ кутӥзы.

Вавож ёросысь Волиысь войналэсь азьвыл вордскем пиналъёс.

1943-тӥ арын фронтын туж секыт югдур кылдӥз: солдатъёс пӧлын тиф аляз. Вераськизы, тушмон, пе, юри сое вӧлмытӥз, асьме солдатъёс ротаосын-ротаосын стройысь мед потозы шуыса. Быдэс кунысь эмчиосыз мобилизовать каризы Шундыпуксён пала. Ува госпитальысь ужасьёсты но ӧз кельтэ.

— Милемыз 3-тӥ Белорусской фронтэ — Белоруссиысь Гомель улосысь Уваровичи каргуртэ — келязы, — тодаз вае Евдокия Матвеевна. — Висисьёсыз нокытчы тырыны вал — сомында вайылӥзы. Куанеръёс кезьыт пол вылын ик кӧлазы. Мар карод, 3 этажъем юртын одӥг но буш инты ӧй вал бере. Сӧсырмемъёсын санпоездъёс туж ӵем вуылӥзы. Ми соосты станциын пумиталлям, солдатъёсты носилкаосын корпусэ нуллӥмы. Кыдёкын ӧй вал ке но, милемлы, егит нылъёслы, туж секыт потылӥз. Бергес со ужез сётӥзы каньыл ранӟем солдатъёслы. Туж трос тэйӟемъёс вал, соослэсь тэйёссэс быдтыны сюлмаськимы. Мон хирургической кабинетын санитарка вал, отын уен-нуналэн операциос ортчылӥзы. Ми котырын ик ожъёс мынӥзы, бомбить каро вал. Бергес ини, 1944-тӥ арын, шыпытгес кариськиз: асьмелэнъёс тушмонэз улляны кутскизы. Озьы ке но соку но висисьёсты ми доры тросэн-тросэн ваё вал, нош выписывать карылӥзы оген-кыкен, соин интыос бушаса ӧз вуттылэ. Бурмемъёссэ ӵемысь берен ож лудэ ысъязы, туж шер — доразы. Службалы ярасьтэм лыдъяськизы суйтэм-пыдтэмъёс. Уваровичиын сыпной тифез быдтэммы бере милемыз Новобелицае (али — Гомель карлэн ёросэз) келязы. Оглом мон 3 ар ӵоже Белоруссиын вал. Но Удмуртиысь одӥг адямиез но ӧй пумита! Котькыӵе калыкъёс дорамы вуыло вал, но удмуртъёс малы ке ӧй вал. Ож пумын молдаван пиос туж трос луизы. Сыӵе чебересь, но суйтэм-пыдтэмесь ни… Кыӵе жаляса шоразы учкылӥм!

Быдӟым ожез тодэ вайыкузы, тросэз верало, макем начар сиён но дӥськут вал со аръёсы. Нош Евдокия Матвеевна мукет сямен маде:

— Ӧжыт ке но вал, тырмылӥз. Сиськиськом но, дӥсяськиськом но вал. Госпитальёсын воштӥськон дӥсь котьку кыллиз. Йӧна-тӥськемзы бере солдатъёсты ож лудэ вирен курмем, кесяськем дӥсенызы ӧз лэзьялэ. Нош госпитальёсын соослы пеймыт халатъёс сётъязы. Ветлыны быгатӥсьёсыз гужем городэ со халатъёс но тапочкиос коже потало вал. Паймылӥ: али гинэ кулэмысь улӟем выллем солдат вал, кӧня ке нунал ортчиз но, со катьяськемын ини.

Быдӟым Вормонэз но Евдокия Матвеевна Новобелицаын пумитаз.

— Вормон сярысь иворез кылыса, туж шумпотӥмы! — шуэ Евдокия Матвеевна. — Но ужлэсь милемыз нокин ӧз мозмыты: сӧсырмемъёс трос, соосты пыд йылазы султытоно. Соин ужамысь ӧм дугдылэ, но мылкыд воксё воштӥськиз.

Бӧрысь но госпитальысь ужасьёсты доразы лэзьыны ӧз дыртэ.

— Соку огыр-бугыр вакыт вал на, — шуэ Евдокия Матвеевна. — Кивалтӥсьёс возьмазы, Япония выламы урдскоз шуыса, милемыз котькуд минутэ быгато вал Шундыӝужан пала ыстыны. Ярам ай, выль война ӧз ни ӝутскы. Япония капитулировать карем бере, 1945-тӥ арын сентябре, монэ бертыны лэзизы.

Евдокия Матвеевна пусъемын Г. Жуковлэн, «За Победу над Германией», «Ветеран труда»  но юбилейной медальёсын.

Санитарка Колесникова

Солдат Мадьяров 

Афанасий Сергеевич Мадьяров анайзэ чик уг тоды ни. Со кулыку, пияшлы 1 но ӝыны арес сяна вылымтэ ай. Куинь нылпиос — Афанасий самой пичиез — будӥзы сюранаен.

Волипельга школаын 7-тӥ классэз йылпумъяса, пияш Казане пудо першаллы дышетскыны пыриз (отын апаез улэ вал). Быдӟым ож пуромем бере агайзэ фронтэ басьтӥзы. Нош Афанасиез, егит першалэз, 1943-тӥ арын Глазове ужаны ыстӥзы.

— Но отын толэзь но тыршыса ӧй вутты — армие басьтӥзы, — вера Афанасий Сергеевич. — Нырысь келязы Чувашие, Канаше. Отын кылдытэмын вал запасной стрелковой полк. Удмуртиысь отчы трос кузя мынӥмы. 6 толэзь ӵоже милемыз войналы дасязы: ыбылӥськыны дышетӥзы, стройподготовкае поттазы. Нош бӧрысь келязы 3-тӥ Белорусской фронтэ, Орша доры. 11-тӥ гвардейской армилэн 5-тӥ гвардейской дивизиысьтыз 21-тӥ гвардейской полкын стрелок луи. Фронтын пӧртэм вакытъёс вал. Куддыр 2-3 нуналэн нянез ӧм адӟылэ, ярам коть, котомкаосамы сукариос котьку вал. Немецъёсыз уллям бервылъёсысь но сиён шедьтылӥмы, озьы сютэм быронлэсь утиськылӥмы но кужым люкамы ожмаськыны.

Огпол быдэс нунал ожмаським, ӵуказеяз гинэ нуназе бере чалмытским. Ми лыдъяны кутскимы, кинмы улэп, кинмы ӧвӧл ни. Ротамылэн командирез ӧй вал — озьыен, со яке виемын, яке сӧсыртэмын. Мон сое утчаны мынӥ. Турын ӝужыт, шунды пыже, мон кӧт вылам нюжтӥськисько. Йырдэ ӝут гинэ — соку ик пуля мертчиськоз. Туж кема нюжтӥськыса ветлоно ӧз луы — командирме турынысь шедьтӥ. Солэн макесыз копак куажгатэмын вал, трос вирзэ ыштэм. Ачиз ветлыны уг быгаты. Нош кызьы сое ож лудысь поттод, ӝутӥськыны уг луы ук?! Аслэсьтым еме пертчыса солэнэз борды шедьытӥ. Озьы кыскыса нуи. Кыӵе ке 300 метрез 4 час мынӥмы! Но вуттӥ. Командирме госпитале келязы. Мыным со учыр бере Слава орден сётӥзы. Бергес пусйизы на Отечественной войналэн I степенё орденэныз но уно медальёсын.

Афанасиез сӧсыртӥзы мукетаз ожын.

— Милям дивизимы мозмытӥз Кёнигсбергез но Восточной Пруссиез. Но мон Кёнигсбергозь ӧй вуы — сӧсырми. Со вал 1944-тӥ арын августэ. Соку Минск палъёсын ожмаськимы. Автоматэн ыбыны турттӥсько вал ни — ӧй вутты, вӧзам ик пуштӥз, — вера фронтовик.

Афанасий Сергеевич шӧдӥз, киыз туж вӧсь луиз шуыса. Ыбыны кужмыз ӧз тырмы ни. Осколок кесям пельпумысьтыз вирсэръёссэ, лулсэръёссэ, лызэ, озьы 19 аресъем пияш инвалид кылиз. Огез солдат юрттӥз солы автоматсэ чыртыяз ошыны. Удмурт пи медсанбатэ кошкиз. Но кӧня ке гинэ вамыш ӧз вуы — олокытысь-марысь вуэм пуля мертчиз гадяз но пыд йылысьтыз погыртӥз. Эшшо пуля жиетӥз на, таиз пыриз макесаз. Афанасий йырсасьзэ ыштӥз.

Солдат Мадьяров

Сайказ кыӵе ке тодмотэм коркан. Вӧзаз эмсузэръёс бызьыло, нош со копак шинаосын но бинтъёсын бинямын. Бур киыз ӧй вал ни. Бӧрысь веразы: ож лудысь сое солдатъёс поттӥллям. Йырсазьзэ ыштыса кыллёнъяз трос вирзэ ыштэм.

Кӧня ке улыса, удмурт пиез Оршаысь госпитале келяллям, нош отысь — Москвае. Поездын нуыкузы, со выремысь ик дугдэм ни вылэм. Ярам, Москваозь вуттӥллям, понӥллям самой секыт висисьёслэн палатаязы — отысь улэпкын туж шерез потаз, пе.

— Мон кылӥ врачъёслэсь куспазы вераськемзэс: таиз, пе, секыт, тани-тани кулоз, — тодаз вае Афанасий Сергеевич. — Но мыным удалтӥз эмъясен. Арня ортчыса, Крыме йӧнатскыны келяло, шуиз. Озьы ик кариз.

10 толэзь ӵоже Крымысь госпитальын кыллемез бере Афанасий Сергеевичез дораз лэзиллям. Ки интые — протез, ветлэ бодыен, но улэп! «Ул, солдат!» — келякуз шуэм госпитальысь врач.

Дораз ожгарчи 1945-тӥ арын 9-тӥ мае бертэм:

— Поездысь потӥсько, нош калык малы ке туж шумпотэ, шулдыръяське, — тодаз вае Афанасий Сергеевич. — Озьы тодӥ, асьмеос вормимы шуыса. Кыӵе умой нуналэ бертыны тупаськем! Каньылак шокчи.

Уж ӧтиз

Улон выльысь ӧраз пырыны кутскиз.

Дораз бертыса, Афанасий нырысь ик шедьтӥз ӵош дышетскем эшезлэсь — Евдокия Колесниковалэсь — адрессэ но гожтэт келяз. Озьы егитъёс ог-огенызы кусып тупатӥзы. Афанасий дораз вал ни, Евдокия — фронтын на.

— Мон бертӥ но со сӥзьылаз ик бызи, — мыньпотэ Евдокия Матвеевна. — Афанасий отчыозь кышнояськытэк улэм — монэ возьмам.

Мадьяровъёслэн семьязы 1945-тӥ арын вордӥськиз, нош гожтӥськизы соос, 5 ар ортчыса гинэ.

— Бӧрысь шаерысьтымы Гурт удысъя министерство картэлы Якшур-Бӧдья ёросысь Тыло черкогуртэ ужаны направление сётӥз, — тодаз вае Евдокия Матвеевна. — Отын валъёссы кормаськонэн (чесоткаен) висё вылэм, соосты йӧнатыны кулэ вал. Картэ пудо першал бере, отчы выжимы. Кузпалы ужаз, нош мон Вера нылынымы дорын пуки. Со вакытэ ик дышетски строчить карыны — со туж дунъяське вал. Дэремъёс, тюльёс вурылӥ. Озьы уксё поттыны кутски.

Нырысетӥ нылпиенызы. 1947-тӥ ар.

Собере Мадьяровез выжтӥзы Иж котырысь металлургической заводлэн подсобной хозяйствояз. Кивалтӥсьсы кошкыку, Афанасий Сергеевич со интые кыльылӥз.  Подсобной хозяйствоысь ик дырызлэсь вазь (инвалид шуыса) пенсие потӥз. Ваньзэ-ӧвӧлзэ Афанасий Сергеевич пудоосты 35 ар йӧнатӥз.

Евдокия Матвеевна лифтёр луыса «Аксион» мотозаводын ужаз, бӧрысь Ижысь 2-тӥ городской больницалэн регистратураяз выжиз. Отысь выльысь «Аксионэ» ик берытскиз, пенсие потыса но, кема тыршиз ай.

— Мон но дорын пукыны ӧй чида, — вера воргорон. — Кузпалы соку мотозаводын лифтёр луыса тыршиз, мон но со огазеяськонэ интыяськи, огзэ цехез возьмай.

Вамышто артэ

Евдокия Матвеевна но Афанасий Сергеевич ог-огзылы кылдэмын ик вылэм, лэся: соос одӥг гуртын вордскемын но будэмын, одӥг классын дышетскемын, вордскем нуналъёссы но туж матын — Евдокия Матвеевна вордскиз 1925-тӥ арын 2-тӥ толшоре, нош Афанасий Сергеевич — со арын ик 2-тӥ тулыспалэ. Со сяна, ожмаськиллям но одӥг фронтын — 3-тӥ Белорусской. Ог-огзэс отын ӧз пумиталэ ке но, одӥг палъёстӥ ветлэмзы, одӥг ожъёсты адӟемзы соосты эшшо но матэ кариз, дыр.

— Анай-атае туж шер вераллязы ож сярысь, — шуэ Вера нылзы. — Мон ачим но алигес гинэ троссэ тодӥ ай, созэ но — журналистъёсын но куноосын вераськемысьтызы. Ма, мон ваньзэ валасько: кинлэн потоз сыӵе секыт дырез тодэ ваемез? Со нош ик вӧсь луон ук…

Зэм но, ожез сяна, Мадьяровъёслы вань мае тодазы вайыны. Ӵошен соос кузь сюресэз ортчизы, 3 нылпи будэтӥзы. Табере пиналъёссы асьсэос песянай-песятайёс луизы ни. Вера быдэс улонзэ нылпиосты дышетӥз. Владислав пизы «Аксионын» тыршиз. Нош  Виктор вань даурзэ ни сюрес вылын, водитель луыса ужа. Соослэн нылпиоссы будӥзы но пӧртэм сэрегъёсы кошкылӥзы: огез Швецие шонтӥз, мукетыз — Австралие, куинетӥез — Италие, ньылетӥез — Москвае. Кыкез гинэ Ижын уло. 6 внукъёссы сяна, Евдокия Матвеевналэн но Афанасий Сергеевичлэн 5 правнукъёссы вань ни.

— Анай-атаелэн туж тросэз огъёзъёссы ӧвӧл ни, — шуэ Вера Афанасьевна. — Нош милямъёсыз возисько, малы ке шуоно соос 2 кузя: куспазы кенешо но, серекъяло но, керето но. Кыкназы ик мед улозы ай.

Жаль, тазалыксы ӧвӧл ини. Чупресэсь дыръязы нылпиоссы доры вуылӥзы, Волие но трос аръёс ӵоже бертазы, угось кыкназылэн но атайёссы отын улӥзы. Табере дорысьтызы уг потало ни, ма, арлыдзы но бадӟым — быдэн 92 арес! Со пӧлысь 72-сэ Евдокия Матвеевна но Афанасий Сергеевич артэ вамышто ни — тупаса, ог-огзэс валаса но гажаса.

Елена Рябина

Удмурт Дунне
By Удмурт Дунне Май 5, 2017 16:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<