Висёнэн уретэм веранъёс

Удмурт Дунне
By Удмурт Дунне Май 10, 2017 14:01

Вавож ёросысь Ложкинъёслэн 1933-тӥ арын лэсьтэм туспуктэмзы.

Котькуд семьяын шедёзы, дыр, Быдӟым Атыкай ожен герӟаськем тодэ ваёнъёс, веранъёс. Туннэ мадеме потэ Вавож палъёсысь Ложкинъёслэн семьязы сярысь.

Пичи удмурт Берлуд гуртын улэм Николай Ерофеевич, гуртоос сое Коньы агай нималлязы. Таӵе ним сётӥллям анай-атаез вордскись нылпиоссы кулылэмен сэрен. Аслаз но коньы агайлэн быдэ вуиз 4 гинэ пиез: Илля (1908), Прокор (1912), Петыр (1915) но Евгень (1922). Каргам ож быдтӥз ваньзэсты, одӥгзэ но жалятэк.

1942-тӥ арын гудырикошконлэн 23-тӥ нуналаз Серафимович кар понна ожмаськонын бырыны шеде отделенилэн командирез, сержант Пётр Ложкин. Та арын ик ож лудъёсын чиптэм-чаптэм ышо Илья но Евгений. Ас музъемзэ утьыны кыле Прохор гинэ.

Прохор Николаевич 1945-тӥ арын коньывуонэ вордӥськем палъёсаз берытскиз. Дораз атаез, кузпалыз но 7 аресаз мынӥсь нылыз шумпотыса пумитазы, ӵыжы-выжыоссы но гуртоос адскыны люкаськизы. Вань адӟемзэ 3 ар ӵоже но вераса, пе, уд быдты! Нош дораз улыны арня но ӧз кылды… Висьыны кутскыса, Бадӟым Уча больницае сюриз. 4 ар но 4 толэзь ӵоже курадӟемъёсыз, кезьыт окопъёсын кынмемъёсыз кыре потӥзы но, ты висёнэз аляз. Оске вылэм: «Мон — военной, монэ эмъялозы!»

Малпанъёсызлы зэманы кылдымтэ. Эмъяськонниын врач ӧвӧл, эмсузэръёс но тырмыт вылӥллямтэ. Озьы вормонэн бертэм мурт, 34 аресаз мыныкуз, туберкулёзэн висьыса, катьяськымтэ ни, 1945-тӥ арын 28-тӥ шуркынмонэ сюлэмыз жугиськемысь дугдэм.

Прохор Николаевич Ложкин ӵужанаелэн атаез луэ. Ӵужанае тятязэ уйвӧтын адӟем кадь гинэ тодэ на. Озьы ке но милемлы со сярысь трос мадьылӥз. Кылемын пӧртэм туспуктэмъёс. Соос пӧлысь мыным тужгес тунсыкоез но дуноез луэ одӥгез. Та туспуктэмын воргорон но 3 егит нылкышноос. Ӝужыт пи — Прохор Николаевич, со вадьсын пукись нылкышно — солэн егит кузпалыз Александра Никифоровна. Туспуктэм лэсьтэмын 1933-тӥ арын  25-тӥ гудырикошконэ Тыловыл-Пельга черкогуртысь базарлэн шыпыт интыяз. Вылӥ сэрегез кесиськемын, интыен-интыен чигиськылэмын, тылын ӵушкам выллем пытьыез но кылемын. Тужгес паймымонэз — туспуктэмлэн мукет палаз. Ӟучен удмуртэн суро, янгышъёсын, тазьы гожтэмын: «Эта карточка снята 1933 года августа месяца 25 числа. Коркан возьса чебер ӧвӧл ни ӵуж луиз. Ӟеч лу, карточкае, ӟеч ветлыса ӟеч бертэ тӥ. Кызьы ке мон киысь, мон дорысь тӥ кошкиды, озьы ик ӵошен бертэ. Ӟеч ветлыса, ӟеч бертэ. Ӟечак улэ». Валамон: тае гожтэ пересь песянае, картсэ фронтэ келякуз. Озьыен, та синпелет но, оло, утиз ожгарчиез, гожтэм кылъёс оскон но кузьмазы, луоз, кужым но сётӥзы…

Ольга Лесникова

Удмурт Дунне
By Удмурт Дунне Май 10, 2017 14:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<