Вавожын ӝегатэмын егит лушкаськисьёс, Можгала лэсьтӥзы удмурт книгаос, Кезын 17 сюрс 600 кыз мерттӥзы

Удмурт Дунне
By Удмурт Дунне Май 22, 2017 14:18

Алнаш

Кузь сюрес

Варзи-Ятчи черкогуртэ, 76 ар ортчыса, выльысь берытскиз, шуыны луэ, красноармеец Егор Григорьевич Кононов. Смоленск улосысь Ярцево ёросысь ожъёслэн бервылысьтызы шедьтӥзы солэсь лысьӧмзэ.

Егор Кононовез Западной фронтэ басьтӥзы 33 аресказ. Гуртэ кылизы кузпалыз но 4 пиналыз. Ӝоген семьяезлы  ивор вуиз, красноармеец чиптэм-чаптэм ышиз шуыса. Егор Кононовлэсь лысьӧмзэ кылем ар пумын «Высота» поисковой отряд шедьтӥз. Туэ 9-тӥ Май праздникъёс дыръя красноармеецлэсь лысьӧмъёссэ Варзи-Ятчие вуттӥзы, вӧсязы. Сое ватыны быдэс гурт люкаськиз.

Кизнер

Шальыен шудӥзы

Кылем арнянуналэ Кизнерысь 2 номеро школае люкаськылӥзы Приволжск федерал округысь шальыен шудӥсьёс.

Шудыны быгатэмзэс эскерыны вуылӥзы Нижний Новгородысь, Саратовысь, Татарстанысь но Удмуртиысь командаос. Куноосты пумитаз но шуныт кылъёс вераз ёрослэн йырыз Александр Плотников, нош шудонэз радъяз СССР-ысь спортъя мастер, Совето Союзлэн чемпионэз (1983) Сергей Талов. Вормисе потӥзы Саратовысь, Нижний Новгородысь но Удмуртиысь командаос.

Пичи Пурга

Алӥзы ӝог ворттылэмлэсь

Брангуртысь нылпиос ГИБДД-ен но чугун сюрес вылын ужасьёсын валче сюрес вылын ворттылон куронъёсты чакланъя ужрад ортчытӥзы. Соос борды итӥськизы гуртысь песянайёс но.

Ужрадэ люкаськемъёс Кечол черкогуртысь чугун сюрес дуре потӥзы. Отӥ ортчись машинаосты дугдытъяса, соос водительёслы сётъязы чугун сюрес вамен выжон куронъёсын ивортонъёсыз, алӥзы ӝог ворттылэмлэсь. Угось та интыын трос шуккиськон учыръёс луыло. Берло инспекторъёс ёрос школаосы вуылӥзы на, соос пиналъёслы тодазы вайытӥзы сюресъёс вылын мынон-ветлон правилоосты, мультфильмъёс возьматӥзы.

Вавож

Ӝегатэмын егит лушкаськисьёс

Дорысьтызы пегӟем 11 но 13 аресъем 2 пияшъёс анай-атайзылы берыктэмын вал.

10-тӥ мае ӝыт пиналъёслэн мумы-бубыоссы югдурез утисьёс доры вазиськизы, нылпиоссы доразы бертымтэ шуыса. Егитъёсты утчаны потӥзы полицейскойёс, МЧС-ын ужасьёс но гурт калык. Пегасьёсты шедьтӥзы, 2 нунал ортчыса, 12-тӥ мае, Сюмси ёросысь Муки-Какси гурт вӧзысь тэльысь. Тодмо луиз пияшъёслэн пегӟон мугзы: соос ёросысь одӥг лавкаысь лушкаськиллям, берло Сюмси ёросын йыртэмаллям на — велосипед капыртӥллям. Табере та учырез югдурез утисьёс нимысьтыз эскеро.

Кияса

Буре вайизы ӵошатсконын

Кияса ёросын, Максим Пилоянэз буре вайыса, капчи атлетикая ӵошатскон ортчиз.

Отчы пыриськизы Кияса, Каракулино, Сарапул, Дэри, Пичи Пурга, Дэбес, Камбарка ёросъёсысь, озьы ик Ижысь но Сарапулысь бызьылӥсьёс.

Ӵошатсконэз мытӥзы Кияса нылпи садъёсысь пиналъёс. Соос 500 метр бызизы. Соос бере ини быдэс элькунысь спортсменъёс Киясаысен Уддядиозь 10 иськемез ортчизы.

Максим Николаевич Пилоян 23 ар ӵоже Уддядиысь «Ленинец» колхозэн кивалтӥз. Со дыръя гуртын школа, клуб, котельной пуктэмын вал, со ик сюлмаськиз Киясаысен Уддядиозь сюрес вӧлдон пумысен. Ӵапак со сюрес кузя ортчиз пробег.

Ува

150 йыртэман

Кылем арня ӵоже ёросын сюресъёс вылын мынон-ветлон куронъёсты тӥян 150 учыр пусъемын.

Уваысь югдурез утисьёс руль бергатыны правозэс талазы 8 водительёслэсь, ваньзы соос кудӟем йырын сюрес вылэ потӥллям. 5 мурт кырмемын вал руль сьӧрын правотэк ворттылэмез понна. 2 адямиез 15 суткалы пытсэт сьӧры келязы.

Озьы ик 14 пешеходъёс административной кыл кутон улэ кыскемын. Тросэз пеймыт куазен ураметӥ юмшазы дӥськутазы пиштӥсь арберитэк. Ёросын 4 шуккиськон учыр пусъемын, сӧсырмыны сюремъёс ӧй вал.

Дэбес

 Атайлы сӥзем альбом

Ёрос библиотекаын «Воинская слава Дебёсского района» книгаен тодматскон ортчиз.

Авторез — Дэбес ёросысь шаерчи, журналист Александр Леконцев. Книгае пыртэмын Быдӟым оже пыриськем 197 улосчиоссы. Библиотекалэн кивалтӥсез Екатерина Пантелеева верамъя, куное ӧтемын вал книгае пыртэм фронтовикъёслэн ӵыжы-выжыоссы. Соос веразы, кызьы семьяосазы утё фронтэ ветлэм песятайёссы сярысь тодэ ваёнъёсты. Кылсярысь, Аверкиева Ирина Витальевна котькуд аре 9-тӥ Май праздниклы, атаезлы сӥзьыса, нылпиосызлы но нунокъёсызлы ас киыныз кузьым лэсьтэ — открытка яке альбом. Книгаен тодматскозы ёросысь мукет библиотекаосын но.

Можга

Удмурт книга

Ёросысь 1-тӥ-4-тӥ классъёсын дышетскисьёс пыриськизы «Мынам пичи удмурт книгае» ӵошатсконэ-адӟытонэ.

Пиналъёс удмурт кылэн но литератураен мед тунсыкъяськозы шуыса, ӵектэмын вал бичет кылдытыны. Выжыкыл, верос я кылбур малпам сяна, сое чебер суредъёсын узырмытоно, ваньзэ тае чебер книгалы пӧрмытоно вал. Ужрадэ 18 школаысь 37 уж вуиз. Пӧлысьтызы 10 школаын удмурт кыл предмет чотын уг нуиськы. Озьы 1-тӥ-2-тӥ классъёс пӧлын 1-тӥ инты утӥзы Бадӟым Кибья школаысь 2-тӥ классын дышетскисьёс. 3-тӥ-4-тӥ классъёс пӧлын вормиз Пазял школаысь Мария Петрова. Ужъёссэс адӟыны луэ Можга ёросысь дышетонъя управлениысь.

Шаркан

Куно вуиз вертолётэн

Кылем пятница ӝытазе Шарканысь стадионэ вертолёт пуксиз.

Отысь потӥз Россиысь Куасэн бызьылонъя федерацилэн президентэз Елена Вяльбе киосаз 50 роза сяськаен. Лобыкуз ик синмаськем Шаркан черкогуртлы. Сыӵе чебер инты, пе, Россиысь спортлы дано чемпионъёсты Владимир Никитинэз, Максим Вылегжанинэз будэтыны юрттӥз. Нош Шарканэ вуылон мугез герӟаськемын вал Россиысь куасэн бызьылӥсь воргоронъёслэн командазылэн тренереныз Олег Перевозчиковен. Вордскем нуналэз декабрь толэзе вал ни ке но, дано тренер сое али ортчытоно кариськиз. Шаркан черкогуртэ та нуналэ Россиысь но кунгож сьӧрысь мукет куноос но вуылӥзы.

Кез

Кызъёс будозы

Ёросысь нюлэс хозяйствоын ужасьёс 17 сюрс 600 кыз мерттӥзы.

Дэбесэ нуись сюрес кузя корам нюлэс интыын табере буш уз луы ни, отын 4 гектар вылын  кызъёс ӝужалозы. Выль тэль будэтон сярысь сӥзьыл ик сюлмаськыны кутскизы — музъемез гыризы. Дасям удъёс умой улӟо ке но, сӥзьыл но вуоно тулыс соосты эшшо огпол эскерозы на. Куасьмемъёсыз интые выльёссэ мерттозы. Матысь дыре нюлэскасьёс эшшо 5 гектар тэль мерттозы на. Оглом верано ке, ар куспын 100-150 гектар пала выль нюлэс ӝужа.

Сьӧлта

Эмчиос шудӥзы КВН-эн

Ёрос сцена вылын Эмсузэрлэсь нуналзэ пусъён улсын вожвылъяськизы фельдшеръёслэн, эмсузэръёслэн, акушеркаослэн 6 командаоссы.

Ужрад ортчиз КВН амалъя, но шудонэн, серектонэн йырин отын ӧй вал — эмчиос номеръёссэс сӥзизы туэ Удмуртиын ялэм лек пыктосэн нюръяськон арлы. Кылсярысь, соос сценкаос пыр возьматӥзы, кызьы шараяны луэ висёнлэсь кырмиськемзэ, тазалыкез утён сярысь кылбуръёс веразы, ракен герӟаськем юанъёслы валэктонъёс утчазы. Вормисе потӥз фельдшеръёслэн командазы.

 

Яр

Вожвылъяськизы скал кыскисьёс

Та арня вискын «Агрояр» хозяйствоын вожвылъяськизы ёросысь 14 дояркаос.

Ӵошатсконын эскеризы соослэсь пудо висёнъёсты, йӧл кыскон  амалъёсты тодэмзэс. Озьы ик кышномуртъёс возьматӥзы  скал кыскон аппаратэз сэрттыны быгатэмзэс, веразы, кызьы йӧллэсь ӟечлыксэ эскероно.

Ваньзэ тае лыдэ басьтыса, шараямын 3 тужгес устоосыз. Вормисе потӥзы «Озёрки» эштосысь Лилия Трефилова, «Агроярысь» Евгения Поздеева но «Прогрессысь» Надежда Трефилова.

Удмурт Дунне
By Удмурт Дунне Май 22, 2017 14:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<