Ожмаськиз Грециын

Удмурт Дунне
By Удмурт Дунне Май 8, 2017 10:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Г. Николаев

Шаркан ёросысь Мувыр гуртын вордскем Геннадий Николаев войнаын котьмае адӟиз, но туж секыт вакытъёсы но данзэ ӧз ышты.

Лек тыллы ӧз сётскы

Вордскиз Геннадий Николаевич Мувыр гуртын 1923-тӥ арын. Бубиз 1942-тӥ арын март толэзе Ленинград котырын быриз. Со арын ик май толэзе войнае мыныны арлыдыз вуиз Геннадийлэн. Ожмаськиз Смоленск котырын автоматчик луыса.

Огпол 16 кузя автоматчикъёсты уйин ыстӥзы тушмонлэн мышказ. Пурӟытоно-бичатоно, пе, соосты, адӟоно, бадӟым-а кужым люкаллям  тушмонъёс. Малпамзыя ӧз луы. Огезлы эшсылы пуля йӧтӥз, вӧсь луэменыз кеськыны шедьтӥз — автоматчикъёсты шӧдыса, пурӟизы ук немецъёс! Автоматчикъёсмы ваньзы быризы шуыса, малпазы командиръёс. Озьы Г. Николаевлэн гуртаз ивортон вуиз: стрелок-красноармеец Г. Н. Николаев Родина понна ожмаськонын кышкасьтэм геройёс радын быриз 1942-тӥ арын 5-тӥ сентябре Смоленск улосысь Карманской районысь Антоновка гуртын.

Но контузия улэ шедем Г. Николаевез немецъёс кутӥллям вылэм. Мукет военнопленнойёсын ӵош келяллям Грециысь концлагере. Пеймытысен пеймытозь кипарис нюлэсэз коратӥзы. Одӥг пол, пичи группаослы люкиськыса, военнопленнойёс пегӟыны дасяськизы — юрттоно кариськиз концлагерьлы матын улӥсь грек. Со пу корасьёс доры ӵем вуылӥз. Куддыр кыӵе ке сиён но вайылӥз. Но пегӟонзы вераськемъя ӧз пӧрмы. Николаев но эшшо 2 эшъёсыз, грекез витьытэк, ас малпамзыя пегӟизы. Ӧжыт гинэ немецъёс кие ӧз шеде. Соосты немецъёс пуныосын нюлэскытӥ утчазы ке но, ӧз шедьтэ.

Асьме боецъёс шедизы Грециысь эрик понна нюръяськись армие. Татын ожмасько ни вылэм Сибирьысь но мукет интыосысь пиос. Нош  Г. Николаев Удмуртиысь огназ вал. Асьме солдатъёс грекъёсын ӵош ортчизы кышкыт ожмаськонъёсты, кышкасьтэм но амало луэмзэс возьматӥзы, утизы гуртъёсты, пичи городъёсты… Утизы ӝынызэ пала Пелопоннес шормуӵез.

1943-тӥ арын  Геннадий Николаевичез кутӥзы Грециысь коммунистической партие. Фашистъёсын ӟырдыт нюръяськемез понна партизанлы данъян грамота сётӥзы, отын гожтэмын вал: «Тӥляд нимды зарни букваосын гожтэмын луоз Грециысь эрик понна нюръяськись геройёсын артэ».

 

Мур зарезе ӧз выйы

1944-тӥ арын июль толэзе грекъёслэн 9-тӥ полксылэн штабаз вуиз английской военной миссиысь офицер.

— Ӟечбуресь, союзникъёс! — шенгыль-пенгыль вазиз со. — Мон тӥледлы «Правда» газет вайи. Родинады дораз ӧте. Дасяське!

Дасяськизы туж дыртыса. Ӝытазе, пе, ярдуре вуоз английской эсминец. Туж шуныт, ӟыгыръяськыса люкиськизы асьме солдатъёс грекъёсын. Кинэн но маин воштод вордскем шаердэ?

Геннадий эшшо огпол ӟыгыртӥз на Андонис командирзэ, собере бызьыса кошкиз ярдуре — шлюпкаосын соос потыны кулэ Италиысь Сорренто городэ.  Зэм, шлюпкаос ваньзылы тырмымтэысь, отчы пуктылӥзы сӧсырмемъёсты но висисьёсты гинэ. Геннадий Николаевлы аслыз уяно вал. Но сӧсырмыны сюрылэмез бере лябӟемез шӧдӥськиз-а, мар-а — пыдыз косказ. Ӧжыт гинэ ӧз выйы.

Зарезьысен ик адӟизы бышкись езэн котыртэм туж кузесь баракъёсты.

— Тани татын улоды, — шуиз английской офицер.

Асьмелэнъёс чылкак паймизы: кызьы, малы соосты пуктӥзы немецкой военнопленнойёсын огинэ? Малы охрана но нимысьтыз зол эскерыса возе? Кыстӥськизы пумтэм-йылтэм кузь нуналъёс.

Огпол малпамтэ шорысь одӥгез эшсы туж зол кеськиз:

— Учке ай, учке, эшъёс! Вадьсамы горд флаген машина дугдӥз! Асьмелэн ук со!

Машинаысь потӥзы генерал, майор но мукет офицеръёс.

— Кыӵе-мар ни тӥ, эшъёс? — вазиськиз генерал. — Тани кызьы но луылэ улонын…

Эрике поттэм солдатъёсты кӧня ке возизы Соррентоысь гостиницаын. Собере нуизы Александрия портэ. Зарезь. Пароход. Городъёс… Пумтэм-йылтэм сюрес. Тани адӟиськиз… Баку! Йӧнтэм жугиське сюлэм. Вань мугортӥ шуныт кошке, вордскем шаерлэн шокчемез шӧдӥське…

Калык пӧлын вал

Война бере Геннадий Николаевич ужаз Шаркан но Вотка ёросысь хозяйствоосын электрик луыса. Кӧня ке пол сое бырйылӥзы Светлянской сельсоветэ депутатэ. Трос общественной уж нуиз. Черновской лесоучастокысь пенсионеръёслэн огазеяськонэнызы кивалтӥз, товарищеской судлэн председателезлэн юрттӥсез вал, вуз карон удысын общественной контролёре но бырйылӥзы. Весь ӧтьылӥзы нылпиослэн но мӧйыослэн пӧртэм пумиськонъёсазы. Тазалыкез лябӟемен сэрен пенсие дырызлэсь вазь кошконо луиз. 1974-тӥ арын Г. Николаев улонысь кошкиз.  Кузпалызлы Серафима Ивановналы кайгырон телеграмма вуиз Москваысь  но, отын верамын вал Грециысь эшъёсыз но мур куректо шуыса.

Шаркан ёросысь Сурон но Мувыр школаосын трос материалъёс люказы Геннадий Николаевич сярысь. Но соос берло вакытэ чалмыт кыллё. Угось Геннадий Николаевич кузпалыныз 7 нылпи вордӥзы ке но, соос быдэ вуизы ини Вотка ёросын. Мувырын ӵыжы-выжыосыз ӧз но кыле ни, дыр. Озьы вордскем гуртаз ожгарчилэн нимыз пумен вуныны кутскиз…

Табере Геннадий Николаевлэн Ольга, Эльвира, Маша, Люба, Георгий, Юрий, Николай нылпиосызлэн нылпиоссы будӥзы ни, дыр. Валало-а соос песятаенызы данъяськыны? Тодо-а, Геннадий Ледыгин журналистлэн Геннадий Николаевич сярысь  «Человек и легенда» повестез вань шуыса? Со быдэсак гожтэмын, зэмос документъёс вылэ пыкиськыса.

Ирина Весёлых

Удмурт Дунне
By Удмурт Дунне Май 8, 2017 10:58 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<