Маин сюдӥзы нылпиосты?

Иж сьӧрысь «Дружба» нылпи лагерьын Россилэн «Что? Где? Когда?» шудонъя чемпионатэз ортчиз. 60-лэсь ятыр нылпиос шуге-леке вуизы, урод сиён сиыса.

Чемпионатэ лыктэмын вал пӧртэм улосъёсысь 500 пала 16-18 аресъем пиналъёс. 2-тӥ мае ивортыны кулэ ни вал вожвылъяськонлы йылпумъянъёсты. Но нырысь ик 17 пинал ӝожтӥськыны кутскиз тазалыкез вылэ. Собере ӝуммыны ӧдъязы  мукетъёсыз но. Туннэ нуналлы 60 пала пиналъёс сюризы Паласькись висёнъёсъя элькун больницае.

Лагере соку ик потӥзы Роспотребнадзорысь специалистъёс — вуэз но сиён-юонэз эскеризы. Следствиея комитет Уголовной кодексысь 238-тӥ статьяя (кышкытлыклэсь утиськонлэн  куронъёсызлы тупасьтэм услугаос сётэм понна) уголовной уж ӝутӥз.

Элина Кумачёва