Кызьы азинтоно городэз?

Удмурт Дунне
By Удмурт Дунне Май 3, 2017 11:27

Тӧролэсь ужзэ быдэсъясь Александр Бречалов Глазовын ужбергатӥсьёсын но калыкен пумиськылӥз. Чузъяськизы экономикаез азинтонысен кутскыса калыклэсь улонзэ ӟечомытон дорозь юанъёс.

Глазовысь «Бизнес-инкубаторе» люкаськем ужбергатӥсьёслы Александр Бречалов шуиз: матысь дыре шаерамы вуозы Москваысь экспертъёс. Соос юрттозы бизнесэз азинтонъя кусыпъёс юнматыны, озьы ик ар куспын ужбергатон удысын лэсьтэм ужъёслы йылпумъян лэсьтэмын луоз.

Собере А. Бречалов Механикая Чепца заводлэн ужаменыз, проектъёсыныз тодматскиз.

Трос лэчыт юанъёс дасяллям А. Бречаловлы городлэсь улонзэ ӟечомытон понна сюлмаськисьёс. Инкуазез утись Алексей Милехин Карасёво гурт котырын лэсьтӥськись жуг-жагез возёнъя полигонлэн кышкытлыкез сярысь вераз. Гуртоос сюлмасько, отысь кырсь артысь Сянинской водохранилищее сюроз шуыса.

Хоккейя «Прогресс» клублэн кивалтӥсез Кирилл Гоголев тросгес нылпиосты спортэн эшъяськытон сярысь сюлмаське. Пиналъёслы хоккеен вырыны дӥськут, арбериос басьтон понна коньдон асьсэос поттыны дышизы ини, но со уггес тырмы, пе.

Политехнической колледжысь дышетӥсь Семён Хайлин ссузъёсысь визьнодасьёслэн уждунзы пичи шуиз. 8 сюрс манет понна нокинлэн ужамез уг поты, пе, соин дышетон удыс пумен лябӟе.

Глазовысь егит азь-ветлӥсь, дизайнер Валентин Наговицын городысь садэз тупатыны, чылкытатыны чаклам проектэныз тодматӥз. Егит мурт, Москваысь, Санкт-Петербургысь ӟеч ужзэ куштыса, дор палаз берытскиз. Яратӥсько городме, туж потэ, со мед азинтӥськоз, вераз со. Городысь садэз тупатонъя проектэз благоустройствоя федерал программае ӧз сюры ке но, егитъёс асьсэ кужымен отын утялтӥсько. Садэз тупатыны, ӟусъёс пуктыны ог 500 сюрс манет кулэ, пе. Александр Бречаловлы Валентин Наговицынлэн ӵектонэз тунсыко потӥз, со шуиз: малпандэс улонэ пыӵатыны мон аслэсьтым коньдонме но висъяны дась, проекттэс эшшо кӧня ке ӟечомытӥды ке.

Глазовысь пединститутын дышетскись Алёна Дютинова юаз, луоз-а городъёсысь школаосы лыктӥсь дышетӥсьёслы, гуртъёсы мынӥсь дышетӥсьёслы сямен, элькун ласянь кыӵе ке юрттэт. Угось али городъёсысь школаосын дышетӥсьёс уг тырмо. А. Бречалов валэктӥз: таӵе юрттэт матысь дыре чакламын ӧвӧл.

Ангелина Снигирёва

Удмурт Дунне
By Удмурт Дунне Май 3, 2017 11:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<