Кык вормонэн бертӥмы

Удмурт Дунне
By Удмурт Дунне 22 мая, 2017 15:35

 

Туэ милемлы, Алнаш ёросысь «Азвесь гырлы» калык фольклор ансамбльлы,  Москвае «Гордость России» но «Великая страна» фестиваль-вожвылъяськонъёсы  вуылыны кылдӥз. Ужрадэ  быдэс Россиысь, Белоруссиысь усточиос пыриськизы. Ваньмыз-ӧвӧлэз  93 коллектив люкаськиз.

Бадӟым тау «Азвесь гырлы» ансамбле ветлӥсь артистъёсылы — асьсэ коньдонэн Москвае потазы, калыкез адӟизы, асьсэды возьматӥзы.

Фестиваль 2 нунал ӵоже ортчиз. Вожвылъяськонын асьмелэсь быгатонлыкъёсмес  огпол гинэ возьматӥмы, нош дунъясьёс кык пӧртэмесь вал. Соос нимаз пукизы. «Гордость России» вожвылъяськонэз чаклазы Россиысь калык артистъёс, нош «Великая страна» вожвылъяськонэз — МГИК но МПГУ вузъёсысь тодосчиос. Ужрад бырем бере жюриос пумиськон ортчытӥзы. Соос асьсэлэсь мылкыдъёссэс веразы, кытысь луэменымы тунсыкъяськизы. Кырӟаммес-эктэммес  ушъязы. Милям мылкыдмы эшшо но бурдъяськиз.

Нунал ортчыса, гала-концерт вал. 43 коллективъёс  асьсэлэсь быгатонлыкъёссэс возьматӥзы. Ваньзы фонограммая эктӥзы но кырӟазы, нош ми  — арган шудэм улсын. Быдэс зал бугыртӥськиз кадь, ваньмыз «Браво!» кесясько. Сыӵе ӟырдыт кичабонъёс улсын кошкимы сцена вылысь.

Концерт бырем бере ӟечкыланъёс кутскизы. Нырысь пусйылӥзы «Гордость России», собере «Великая страна» вожвылъяськонъёсъя. Кык конкурсын но гран-при басьтӥмы — со самой бадӟым дунъет луиз. Озьы 2 вормонэн  дорамы  бертыны потӥмы. Гуртоос милемыз  пӧсь табанен пумитазы, быдэс ӝӧк  пуктӥллям. Ми туж шумпотӥмы. Бадӟым тау «Азвесь гырлы» ансамбле ветлӥсь артистъёсылы — асьсэ коньдонэн Москвае потазы, калыкез адӟизы, асьсэды возьматӥзы. Соос  шуг-секытлы сётӥськисьтэмесь, кышкасьтэмесь, мыло-кыдоесь, котьку но ог-огзылы юрттыны тыршисесь.

Светлана Иванова

Удмурт Дунне
By Удмурт Дунне 22 мая, 2017 15:35