Кулонлэсь утиз чорыг вӧй

Удмурт Дунне
By Удмурт Дунне 8 мая, 2017 09:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Быдӟым ожез пӧртэм муртъёс пӧртэм сямен тодазы ваё, Ижысь Мария Ефимовна Канди (Пономаренко) али но куалекъясь куараен вера, кызьы фашистъёс солэн городаз кузёяськизы…

Ижысь мыло-кыдо нылкышно М. Канди пӧртэм ужрадъёсы пыриське.

Тушмон Донбассысь Енакиево карез киултыку, Маша Пономаренколы 6 арес гинэ вылэм ай. Атайзэ ожлэн нырысетӥ нуналаз ик фронтэ басьтӥзы, 4 пиналъёс анаенызы кылизы.

— Немецъёс милемыз дорысьтымы уллязы, асьсэос коркаямы интыяськизы. Юртмы бадӟым вал, соин, дыр, кельыштыризы. Вань пудомес, тылобурдоосмес вандылыса сиизы. Милесьтым гинэ ӧз, быдэс городысь. Ми азбарамы шалаш пуктӥм но отчы интыяським. Возьмамтэ куноосмылэсь вожзэс поттыны туж кышкаськом вал, угось соос калыкез интыяз ик ыбылӥзы, ӧз учке, бадӟым-а тон, пичи-а. Курдамы ке но, соос кытчы ке кошкыку, галетъёссэс (кќс печеннязэс) лушкаллямы, малы ке шуоно сиыны номыр  вал. Кӧтмес тыримы чорыг вӧен, со ик кулонлэсь утиз. Али но тодӥсько на: мынӥськод урамтӥ, нош омырын чорыг вӧй зын лӧсъяське. Кытысь со сомында вылэм, али но уг тодӥськы. Но ож бере мон сое ымам ӧй тыры ни — сокем безӥ.

Агайёсы бадӟымесь вал ни, оже кужмысь медаз келялэ шуыса, соос пегаса улӥзы. Пегӟыны луэ вал кукуруза пӧлы гинэ. Вазь ӵукна кошко но бер ӝыт, пеймыт кариськем бере, шалашамы вуо вал.

Огпол агайёсы вазьгес бертӥзы, фашистъёс сое шӧдӥллям, лэся. Агайёсы ӝогак бакчаысь чумолёе ватскизы. Немецъёс сое штыкъёсын бышказы. Ми мамаеным но апаеным, дыр куалекъяса, палэнынгес сылӥськом. Кызьы штыкъёсынызы йӧттӥллямтэ…

Нош мукетъят агайёсы туж кема ӧз вуэ, анаймы сюлмаськыса бускельёсмы доры потӥз — оло, соос мар ке тодо? Бертыкуз асьмелэнъёс городмес мозмытыны кутскиллям. Котыр ваньмыз пуштылэ, шула, Енакиевоямы юг-юг. Огез снаряд соку ӵапак коркамы вылэ вуиз — ӝыны коркамы куашказ. Мамамылэн пыдаз мар ке пырем. Ми апаеным шалашын пукиськом, агайёсмы но мамамы ӧвӧл. Кышкыт. Ӧжытак шыпыт луэм бере ураме потӥм но мамамес адӟим. Апаеным сое ӝутыны мырдэм ӟигармы тырмиз. Шалаше пыртыса, вӧзаз пукимы.

Со уе асьмелэнъёс Енакиевоез басьтӥзы. Агайёсмы но вуизы. Анаймес ӝегатскытэк больницае нуоно, нош маин? Валъёс фронтэ нуэмын, пудо-живот кылемын ӧвӧл… Ӵукна мырдэм кытысь ке вал шедьтӥзы, мамамес райцентре нуизы. Но вуттӥллямтэ — сюрес вылысен со пуанлэсь (заражение) кулэм.

Уг тодӥськы, кызьы озьы учырам, но городмес мозмытэмъёс пӧлын атаймы но вылэм. Енакиевоез мозмытэмзы бере со командирезлы шуэм: «Мынам татын семьяе: кышное но нылпиосы. Ойдо пыралом». Лыктӥллям, нош коркалэн ӝыныез ӧвӧл. Пыриллям — шораз ик кышноеныз корос сылэ. Папаелы мамамес ватыны 1 нунал сётӥзы.

Мамамес ватэммы бере агайёсмы папамы сьӧры кошкизы, нош монэ апаеным воксё мурт кышномурт басьтӥз. Со милемыз чик ӧз яраты, ялан ултӥяз, серем кариз. Ми мырдэм сое чидамы.

Вормон сярысь иворлы нырысь ӧм но оске кадь — сокем ожлы дышиськеммы. Но со ивор ваньмыз понна самой бадӟым шумпотон вал! Ог-огмес ӟыгыръяськом, чупаськом, бӧрдӥськом, кырӟаськом… Школаын со дырысен чай, нянь шорем но 1 пилет сакыр сётъяны кутскизы — дуннеысь самой ческыт сиён!

Папамы Австриозь вуиз но 1946-тӥ арын берытскиз Енакиевое. Улыны кутскиз со кышномуртэн но милемын ӵош, угось асьмелэн коркамы ӧй вал ни. Ми апаеным шуим: тон котьма кар, улӥськод ке соин — ул, нош ми кошком. Но кошкимы дэмен, куиньнамы. Городамы ик комната снять карим.

Атаймы уже интыяськиз, ми апаеным школаын дышетским. Бадӟымез агаймы ож бере военной луиз, сое Курил шормуӵъёсы ыстӥзы, отын ик быдэс улонзэ улӥз. Огполаз бертыкуз, атаелы каньылгес мед луоз шуыса, апайме но сьӧраз нуиз. Бӧрысь апае Благовещенске кошкиз — отын вылӥ образование басьтӥз но семья кылдытӥз. Пичиез агае бертӥз но атаеным ӵош Енакиевоын улӥз.

Школаез йылпумъяса, мон Донецкысь технической институтэз йылпумъяй. Быдэс улонме заводэн герӟаме потӥз шуи ке, алдало. Технической вузэз бырйи, малы ке шуоно отын стипендия тросгес тыризы. Дышетсконме йылпумъяса, бызи. Монэ кузпалэным ӵош направлениея Оренбург улосэ лэзизы, быдэс улонмес Новотроицкой металлургической комбинатын тыршимы. Пенсие потыса, Иже улыны выжимы, угось татын огез нылмы улэ. Со но милям пытьыосмыя мынӥз — ужа «Буммаш» заводын. Ми кузпалэным 62 ар ӵоже ини улӥськом. 2 ныл будэтӥм, табере милемыз шумпотто ни 2 внучкаосмы, 2 внукъёсмы но 8 правнукъёсмы.

Елена Рябина

Удмурт Дунне
By Удмурт Дунне 8 мая, 2017 09:36 Updated