Косэмын — лэсьтоно!

Удмурт Дунне
By Удмурт Дунне 22 мая, 2017 14:04

Кылем арняе Удмуртилэн Тӧроезлэсь ужзэ быдэсъясь Александр Бречалов журналистъёсын пумиськылӥз. Бадӟым саклык висъяз ёросъёсын калыкен ужанлы.

А. Бречалов: чырмытгес ужано калыклэн вазиськонъёсызъя.

Кин кивалтоз Балезиноен?

Берло аръёсы сьӧд пилемъёс ӵем поръязы Балезино вадьсын. Югдурез эскерон вылысь Александр Бречалов отчы шаерысьтымы 10 министерствоосысь специалистъёсты келялляз. Соос Балезиноын арня ӵоже ужазы. Кыӵе шугадӟонъёсты шараязы но макем ӝог соосты сэрттыны-пертчыны луоз?   Александр Бречалов пусйиз:

— Балезиноын берло дыре кайгу вылэ кайгу ватсаськиз. Ёрос кивалтӥсьёс суд улэ шедемын, я культура юртлэн липетэз куашка, я шугъяськонъёс эмъян удысын… Балезино райцентрын 16 сюрс адями улэ. Каргуртлэн огпалаз поликлиниказы вань, мукет палаз — ӧвӧл. Тазалыкез утёнъя азьвыл министрен вераськи, со шуиз: ма, пе, отын поликлиника дорозь 1 километр котыр гинэ мыноно. Зэмзэ ке, 3 иськемлэсь кыдёкын вылэм. Эскеримы: тып-тып воргорон та сюресэз быдэс час ӵоже ортчиз.

Александр Владимировичлэн верамезъя, матысь дыре Балезиноын ФАП усьтэмын луоз.

Кыкетӥез ужпум — юон ву. Вуэз чылкытатӥсь сооружениос татын туж вужмемын, соос 1950-тӥ арын пуктэмын ай. Александр Бречаловлэн верамезъя, нырысь ик кутскозы Чепца шурез чылкытатон борды.

Александр Бречалов пусйиз: Правительство Балезиноын ӟеч ужаз. Специалистъёс, арня ӵоже ёросысь калыкен пумиськылыса, вань шугъяськонъёсъя нимысьтыз карта лэсьтӥзы. Котькуд мылкыд карись сое Балезино ёрослэн сайтысьтыз шедьтыны быгатоз. Александр Бречаловлэн малпамезъя, та выллем картаоссы луыны кулэ котькуд ёросын. Соос вылэ пыкиськыса, шугъяськытӥсь ужпумъёсъя ужаны луысал.

Нош кин азьланяз валтоз Балезино ёросэз? Александр Владимирович пусйиз: кадръёсъя шугъяськонъёс вань. Та интые конкурс ялэмын луоз.

Пичи Пургалан зуркыт

Пичи Пургалан но Кечолын выль пуктэм коркаосъя туж трос юанъёс кылдӥзы. Куд-огез юртъёс улыны ярантэмесь.

— Пургалась кивал-тӥсьёслы косэмын вал шараям шекъёсты тупатон борды кутскыны, — шуиз Александр Бречалов, — но та куронэз ваньзы валаллямтэ. Уж борды гижысь-пиньысь басьтӥськем интые, кутскизы янгыш муртъёсты утчаны. Ми, пе, ӧвӧл, кин ке мукетыз та понна кыл кутыны кулэ…

Али Пичи Пургалан пыр-поч эскеронъёс мыно. Вань ини бадӟым кивалтӥсьёс вылэ ӝутэм уголовной ужъёс но. Александр Владимирович пусйиз: чиновникъёсын сэрен огшоры калык курадӟыны кулэ ӧвӧл.

Нялтас вераса, паймытэ Александр Бречаловлэн котькуд ужпумъя меӵак но шара вераськемез,  котькуд умойтэм учырез со ачиз эскерыны тырше. Со гинэ ӧвӧл, отысь потыны аспӧртэм амалъёс шедьтэ. Кылсярысь, Сарапул ёросысь Симонихаын кылдэм югдур сярысь тодэммы бере 2 толэзь но ӧз ортчы на, татын улон тупатскиз, шуыны луэ. Но А. Бречалов Сарапул сярысь ӧз вунэты, югдурез ялан син азяз возе. Шуэ: татын нырысьсэ улонэ пыӵатэмын луоз  куашкан калэ вуэм юртъёсысь калыкез выль интые выжтон сярысь интыысь программа. Со дыре ик кивалтӥсь воксё пайме куд-ог эрказмемъёслы.

— Куд-ог семьяос дан поттыны кутскизы. Азьвыл пичи сэрегзы интые вӧл-вӧлзэгес дэмласьком но, таиз но соослы уг тырмы, эшшо, пе, бадӟымезгес кулэ. Тазьы вырыны мон нокинлы уг сёты! — алӥз Александр Бречалов.

Тӧролэсь ужзэ быдэсъясь шутэтскон нуналъёсы но ужа, калыкен пумиськылэ, пӧртэм кенешъёс радъя. Юрттӥсьёссэ но бызьылытэ. Пусъе: азьланяз но пыр-поч ужалоз калыклэн вазиськонъёсызъя. Соин ик ёросъёслэн йыръёссы чырмытгес луэмын. Ма, тани Пургалан но тыпыр-тапыр кутскизы ни урод пуктэм юртъёсты тупатъян борды.

Елена Миннигараева

Туспуктӥз Э. Карипов

Удмурт Дунне
By Удмурт Дунне 22 мая, 2017 14:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<