Фома Ермаков: Усьтӥськем но усьтымтэ

Удмурт Дунне
By Удмурт Дунне 5 мая, 2017 09:48

Фома Ермаковлэн огез берпуметӥез туспуктэмез. Лэсьтэмын 2012-тӥ арын.

Фома Ермаков  тодосчилэн улон сюресэз сярысь нимысьтыз книга гожтыны луысал. Тодамы ваёмы куд-ог вакытъёссэ гинэ.

Киросатаез — Мункачи

Фома дунне вылэ ноку ӧй вордӥськысал, вылды, ас вакытаз Венгриысь тодосчиос солэсь атайзэ быронлэсь ке  ӧй утьысалзы. Та учыр сярысь ачиз Фома Кузьмич 2001-тӥ арын «Удмурт дунне» газетын тазьы мадьылӥз:

— Атае Кузьма Иванович Герман ожмаськонэ пыриськиз. Огпол сое мукет солдатъёсын ӵош Карпат гурезе выжтӥллям татысь сюресэз утён вылысь. Но командирзы ваньзэсты вузам. Озьы быдэс частьсы, огпол но ыбытэк, тушмон ки улэ шедем. Соосты цемент поттон заводын ужатӥллям. Атае 4 эшеныз ӵош пегӟыны быгатэм. Но кыдёке вуиллямтэ. Бадӟым дог пуныос сутыса 3-зэ эшсэс кесяллям. Атае писпу йылэ тубыны вутскем. Бӧрысь озьы ик бырысал ни, дыр, но тапала кемдэм Бернат Мункачи. Солдатъёслэсь удмурт луэмзэс тодыса, мозмытыны быгатэм, интыысь помещикъёс доры интыям. Кузёзы соосты ӟеч ужамзы понна гажам, аслаз кадь карем. Бертон сюрес вылазы удмуртъёсмылы быдэн 3 кило нянь, мукет сиён-юон сётыса келям.

Бернат Мункачи — тодмо мадьяр тодосчи, удмурт фольклорез бичаз, дунъяз. Нырысетӥ дунне ожмаськон дыръя пленэ шедем удмурт солдатъёслэсь кырӟан-веранъёссэс плёнкае гожтыса кельтӥз. Европалы удмурт калыклэсь аспӧртэмлыксэ, чеберлыксэ усьтӥз. Озьы сое Фома Ермаковлэн киросатаез шуыны луэ.

Атай понна кыл кылон

Ермаковлэн анаез но атаез семья кылдытӥллям вылэм ни 1912-тӥ арын. Но атаез ожмаськонъёсы, пленэ шедьылэмен, тифен висемен, Фома вордӥськем ай, 15 ар ортчыса гинэ.

— 1929-тӥ арын атае колхозэ пыриз. Ӝоген сое, сюлмысь тыршемзэ но ӟеч тодон-валанзэ санэ басьтыса, колхоз правленилы секретаре бырйизы, — тодэ ваёнъёсаз вера Фома Ермаков. —  Огъя ваньбурез тус-тас карисьёсын, лушкаськисьёсын курдатэк нюръяськылӥз. Озьы уноеныз вожвыл луиз. Уродъяськисьёсыз (пӧлазы сельсоветлэн но колхозлэн тӧрооссы), коркаед бадӟым шуыса, 1934-тӥ арын апреле атайме кулаке гожтӥзы но палэнэ келязы. Юри озьы лэсьтэмзы вуоно араз шараямын вал. Та пумысен Удмуртиысь ЦИК нимысьтыз постановление кутӥз. Но умойтэм учырлэн бервылъёсыз кема шӧдӥськизы на, семьямы уно курытсэ веръяно луиз. Атаймы Горькийын но Можгалась «Дубитель» заводын ужаз. Юртмес но, мукет ваньбурмес но талазы. Милемыз дораз улыны басьтӥз атаелэн агаез. Со аре мынам школае мынон дыры вуиз, но кулак пи шуыса, ӧз басьтэ. Но мон лыдӟиськыны но, гожъяськыны но 5 арескысен быгатӥсько ни вал.  Со понна тау Илья Васильевич Ларионов дышетӥсьлы. Ларионов ик мон понна дурбасьтӥз: Сталин верамъя, нылпиос анай-атайзы понна кыл уг куто, шуиз. Сое кылзӥзы. Тодон-валанъёсме эскеремзы бере директор Иван Васильевич Пьянов соку ик 3-тӥ классэ пуктыны медэ вал, но Илья Васильевич алӥз: бадӟымгес пиос вожъяськозы, ултӥялозы. Зэмен ик «кулак пи» кушем ним пырак, мукет гуртэ выжытозямы, бордам лякиськыса улӥз.

Студентъёсын.

Пичи дышетӥсь

Нырысетӥ классысен ик пияш нимын-тулын тодылӥз партилэсь секретарьёссэ, вань комиссаръёсты. Пӧртэм партийной постановлениосты, со вакытысь бадӟым адямиослэсь ужъёссэс учкытэк вераны, пе, тодӥсько вал.

Пичи Фомалэн йырвизьмызлы паймыса, школалэн директорез Иван Васильевич Пьянов сое ӵемысь бадӟым классъёсын дышетскисьёс доры ӧтчалляз, партилэн азьветлӥсьёсыз но комиссаръёс сярысь мадьыны курылӥз.

— Нырысетӥ классэз йылпумъякумы, «Песня о Роланде» книга кузьмазы, — тодаз вае  Фома Ермаков. —  Со мыным туж дуно луиз, киысьтым ик ӧз усьылы. Кӧня ке дыр ортчыса, мон сое быдэскынзэ кылысь кылэ, чик учкытэк, вераны тодӥсько ни вал. Нош собере школа библиотекаямы номыр лыдӟымтэез ӧз кыльы ни кадь. Дышетӥсьёсы асьсэ книгаоссэс сётъяллязы ни.

Трос лыдӟиськем сяна, Фома Кузьмич творчество удысэ но кыстӥськиз, кылбуръёс гожъяны кутскиз. Огзэ «Пионерская правда» газетэ ыстӥз. Но отысь гожтэт вуиз: муртлэсь ужзэ, пе, асэстэмед. Пияшлы дурбасьтыса, яратоно дышетӥсез  Илья Васильевич Ларионов газетэ ачиз гожтоно кариськиз.

5 ыж яке стипендия?

Удмурт нылкышно трос шуг-секытъёсты чиданы быгатэ. Озьы ке но кулаке поттэменызы сэрен шугадӟонъёс, лек кылъёс Фомалэн анаезлэсь тазалыксэ лябӟыто но, со 1940-тӥ арын секыт висьыны кутске, улонысь кошке. Фомалы соку 13 арес вал. Атаез Кузьма Иванович Гурезь-Пудга гуртысь кышно вылэ пыре.

— Сюранае умой кышномурт вал, — тодаз вайылӥз Фома Кузьмич. — Монэ но, ас пиналзэ сямен ик, чик висъятэк утялтӥз.

Паймоно кадь, но литератураен сокем зол тунсыкъяськись адями дышетскыны мынэ Можгалась пудо эмъянъя техникуме. Ачиз тодосчи сое тазьы валэктылӥз:

— Дасэтӥ классэ мынӥсьёс 150 манет — 5 ыж дун — тыроно луо вал, нош техникумын дышетскисьёслы стипендия сёто, нуналаз 2 пол дунтэк сюдо.

Техникумез йылпумъямзы бере вань эшъёссэ военной ветеринарияя академие басьто, нош Фомаез, «витьёслы» гинэ дышетскиз ке но, гуртэ келяло. Мугорыд но, арлыдыд но пичи, пе. Фома Ермаков соку 44 кило гинэ кыске вылэм, ӝуждалаез — 155 сантиметр. Кӧтыз ӝож луыса, пияш артиллерияя училищее пырыны выриз на. Тазалыкез ляб шуыса, кутӥллямтэ. Озьы вуоно тодосчи 1944-тӥ арысен пудо эмъясьын ужаз. Но азьланяз дышетскон сярысь малпанъёс йырысьтыз ӧз кошкылэ.  Кӧня ке ар ортчыса, пияш Удмурт пединститутысь удмурт кылъя но литературая факультетэ пыре. Выль эшъёсыз со котырын гуж бергало вал, Фома Ермаковлы ик оскизы студентъёслэн профкоменызы кивалтыны.

тужгес но трос ужаз тодосчи К. Гердлэсь нимзэ берыктон бордын. Нялтас вераса, пединститутын дышетскыкуз, 1920-тӥ — 1930-тӥ аръёсысь удмурт писательёс сярысь номыр ӧз вераллялэ. Гердлэн нимыз но удмурт интеллигенцилэн йырысьтыз быдэсак ӵушемын вал.

Куасазы, но ӧз чигтэ

Пединститутэз йылпумъяса, вуоно тодосчи ужаз Алнаш ёросысь Варзи-Ятчи школаын, собере удмурт издательствоен кивалтӥз. Нош УдНИИ-ын ужакуз ини, рос-прос басьтӥськиз наука борды. Нырысьёсыз пӧлын пыртэмын вал Писательёслэн огазеяськоназы, ӝоген филология наукаосъя кандидат луиз. Со рос-прос эскериз М. Петровлэсь, Г. Медведевлэсь, Т. Архиповлэсь, С. Самсоновлэсь улон сюрессэс но творчествозэс, оглом удмурт литературалы сӥзем кӧня ке пӧртэм книгаос поттӥз.

Ӵапак Фома Ермаков Санкт-Петербургысь Салтыков-Щедрин нимо библиотекаысь шедьтӥз М. Худяковлэсь ӟуч кылэ берыктэм удмурт эпоссэ. Но тужгес но трос ужаз тодосчи К. Гердлэсь нимзэ берыктон бордын. Нялтас вераса, пединститутын дышетскыкуз, 1920-тӥ — 1930-тӥ аръёсысь удмурт писательёс сярысь номыр ӧз вераллялэ. Гердлэн нимыз но удмурт интеллигенцилэн йырысьтыз быдэсак ӵушемын вал.

— Гердлы тушмонасьёс, партилы пумит мынӥськод карыса, монэ КПСС-ысь куштӥзы, ужысьтым уллязы. Тазьы дауртэмзэс Москваын янгышен лыдъязы но партбилетме берыктытӥзы. Но уродъяськисьёс УдНИИ-е но, Удмурт кун университетэ но ӧз лэзьылэ, — «Удмурт дунне» газетын тодаз вайылӥз Фома Ермаков. — 1984-тӥ арын гинэ ӟеч муртъёс юрттэмъя Дышетӥсьёслэсь тодон-валанзэс будэтонъя институтэ интыяськи.

Фома Кузьмичлэн нимыз удмурт литератураын но, оглом удмурт движениын но кызьы ке нимаз висъяськыса кадь сылэ. Паймоно: кызьы сомында лэсьтыса вуттӥз? Наукая 407 статьяез 22 пӧртэм кылын печатламын, пыремын Бадӟым Советской но мукет энциклопедиосы, 14 монографиез. К. Гердлэсь ужъёссэ люкаса 6 томен поттӥз. Тодосчи наука пушкын гинэ ӧз улы, пӧртэм огазеяськонъёслэн ужазы пыриськиз, Советской Венгриен эшъяськонъя обществолэн Ижысь ёзэныз 10 ар пала кивалтӥз, Информатизацияя калыккуспо академилэн академикез вал но трос мукет. Школаос понна удмурт литературая программаос гожъяз, пособиос кылдытъяз. 300 пала статьяосыз Совето Союзысь но кунгож сьӧрысь газетъёсын печатламын. Ужъёссэ дунъясьёс пӧлын быдэс дуннелы тодмо муртъёс — Дмитрий Лихачёв, Корней Чуковский, венгеръёс Давид Рафаэль Фокош-Фукс, Иштван Керам, Тибор Кланнилен, Петер Домокош. Но оглом учконо ке, туннэ нуналлы Фома Ермаковлэн удмурт литератураын интыез рос-прос дунъямтэ, эскерымтэ на.

Елена Миннигараева

Туспуктӥз Владимир Беломорских

Удмурт Дунне
By Удмурт Дунне 5 мая, 2017 09:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<