Александр Волков кортӵог кадь вал

Удмурт Дунне
By Удмурт Дунне Май 24, 2017 12:55

 

Удмуртилэн нырысетӥ  президентэныз Александр Волковен артэ туж матын ужамын Кун Думалэн  азьвыл депутатэз Николай Мусалимов. Сое со котьку туж вылӥ дунъялляз, аслаз дышетӥсеныз лыдъялляз.

Николай Мусалимов: Александр Волков кивалтэм улсын 31 ар ужай, со пӧлысь 14 но ӝынызэ — секретариатэзлэн кивалтӥсез луыса.

— Александр Александровичлэн улонысь кошкемез мон понна — зэмос кайгу, — шуэ Николай Николаевич, — угось мон сое туж матысь тодӥсько вал. Солы луыса мон сыӵе, кыӵе вань. Со кивалтэм улсын  31 ар ужай, со пӧлысь 14 но ӝынызэ — секретариатэзлэн кивалтӥсез луыса.

— Ӝыны арзэ но лыдъяськоды…

— Конешно, чик кисыратэк верасько: Александр Волков бордын ужан — со бадӟым дан вал. Тодэ ваёнъёс туж трос,  мар бордысен кутскыны ик паймод. Александр Александрович кортӵог кадь сямо, чупрес, йӧно, учкымон, лэчыт кыло вал — сыӵе, кыӵе луыны кулэ зэмос кивалтӥсь.

Анайзэ, Александра Кузьминичнаез, туж  яратэ вал, но Александр Александрович сое ватыны ӧз быгаты,  ачиз кылле ни вал, шуизы. Ӵош ик кошкизы… Вить нунал гинэ вис луиз. Тодӥсько на, Александр Александрович  президент быръёнын вормиз шуыса тодӥз но нырысь ик анаезлы жингыртӥз. Александра Кузьминична солы визь-нод сётӥз: калык оскиз бере, табере  ӟеч ужа, жадьытэк тыршы, нош  тушмонъёсыдлы пунэмзэ берыктыны эн выры. Аслэсьтыз но семьязэ туж гажалляз, зэм, ӵош луыны туж ик ӧз кылдылы — 7 но ӝыныен ужын ни, 21 но ӝыныен — ужын на.  Кӧлыны  гинэ бертылӥз. Но шутэтскон нуналъёсы  котьку ваньзы огазьын вал. Тросэз уг оско, со ачиз корка пуктӥз шуыса, но со зэм но озьы. Куинь гужем отпускъёсаз, вань ӵыжы-выжыоссэ люкаса, лэсьтӥськиз, ачиз гинэ ӧвӧл, пиез но кирпич тыриз. Анаез но со вакыт татын  пӧраськыса улӥз,  гаражаз маке кузьда ӝӧк пуктэмын вал, отын ик сиськылӥзы.  Монэ паймытъяз солэн  зэмос кузё луэмез. Соку со Министръёслэн Советэнызы кивалтӥз ни, но уксёзэ ӧз пазя, тодӥсько на, стройматериал но толалтэ дася вал, гужем дуноялоз шуыса. Лэсьтӥськись луон вираз пыӵамын вал. Бадӟым объектъя проектъёсты ачиз лыдӟыса потылӥз, маке ӧз ке яралля, тупатъятылӥз но.  Шонер.

Туж кужмо вал, зэмос нюръяськись. Тани тодам вайисько, кызьы  90-тӥ аръёсы вылысьтыз вылаз ортчылӥсь пикетъёсы со калык азе огназ потаз, мукет кивалтӥсьёс  палэнскылӥзы. Нялтас вераса, соку ведь охранаез но ӧй вал,  тыбыр сьӧраз мон огнам сылӥсько, кытӥ ке 2 милиционер ветлэ на… Собере Москвае кошке, лумбыт  пенсия-пособие тырыны коньдон поттыны выре. Самолётэн  соку Набережной Челныысь лобано вал, отысь  Иже 4 часын ӵук пал  вуэ но 7 часын — нош уже. Но огпол но  ӝожтӥськемез ӧвӧл.

Лек висён бордаз ӝабырскиз шуыса тодӥ но юано кожай. Со паль гинэ потӥз: йырсие будоз, нош отӥыз ваньмыз умой.

— Супыльтылӥзы, удмурт гуртъёсын сиён-юон веръяны кышкалляз, ведналозы шуыса…

— Токма зулён со, ноку но урод верамез ӧвӧл, ма, кышкасал ке, дояркаосын ӵош фермаосын чай ӧй юысал. Со ведь туж яратылӥз гуртоосты, огшоры ужась калыкез. Но азьтэмъёсты йӧттылӥз.  Ӧз гажалля, солэсь косонзэ ӧз быдэсъялэ ке. Вӧсь луэмзэ ӧз возьматъя, куке сое вузаны турттылӥзы.

Нош кыӵе усто политик вал. Со кыл шедьтылӥз котькинэн! Тодады вае ай, кин но ӧз вуылы шаерамы со кивалтон вакытэ: Б. Ельцин, В. Черномырдин, В. Путин — кӧня ке пол. Министръёсты-кинэ уг но вераськы ни. Со  нырысь ик возьматэ кусып тупатыны быгатэмез.

Нош ик тодэ лыктэ 1995-тӥ ар. Соку ведь нокыӵе политтехнологъёс-кинъёс ӧй вал,  быръён азьын калыкез ӝуткаса,  ӵошен ветлӥм, шуыны луоз. Нуналлы быдэ кӧня ке пумиськон! Кыӵе ке гуртэ-хозяйствое потӥськом — ваньзэ азьло ик тодыны тырше, машинаын ноку тэк пукемез ӧвӧл, весь лыдӟиське, лыдпусъёсты эскере. Министръёслэн Советэнызы кивалтӥсе 2 кандидат «ожмаськиз». Сессилэн нырысетӥ нуналаз куараос шори люкиськизы: 50Х50. Одӥг куара ӧз тырмы! Но Александр Александрович та борды юн кырмиськиз — уй ӵоже со эшшо кӧня ке муртэ ас палаз берыктӥз. Вормиз. Бӧрысь со оппозициысь кужмоосэс адямиосты  командаяз басьтӥз — быгатэ вал  визез, сямез дунъяны.

Котьку вал кадь ужалляз. Малпасько, 2014-тӥ арын интыяз кельтысалзы на ке, улысал но, ужасал но.  Та учыр сое туж зол шуккиз, малпасько, но соку но туж юн возис ькиз, мылкыдзэ ӧз возьматы. Бен,  келязы  Федерация Кенеше, но А. Волков понна со тырмыт ӧй вал, солэн потылӥз шаерамы ужамез. Соин ик  пыриськиз на «Огъя Россилэн» али ортчись праймеризаз, озьыен, оскылӥз, висёнзэ вормоз  шуыса…

Зинаида Рябинина

Туспуктэм басьтэмын «Удмурт дунне» газетлэн архивысьтыз

Удмурт Дунне
By Удмурт Дунне Май 24, 2017 12:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<