Шаерамы улӥсьёс ӵемгес ӝожтӥсько ЖКХ пумысен

Удмурт Дунне
By Удмурт Дунне Апрель 11, 2017 11:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удыслэн урод ужамез, улон интылы ёрмемзы пумысен. Та сярысь вераз Адямилэсь правооссэ утёнъя уполномоченной Вениамин Соломенников.

Черод уз вуы,   10 ар ортчыса но?

Кылем ар ӵоже уполномоченной доры 1 сюрс 441 вазиськон-ӝожтӥськон вуэм. Со пӧлысь улон интыен герӟаськемын ог ньыльмос люкетэз. Адямиос паймемын тыллы, вулы дунъёслэн укыр бадӟым луэмзылы, уг кулэсмо сирота кылемъёс пӧлын улон инты сётэмзэс аръёсын возьмасьёс, куашкан калэ вуэм сэрегъёсын векасьёс но мукет. Кылсярысь, Кез ёросысь трос нылпиё семья кӧня ке аръёс ӵоже ни ёрос администрациысь дунтэм улон инты басьтон понна черодын сылэ.

— Администрация валэктон сётӥз: та семья черодын 43-тӥ интыын, оскон ӧвӧл, матысь 10 ар куспын улон интызэ выльдыны быгатоз шуыса, — пусйиз В. Соломенников.

Зэм, тросаз ёросъёсын шуге-леке вуэм семьяослы юрттон амалъёс шедьто ик.  Шуом, Шаркан ёросысь ик семьялэн коркаез ӝуаз. Озьы 2-тӥ группаен инвалидлы но солэн семьяезлы ёрос администрация  20 арлы 7 процентъем кредит висъяз.

Оскон вань, Иж город администрация но Ленин ёросын улӥсьёслэсь сюлмаськонзэс валалоз шуыса. Отын крематорий усьтӥськыны кулэ вал. Но Ленин ёросын улӥсьёс, правооссэс утьыны курыса, вазиськизы уполномоченной доры — крематорий усьтӥськиз ке, тазалыксылы, улонзылы кышкытлык кылдыны быгатоз  шуыса.

—  Крематорий городлы кулэ,  — шуиз В. Соломенников. — Но сое улон коркаослэсь 10 иськемлы ке но палэнэ пуктоно.

Вал азьын уробо

Уполномоченной доры вазиськемъёс пӧлысь ог 16 процентэзлэн сюлмаськонъёсыз герӟаськемын тазалыкез утёнэн, дышетонэн, улон-вылонын юрттэт басьтонэн.

— Калык пумит луэ оптимизацилы, — вераз В. Соломенников. — Зэмзэ но, куд-ог эмъюртъёс, школаос пытсасько, калыклэсь мылкыдзэ лыдэ басьтытэк. Жаляса верано, трос учыръёсы асьмелэн уробомы валлэсь азьло кошке. Оптимизация пумысен мон вазиськылӥ ни, кылсярысь, Россиысь Тазалыкез утёнъя министерствое. Отын валэктӥзы: ми кужмысь оптимизация ортчытыны ум куриське.

Озьы ик вань ӝожтӥськисьёс эмъясьёслэн ужамзы вылэ, нош куд-ог гуртъёсын воксё но ӧвӧл фельдшеръёс, эмъясь сузэръёс. Кылсярысь, Дэри ёросысь Хохрякиын кема ӧй вал терапевтсы, Можга ёросысь Вуж Каксялан акушерлы ёрмо.

В. Соломенников верамъя, 4 муниципал кылдытэтъёсын — Вотка городын, Красногорск, Пичи Пурга но Шаркан ёросъёсын — чакламын вылымтэ трос нылпиё семьяосысь нылпи садэ ветлӥсь пиналъёслы льготаос.

Уполномоченной дӥне вазиськисьёс пӧлын вань  кӧтӝожзэс усьтӥсьёс: кема аръёс ӵоже ужамы, пӧртэм грамотаосын пусъемын, но «Ужысь ветеран» ним озьы ик ӧм басьтэ, шуо. Тросаз учыръёсы, зэмзэ но, таӵе ним сётыны документъёссы уг тырмо. Но куд-ог дыръя йылзэ-пумзэ шедьтыны луэ вылэм. Кылсярысь, Шаркан ёросысь  нылкышно пусъемын КПСС-лэн ЦК-езлэн, СССР-ысь Министръёслэн Советсылэн но мукет данъян грамотаосын. Но грамотаосыз ыштэмын. Со сярысь гожтэмъёс кылемын на трудовой книжкаяз гинэ. Таин валче «Ужысь ветеран» ним басьтыны со быгатымтэ. Уполномоченной ӵектэмъя вазиськоно луиз судэ. Кӧня ке  дыр ортчыса, со нылкышно нош ик вуиз В. Соломенников дӥне — табере тау карыса.

Калыкез сюлмаськытӥсь ужпумъёс пӧлын тужгес секытъёсыз — спирт суретъёсын вуз карон но бадӟым процентэн кредитъёс сётъян. Соос уката шукко огшоры калыкез. Адямилэсь правооссэ утёнъя уполномоченнойлэн но ӵемысь юрттэмез уг луы.

— Та ужпумъёсты пыр-поч эскероно кивалтэтын, законъёс кутоно, — шуиз Вениамин Васильевич. — Сотэк югдурысь потонэз уг адӟиськы.

Уполномоченной бордын ужало кужмо юристъёс, котькуд учырез тыро-пыдо эскеро.

Юрттэт курыса, вазиськыны быгато вань мылкыд карисьёс 91-31-21 номеро телефонъя яке kmk@gossovet.udm.ru электрон адрес пыр. Юанъёстэс кельтыны быгатӥськоды редакциямы но 73-33-43 яке 8-951-195-37-60 номеро телефонъёсъя.

Элина Кумачёва

Удмурт Дунне
By Удмурт Дунне Апрель 11, 2017 11:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<