Обороналы ужась предприятиос потто эмъян, машина поттон, лэсьтӥськон но мукет удысъёслы вузъёс

Удмурт Дунне
By Удмурт Дунне Апрель 24, 2017 12:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сарапулысь электрогенераторной заводын ортчиз Кун Кенешысь ялан ужась комиссилэн заседаниез.

Обороналы ужась предприятиос поттыны кулэ нуналмысь улонлы чаклам вузъёс но — таӵе курон пуктэ Россилэн Президентэз В. Путин. Кызьы со быдэсъяське Удмуртиын?

Элькунамы ӧжыт ӧвӧл обороналы ужась предприятиос. Туннэ нуналлы поттэм вузъёссы пӧлысь 22 процентэз чакламын ни эмъян, машина поттон, лэсьтӥськон но мукет удысъёслы. Но 2030-тӥ арозь та лыдпусэз вуттоно 50 процентозь — Россилэн Президентэзлэсь куронзэ быдэстон понна. Вормымон-а та ужпум, кыӵе ужрадъёс кутӥсько элькунамы та понна — та юанъёс алигес эскеремын Кун Кенешысь Экономикаын политикая, промышленностья но инвестициосъя ялан ужась комиссиын. Кенешон ортчиз Сарапулысь электрогенераторной заводын. Ялан ужась комиссилэн кивалтӥсез Александр Мурашов, депутатъёс ортчизы цехъёстӥ, тодматскизы отын ужасьёсын.

Электрогенераторной завод — Сарапулысь одӥгез тужгес бадӟымез предприятие. Туннэ нуналлы 400 пала пӧртэм вузъёс поттэ. Вань сюрсъёсын но, одӥг-кыкен гинэ потӥсьёсыз но. Со пӧлысь 15 процентлэсь ятырез огшоры улонын кутӥське. Кылсярысь, 60 ар талэсь азьло ни бичаны кутскизы электротележкаос. Уката ӝог кошко та заводын бичам пӧртэм пумо электродвигательёс, лифтъёслы тӥрлык, нянь котон машинаос но мукетыз. Кызьы вераз предприятилэн генеральной директорез, Кун Кенешлэн депутатэз Сергей Мусинов, 2016-тӥ — 2020-тӥ аръёс ӵоже татын 2 поллы йылэтыны чаклало улонын кулэ луись тӥрлык поттонэз. Озьы обороналы заказъёс кулэсмизы ке но, электрогенераторной завод ужтэк уз кыльы.

— Малпасько, та малпанмы быдэстонтэм ӧвӧл, — шуиз Сергей Мусинов. — Улон ачиз куре ужмес выль сямен радъяны. Угось кызьы алэ Владимир Путин, обороналы заказъёс азьланьын кулэсмыны быгатозы. Озьы луиз ке, предприятиосты утёз огшоры вуз поттон.

Кун Кенешысь ялан ужась комиссилэн кивалтӥсез Александр Мурашов пусйиз: предприятиос азинлыко мед ужалозы, улонын кулэ луись вузъёс тросгес мед поттозы шуыса, кылдытоно законъёс.

— Кун Кенеш та сярысь сюлмаське, тае пусъе Москва но, — шуиз со. — Берло дыре гинэ юнматэмын предприятиослы юрттэт сётонъя пӧртэм программаос, нимысьтыз саклык висъяське кунлэн но ужбергатӥсьёслэн проектъёс бордын уртче ужамзылы. Моногородъёслы сӥзем программа азинлыко ужанлы инъет луэ. Нош туэысен куд-ог моногородъёс ӝог азинскись территориос пӧлы шедьыны быгатозы, соку отчы лыктӥсь инвесторъёслы пӧртэм льготаос тупатӥськозы. Таӵе луонлыкез кылдыны быгатоз Сарапуллэн.

Промышленной предприятиослы кун ласянь юрттэт сётон пумысен вераськиз промышленностья но вуз каронъя министрлэсь ужзэ быдэсъясь Владимир Разумков но. Сыӵе программаос ӧжыт ӧвӧл Россиын но — асьме предприятиослы дӥсьтысагес асьсэды возьматоно палэнын, чырмытгес пыриськоно пӧртэм кун программаосы.

Та нуналэ ик Сарапулысь электрогенераторной заводын бырйизы тужгес устооссэ токарьёсты, фрезеровщикъёсты, станок тупатъясьёсты но обмотчицаосты. Вожвылъяськонын быгатонлыкъёссэс возьматӥзы 50-лэсь ятыр специалистъёс.  Вормисьёс басьтӥзы дуно кузьымъёс, озьы ик будэтэмын вал разрядъёссы. Заводлэн кивалтӥсьёсыз верамъя, таӵе нюръяськон туэ 15-тӥ ползэ ортчиз, сӥзизы сое предприятие кылдэм дырысен 75 ар тырмонлы.

Элина Кумачёва

 

Удмурт Дунне
By Удмурт Дунне Апрель 24, 2017 12:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<