Мон — инженер! Кызьы интыяськоно бадӟым заводэ ужаны

Удмурт Дунне
By Удмурт Дунне Апрель 6, 2017 13:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кизнерын вордскем но быдэ вуэм удмурт пияшлы Андрей Семёновлы 26 арес гинэ ай, но со 5-тӥ арзэ ужа ни Ижысь «Аксион-холдинг» заводын. Али со инженер-технолог. Заводын ужаны луонлык кылдӥз, Ижысь техникая кун университетэ дышетскыны пырыса.

А. Семёнов «Аксион-холдинг» заводын ужаны кутскиз, ИжГТУ-ын дышетскыкуз ик.

— Школаез йылпумъяме бере кытчы дышетскыны пырон сярысь кема ӧй малпаськы, — шуэ Андрей Сергеевич, — вамыштӥ Ижысь техникая кун университетэ. ЕГЭ-осъя баллъёсы умоесь вал, документъёсме сётӥ 4 факультетэ, огез соос пӧлысь — металлургиын но машина лэсьтонын туала технологиос. Отчы конкурс пыр потӥ шуыса тодӥ но, мукет факультетъёс сярысь вунэтӥ, малы ке шуоно пичи дырысеным ик машина лэсьтон туж тунсыко потэ вал. Анай-атае выль шудон басьто ке, нырысь мон сое сэрттылӥ: выж вылэ вань детальёссэ радэн-радэн тырылӥ, собере выльысь бичалляй. Ӵемысь детальёсы мултэс кыльылӥзы, но шудонэ ужалляз, соин аслым зэмос конструктор потылӥ: машинаысь мултэссэ утялтыса, сое мон умойгес гинэ карисько кадь.

Факультетэ дышетскыны пырем бере собраниысен тодӥ, пӧламы «целевикъёс» но вань шуыса. Соос заводэн огкыл гожтӥллям, заводлы кулэ луись специальностья дышетскозы шуыса. Озьы но улондэ радъяны луэ вылэм.

Собраниямы ветлӥзы заводысь ужасьёс, экзаменъёсты вылӥ баллъёслы сётэм муртъёслы (соос пӧлын мон но), огкыл гожтыса, практикаез но, дипломез но заводлэн уженыз герӟаны ӵектӥзы. Со понна дышетсконмес йылпумъяммы бере милемлы отын ужан инты дасямын луоз ни, пе.

Дышетскыны пырыкум, рос-прос ӧй малпаськы вал, кытын ужало шуыса. Ижын заводъёс трос, кудаз ке но кутозы, малпай. Но собраниысен  валай, 4 ар возьматэк, али ик улонме радъяны, ужан инты шедьтыны быгатӥсько шуыса — гожтӥ заводэн огкыл.

Али чик но уг жаляськы, улонме заводэн герӟай шуыса. Ужасько огаз цехын, лэсьтӥсько ож но граждан машинаослы тупась электроникаез. Ас киыныд лэсьтэм быдэс арбериез уд ке но адӟиськы, валаськод, космосэ лобась, оборонаын кутӥськись машинаосты лэсьтонын мынам но тыршеме вань. Заводын егит специалистъёс пӧлын арлы быдэ научной конференция ортчылэ, 2016-тӥ арын мон детальёсты умоятон но дунтэматон проектэным 3-тӥ инты басьтӥ. Озьыен, татын егитъёс быгато выльзэ малпаны, азьвылзэ умоятыны, ялан дышетскыны.

Нялтас вераса, Удмуртиын вылӥ образование сётӥсь дышетсконниос пӧлысь техникая университет гинэ пыриське военно-промышленной комплекслы ужасьёсты дасянъя кун программае. Солы луыса техникая университет юн кусып возе Россиысь но Удмуртиысь 50 пала заводъёсын но предприятиосын, соос пӧлын Ижысь «Калашников» концерн, «Аксион-холдинг», «Купол», радиозавод, Сарапулысь радиозавод, «Элеконд» завод, Воткаысь радиозавод. Вылаз ик, куд-ог заводъёс ӟеч дышетскись студентъёслы стипендия тыро.

Ижысь техникая кун университетын 12 факультет, татын 53 ӧръя (направлениея) дышето, со пӧлысь 18 процентэз — заводъёсын огкыл кутыса (кылсярысь, машина лэсьтонъя, математикая но естественной наукаосъя, ӟечлыкен кивалтонъя (управление качеством); машина, автомобиль лэсьтонын, андан ӵыжатонын туала технологиос; прибор лэсьтон; информатика но вычислительной техника факультетъёс).

Сергей Захаров

Удмурт Дунне
By Удмурт Дунне Апрель 6, 2017 13:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<