Кызьы уло Сарапул ёросысь Симонихаын

Удмурт Дунне
By Удмурт Дунне 14 апреля, 2017 12:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Малы нянь ӧд вае?»

«Калык фронтысь» азьветлӥсь Алексей Серебренников Россилэн Президентэзлы Владимир Путинлы юан сётэмез бере Сарапул ёросысь Симониха гурт быдэс кунлы тодмо луиз. Кылем арняе отчы вуылӥз Удмуртилэн Тӧроезлэсь ужзэ быдэсъясь Александр Бречалов.

Удмуртилэн Тӧроезлэсь ужзэ быдэсъясь Александр Бречалов калыкен пумиське.

Сарапулысь шормуӵСимониха Сарапуллэн оглюкетэз луэ. Но отчы ӝог гинэ уд сюры, уго соосты люке Кам шур, выжзы ӧвӧл. Симонихае вуон понна сопал ярдуре потоно: мыноно Камбарка пала, выжоно али пуктэм выж вылтӥ. Озьы котыр сюрес 40 иськем пала луэ.

60-тӥ — 70-тӥ аръёсы Симониха туж бадӟым посёлок вал, отын улэм-вылэм ог 3 сюрслэсь уно адями. Соку Кам кузя ветлӥсь судноосты тупатъян-выльдон понна татчы база усьтӥллям, ӝутӥллям трос квартираем юртъёс, сад, школа, эмъюрт, магазинъёс, пионер лагерь но усьтӥллям… Базаез пытсаллям 90-тӥ аръёсы, уж быриз, сюрес вунӥз. Кам шур вамен плотина лэсьтӥзы но, тулыслы быдэ посёлокез ву ньылылыны кутскиз. Али татын, тылзы сяна, номырзы ӧвӧл. Шунтӥсько, гур эстыса, нянь пыжо, сиён-юон ог 2 толэзьлы басьтыса дасяло, ву вортто колодчаысь. Но кылем арын экспертиза возьматӥз: сое юыны уг яра.

Александр Бречаловен ӵош Симонихае потӥзы Сарапул городлэн йырыз Александр Ессен, шаермыя валтӥсь федерал инспектор Дмитрий Мусин, журналистъёс. Вуимы Ершовкае. Татын милемыз возьма «КамАЗ». Симонихаозь эшшо ог 7-8 иськем на. Лымы шунаны кутскемын, Кам вырӟемын, сюрес ӧвӧл. Война вакытэ Ленинградын сямен, «улон сюрес» татын кылдэ толалтэ гинэ — кынмем Кам вылтӥ.

Писпуос пыр адӟиськизы нырысетӥ юртъёс.

— Куштӥськем больница, школа, магазин, — вӧзтӥмы ортчись тӧдьы из коркаосты адӟыса, вера Алексей Серебренников.

— Кылем арын тылпу вал, ӵукна гараж ӝуаны кутскиз, — шуо гуртоос. — Пожарнойёслы жингыртӥм, лыктомы, пе. Асьме кужымен, кытысь но отысь ву омыръяса, тылпуэн нюръяським. Каме уд васькы — ярдурез меӵ. 40 минут ортчыса, пожарнойёс вуизы, ми со вакытэ кысӥм вал ини. Тулыссэ но сӥзьылзэ ми доры «скорой» пырыны уг быгаты. Огпол ӧтим вал, кӧня ке улыса, жингыртӥзы, шур вамен поттыны быгатӥды ке, юрттомы, ӧд ке, ум, шуизы. Табере ум ни ӧтчаське.

Кам тани тудӟоз но Симонихаез котыртоз, гуртоос 2 толэзьлы шормуӵе кылёзы.

Советской урам, 14 «а»: трос квартираем юрт, укноосыз тэшкамын, борддоръёсыз кырыжамын. 4 арзэ ни та юрт аварийной лыдъяське. Бадӟым кивалтӥсьёсты адӟыса, вань гуртоос — 38 мурт — та коркалэн азбараз люкаськизы. Алексей Серебренниковез адӟыса, шумпотӥзы: «Ми сое тодмаськом ни. Тау тыныд, Алексей!»

Санкт-Петербургын ортчем пресс-конференциын Сарапулысь журналист Алексей Серебренников Россилэн Президентэзлы Владимир Путинлы юан сётӥз: азинтэмын луоз-а куашкан калэ вуэм юртъёсысь улӥсьёсты выль коркаосы выжтонъя федерал программа. Туэ та программа йылаз-пумаз вуэ ни. Нош Сарапул ёросын гинэ 292 адями куашкан калэ вуэм 21 коркан улэ.

— Мон татын 37 ар улӥсько ни. Вӧзамы пересьёс гинэ. Егитъёс уз быгатэ татын улыны: сад но, школа но, уж но ӧвӧл, — вера Любовь Реснина.

Гуртоослэн Симонихаысь кошкемзы уг поты, гужемзэ татын туж шулдыр: ныр улын Кам бызе, вӧзын ӟыгыртонтэм бадӟым тыпыос будо. Улон инты но уж гинэ мед луысал.

Но Сарапул карлэн йырыз Александр Ессен вераз, Симонихаез возьыны толыкез уз луы. Калыкез выль улон интые выжтоно.

Таӵе 9 юртъёс Симонихаын аварийной лыдъямтэ на.

Дасьсэ возьмано ӧвӧл, асьмелы лэсьтоно!

Но Симонихаын улӥсь-ёслы али выль улон инты сётыны уг луы — уго тросэзлэн ӧвӧл улон интызылы документъёссы.

— Ми улӥськом муниципальной квартираосын. Азьвылгес куд-огезлэсь документъёссэс бичазы, выль корка сётомы шуыса, берен ӧз берыктэ ни. Мукетъёсызлэн документъёссэс адӟылэмзы ик ӧвӧл, — верало гуртоос. — Администрацие мынӥськом, соос милемыз судэ ысто, суд — мукет азе, отысь — эшшо кытчы ке… Йылыз-пумыз ӧвӧл.

— Ми юрттом юристъёсын. Соос тӥледлы юрттӥськозы документъёстэс бичаны, судэ вазиськыны. Ваньмыз со дунтэк, — калыклы вазиськиз Александр Бречалов. — Та югдурез чаклалоз Алексей Серебренников, марысь-мар ке, шонерак мыным жингыртоз. Но тӥледлы асьтэлы но вырӟыны кулэ, документъёстэс чалякгес бичано, сотэк ужпумез интыысьтыз вырӟытыны ум быгатэ.

Симонихаысь Сарапулэ вуыса, Александр Бречалов соку ик ёрос управлениосысь кивалтӥсьёсты котырес ӝӧк сьӧры люказ. Соос кенешизы, кызьы юрттоно Симонихаын улӥсьёслы.

— Мынэсьтым нырысьсэ юазы: со быдӟа машинаен лыктӥды но малы нянь ӧд вае. Калык понна ужано, калык понна улоно. Ми ӧжыт уждун ум басьтӥське, нош кытын ке калык сютэм пуке, — пусйиз Александр Бречалов. — Федерал программаослэсь улонэ пыӵамзэс возьмано ӧвӧл, элькунысь луонлыкъёсты утчано. Малпасько, арня ортчыса, ми асьмеос программа дэмлалом, кызьы куашкан калэ вуэм коркаосын улӥсь адямиослэсь шуг-секытъёссэс сэрттоно-пертчоно.

Мария Векшина

Туспуктӥз Э. Карипов

 

 

 

Удмурт Дунне
By Удмурт Дунне 14 апреля, 2017 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<