Кортлэсь лэсьтэм калык

Удмурт Дунне
By Удмурт Дунне Апрель 14, 2017 15:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ужрад йылпумъяськиз Олег Поскрёбышевлэн «Ми — кортлэсь лэсьтэм калык…» кылбуреныз.

8-тӥ апреле Ижкарысь Шор площаде 5 сюрс пала адямиос люкаськылӥзы. Киосазы — Удмуртилэн, Россилэн куншетъёссы, терроризмлы пумит плакатъёс. Озьы шоркарамы улӥсьёс Санкт-Петербургын терактын быремъёсты буре вайизы.

Шор площадьысь сцена котыре мӧйыос но егитъёс, бадӟым кивалтӥсьёс но огшоры ужась калык люкаськизы. Ужрадэ пыриськизы Удмуртилэн Тӧроезлэсь ужзэ быдэсъясь Александр Бречалов, Удмурт Элькунъя валтӥсь федерал инспектор Дмитрий Мусин, Кун Кенешлэн Тӧроез Владимир Невоструев, Правительстволэн Тӧроезлэсь ужзэ быдэсъясь Виктор Савельев, мукет кивалтӥсьёс.

— Удмурт Элькунмы быдэс Россиен огъя мылкыдын улэ, — калыклы вазиськыса, пусйиз Афган ож дыръя сӧсыр кылемъёслэн огазеяськонэнызы кивалтӥсь Сергей Морозов. — Милям огазеяськонысьтымы адямиос ӟеч тодо, мар со терроризм. Соин ик юн шӧдо тупаса улонлэсь кулэлыксэ.

Террористъёслэн валтӥсь ужпумзы — калыкез кышкатон. Макем тросгес адями быроз, тросгес вир кисьтӥськоз — сокем умойгес. Озьы 3-тӥ апреле Санкт-Петербургысь метроын пуштэм бере улонэз уриськиз 15 адямилэн. Ижысь Шор площадьын соосты нимын-тулын тодазы вайизы. Удмуртиысь Ирина Медянцева аслаз мугорыныз нылзэ утиз. Улыны кылизы солэн ас киосыныз лэсьтэм сайкыт тусо мунёосыз… Котькуд адямилэн аслаз сюресэз, аслаз шумпотонъёсыз но осконъёсыз вал. Вал… Калык, терактын быремъёсты буре вайыса, минут ӵоже шып сылӥз.

Нош мар кароно, та выллем учыръёс медаз луэ шуыса? Асьмелы сакгес луоно! Та сярысь вераз Федерацияя Кенешлэн ёзчиез, Россилэн Героез Александр Чекалин.

— Кышкытлыклэсь утиськон — со асьмелэн огъя ужмы, — шуиз Александр Алексеевич. — Подъездъёсын, азбаръёсын, ульчаосын но площадьёсын, нылпи садъёсын но дышетскон заведениосын — котькытын сак луоно. Маке умойтэмзэ синйылтӥды ке, соку ик полицие жингыртэ. Дырыз дыръя вуэм ивор быгатоз адямилэсь улонзэ утьыны.

Митингын ӟырдыт вераськиз «Удмурт Кенеш» огазеяськонлэн кивалтӥсез Татьяна Ишматова но. Асьмелэн Удмурт шаерамы 100-лэсь трос пӧртэм калыкъёс уло. Асьмеос — огъя кужым, асьмеды уз куасалтэ, оске Т. Ишматова.

— Ог-огмес ум куштӥське шуыса, вера таӵе учыр но, — шуэ Татьяна Витальевна. — Тодӥськоды, Санкт-Петербургын улӥсь удмуртъёслэн вань асьсэлэн огазеяськонзы. Соос метроын пуштэм бӧрсьы ик жингыртӥзы, Ирина Медянцевалэн Кез ёросысь Кулигае кылем ӵыжы-выжыосызлы кыӵе ке юрттэт кулэ ӧвӧл меда шуыса. Петербург — узыр историен город, война вылтӥ сомында курадӟонэз чидамын, отын калыкез ик мукет — сюлмогес-а, мар-а. Мар малпаса меда сьӧсьёс асьсэлэсь но улонзэс быдтӥзы, мукетъёслэсь но сьӧразы нуизы? Асьмеос одӥг Инмар улын ветлӥськом ук. Нокыӵе оскон но виылыны уг дышеты. Террористъёслэн ужпумзы — калыклэсь властьлы осконзэ лябӟытыны, курдатыны, квартираосамы, шырпиос кадь, ватскыса мед улом шуыса. Но асьмеос куалекъясь калык ӧвӧл.

Пичи Пурга ёросысь Улӥ Посьтол гуртын быдэ вуэм но али Ижысь огаз предприятиын ужась Константин Соловьёв политикае уг пыриськиськы, пе. Шор площаде лыктэм пиеныз ӵош.

— Хоккеен шудӥсь пие быдэс командаеныз татчы лыктӥз, — шуэ егит атай. — Мынам татчыозь митингъёсы, демонстрациосы потаме ик ӧй вал. Малы кулэ кадь соос? Но туннэ вань пушкыным шӧдӥ калыкен ӵош луэмме.

Буре ваён ужрадын чузъяськизы вордскем музъем сярысь кылбуръёс, кырӟанъёс.

— Малы ми туннэ татын? — шуиз «Айкай» ансамбльлэн чеберлыкъя кивалтӥсез Олег Бимаков. — Милем маке шат ӧвӧл, кыӵе луоз калыкмылэн ӵуказе нуналыз. Асьме вылэ тулкым бӧрсьы тулкым сямен кисьтӥсько мылкыдэз зӥбись иворъёс, войнаос, пуштылонъёс… Сыӵе дыръя алама луыны капчи. Адями ымнырдэ утьыны секытгес.

Ужрад йылпумъяськиз Олег Поскрёбышевлэн «Ми — кортлэсь лэсьтэм калык…» кылбуреныз. Зэм но, кӧня пол кышкатъязы Россиез, кӧня пол бќрӟытъязы, пазьгыны выризы, но со ялан чидаз но азьлань вамышъяз. Ӵуказе нуналмес, нылпиосмес малпаса, ми кужмогес луом.

Сергей Захаров

 

Удмурт Дунне
By Удмурт Дунне Апрель 14, 2017 15:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<