Кин шутэтскоз дунтэк?

Удмурт Дунне
By Удмурт Дунне 25 апреля, 2017 10:31

Пиналъёслэсь шутэтскон дырзэс радъяны туэ 336 миллион манет висъямын, со кылем арынлэсь тросгес.

Туэ гужем лагерьёсын шутэтскозы 90 сюрс пала нылпиос. Та сярысь вераз Правительстволэн Тӧроезлэн воштӥсезлэсь ужзэ быдэсъясь Наталья Сударикова.

Кылем арын Карелиын Сямозеро тыын шудтэм учыр бере туэ бадӟым  саклык висъяськоз гужем лагерьёслы, шуиз Н. Сударикова.

Пиналъёслэсь шутэтскон дырзэс радъяны туэ 336 миллион манет висъямын, со кылем арынлэсь тросгес. Лагерьёсы путёвка ог 13 сюрс манет сылоз. Ӝыны дунын яке чылкак дунтэк путёвка сётӥськоз секыт югдуре шедем семьяослы, нылпизэс огназы будэтӥсьёслы. Одно ик лагерьёсы вуылозы нылпи юртъёсысь ваньмыз пиналъёс, МВД-ын учётын сылӥсь 105 быдэ вуымтэос.

Пиналъёслэсь шутэтскон дырзэс радъяку, кыӵе янгышъёс шараямын вал кылем арын но марлы туэ тросгес саклык висъяно, вераз Роспотребнадзорлэн Удмурт Республикая управлениеныз кивалтӥсь Надежда Матюшина.

Кылем арын шаерысьтымы пӧртэм лагерьёсын 167 эскерон ортчытэмын. Куд-ог лагерьёсын сиён-юон, ву куронъёслы уг тупало вал. Оглом 240 административной уж ӝутэмын, 1 миллион манетлэсь ятыр тыриськонъёс тупатэмын. Туэ но эскеронъёс азинтэмын луозы.

Али ик сюлмаськыны косэмын ни лагерь котыръёсты лемтэйёслэсь утён сярысь. Тазалыкез утёнъя министрлэн воштӥсез Людмила Гузнищева верамъя, лагерьёс усьтӥськон азьын министерство эскероз, вань-а лагерьёсын эмъяськон сэрег, тырмыт-а эмъюмъёс. Азьвыл аръёсы ортчытэм эскеронъёс возьматӥзы: лагерьёсы ужаны лыкто пӧртэм врачъёс — хирургъёс, урологъёс, дерматологъёс, озьы луыны кулэ ӧвӧл, шуиз Л. Гузнищева. Нылпи лагерьын ужась дышетскемезъя нылпи врач медло яке нылпиосты эмъяны луонлык сётӥсь сертификатэз мед луоз.

Та сяна, Л. Гузнищева ӵектонэн потӥз: школа лагерьёсын нылпиослэсь тазалыксэс юнматон сярысь сюлмаськоно. Азьвыл аръёсы пиналъёс доры поталлязы но ужрадъёс ортчытъязы эмсузэръёс, эмъян физкультурая врачъёс. Али таӵе амалъя ужан вунэмын ни. Сое выльысь улӟытоно. Адӟем кароно Дэри ёросысь врачъёслэсь: соос пиналъёс доры потанлэсь уг аналско.

Ангелина Снигирёва

Туспуктӥз А. Горбунов

 

 

Удмурт Дунне
By Удмурт Дунне 25 апреля, 2017 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<