Кин эмъялоз сазангуртъёсты?

Удмурт Дунне
By Удмурт Дунне 4 апреля, 2017 11:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Лидия Алексеева туэ февральысен сое санитаркаысь утялскисе выжтӥзы, но ужез соин валче ӧз воштӥськы — азьвыл сямен ик, гуртоослэн тазалыксы понна сюлмаськон — со вылын.

Балезино ёросысь Сазангуртын кылем ноябре фельдшерзы ӧвӧлэн медпунктсы ворсаськиз. Бен, юртэз но куашкан калэ вуэмын вал ни.

Ог 4 толэзь гурт пумысь ланьырес пурысь юртэ эмъяськыны ветлӥсез ӧвӧл ни. Нош азьвыл эмъюрттэтлы вазиськисьёс ӧз бырылэ. Татын Сазангуртысь гинэ ог 200 пала адями эскериськылӥз, эшшо бордаз юнматэмын вал на бускель Кӧснюк. Отын 46 мурт улэ.

Медпунктэ али нуналлы быдэ сямен Лидия Алексеева гинэ. Со татын ог 30 ар ужамын санитарка луыса. Та вакытэ мыло-кыдо кышномурт медпунктэз утялтэ но чакла.

— Кылем арын ноябрь толэзе, нылпи вайыса, фельдшермы кошкиз, — вера Л. Алексеева. — Со дырысен татчы ужаны лыктыны мылкыд карисез ӧвӧл. Зэм, милям берло вакытэ рос-прос ужасез ӧз кылдылы на. 5-6 ар куспын 3 фельдшер воштӥськиз. Егит нылашъёс вуо ке но, кӧня ке ужаса, бызё но мукет гуртэ кошко яке нылпи ваё но ужаны уг берыктӥсько ни. Соослэн татчы лыктэмзы уг поты медпунктамы ужан условиос ӧвӧлэн но. Толалтэ кезьыт луэ — косякъёсмы вужесь ни, шунтӥськиськомы пуэн, гуртэ чагыр эстӥськон 2008-тӥ арын пыртэмын ни ке но. Бен, кин куашкан калэ вуэм юртэ газ кыскоз на! Гурмы но шальтрамын вал ини, кылем арын, сое быдэс сэрттыса, кузпалыным валче гинэ выльзэ ӝутӥм. Сое эстыса но, юртын рос-прос шуныт уг луы. Пу возён лапасмы но ярантэм ини, тӧл пельтӥз ке, копак куашкалоз кадь йӧтэ. Кылем арын ланьырскемысьтыз ик картэ пыкъет пуктӥз вал, ӧйтӧд, кӧня чидалоз на.

Бен, медпунктмы воксё уг ужа шуыны уг луы. Татчы арнялы яке 2 арнялы одӥг пол вуыло Дядьпиысь фельдшеръёс. Соослэн лыктэмзы сярысь мон гуртоослы ивортӥсько. Фельдшеръёс ик эмъюм вутто. Соос дорамы ӵемгес но вуыло, кин ке висьыны усе ке. Нош мукет нуналъёсы, шуом вирзӥбетсэс мертано ке, гуртоос мон доры гинэ пыро.

Лидия Алексеева кӧня ке ар пенсиын ини. Туэ февральысен сое санитаркаысь утялскисе выжтӥзы, но ужез соин валче ӧз воштӥськы — азьвыл сямен ик, гуртоослэн тазалыксы понна сюлмаськон — со вылын. Кыӵе прививкаос пуктыны вакыт вуиз, кыӵе эмъюмъёслы кулэясько гуртоос но трос мукетсэ со чакласа возе.

Сазангуртын медпунктэн кылдэм югдурез ёрос кивалтӥсьёс тодытэк уг уло. Дядьпи муниципал кылдытэтэн кивалтӥсь Владимир Наговицын гуртоослэн сюлмаськонзы пумысен вера:

— Кылем толэзе гинэ гуртоосын пумиськонэ вуылӥзы ёрос администрациысь, больницаысь ужасьёс. Соос сазангуртын выль медпункт пуктон сярысь вераськизы. Ёросмылэн ФАП пуктон сярысь проектэз дась ини, ми сое ӝутыны музъем но висъямы ни. Но та вакытэ коньдон ӧвӧлэн уж могӟемын. Но, малпаськом, ёрос кивалтӥсьёсмы югдурез воштыны пӧрмытозы.

Озьы ик пумиськонын гуртэ егит специалистъёсты кельтон сярысь кенешизы. Али Сазангуртысь одӥгез нылаш Глазовысь медициная техникумын дышетске. Гуртазы выль медпункт кылдӥз ке, со соглаш вордӥськем гуртаз ужан сюрессэ кутскыны.

Балезино ёросысь Сазангуртысь пытсаськем медпунктэз чакласа возе Л. Алексеева.

Ангелина Снигирёва

 

Удмурт Дунне
By Удмурт Дунне 4 апреля, 2017 11:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<