Кезын — тус воштон, Шарканын — батарейкаосты бичан, Ижын — удмурт мода

Удмурт Дунне
By Удмурт Дунне 28 апреля, 2017 12:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Алнаш

 Семьяослы юртто

Ёросын ялэмын «Семья» ужрад.

Толэзь ӵоже сое ортчытэ ёрос администрациысь семья ужпумъёсын вырись отдел. Та вакытэ ёросын трос нылпиё семьяос 732 лыдъясько, пӧлысьтызы 664-ез начар улӥсьёс пӧлы пыро. Ужрадлэн нырысетӥ нуналаз ик трос нылпи будэтӥсь семьяосын пумиськон радъямын вал, отын тодматӥзы выль законъёсын. Черкогуртын ортчытэмын «Анай, атай но мон — спортэз гажась семья» ӵошатскон. 15-тӥ мае, Семьялэн нуналаз, Алнаш черкогуртысь анай луыны дасяськисьёсын пумиськылозы психолог но дун-чылкыт Тройча храмысь Андрей иерей. Ёросысь специалистъёс толэзь ӵоже вань муниципал кылдытэтъёсы поталозы, отын атайёслэсь кенешъёссэс кылдытыны медо.

Кизнер

Дружинникъёслэн лыдзы будӥз

Та нуналъёсы Кизнер ёросысь калык дружинникъёс асьсэ радазы кутӥзы Вуж Бӧдья, Тыло но Ягул гуртъёсысь югдурез утьыны мылкыд карисьёсты.

Озьы ёросын дружинникъёс 30 кузя луизы ини. Соослэн кылем ар понна но туэ 3 толэзь ӵоже ужамзылы йылпумъянъёс лэсьтӥз Кизнер ёросысь Депутатъёслэн Кенешенызы кивалтӥсь Вениамин Андреев. Со пусйиз:

— Кемалась ик ӧвӧл ёросамы 17 калык дружинникъёс вал. Шумпотӥськом, лыдмы трослы йылӥз. Дружинникъёс аляк улонлэсь калыкез утьыса возё. Кылем арез верано ке, дружинникъёс полицилы 8 учырын юрттӥзы — лушкаськисьёсты, жугиськисьёсты, семьяязы керетон-ӵашетон поттӥсьёсты кырмизы.

Ува

История гочатэ

Ёросын ортчиз шаертодонлы сӥзем конференция.

Ужрад люказ шаерчиосты, историкъёсты, нылпиосты. Соос веразы, кызьы ёрос улӥз Граждан ож вакытэ, Быдӟым ож дыръя, кыӵе куронъёс пуктэмын вал 1942-тӥ — 1957-тӥ аръёсы торф поттонъя огазеяськонъёс азе но мукет. Озьы ик ужрадэ лыктэмъёс тодӥзы ёросын интыяськем археологияя синпелетъёс сярысь.

Со сяна, конференциын Александр Пудовлэн «Культурная сфера Увинского района» выль книгаеныз тодматскон ортчиз. Та нырысетӥез бичет, кытын люкамын ёросысь лулчеберетлэн берпуметӥ 150 ар ӵоже азинскемез сярысь иворъёс.

Балезино

Ог-огзылы гожъялозы

Ёросысь волонтёръёслэн «Бумеранг» огазеяськонысьтызы егитъёс Кестым гуртысь арлыдоослэн юртазы вуылӥзы.

Пиналъёс «Лэсьты ӟеч уж!» ӧтён улсын ортчытӥзы шулдыръяськон ӝыт. Мӧйыос «Берлань СССР-е» юалляськонэ пыриськизы, пинал дырзэс тодазы вайизы. Арлыдоослэсь мылкыдзэс ӝутӥз тунсыко флешмоб но. Пересьёслэсь мыньпотэмзэс адӟыса, егитъёс шумпотӥзы — ӟеч ужзы пӧрмиз. Нылпиос но арлыдоос огкылэ вуизы —  кусыпсэс уз ыштэ, ог-огзылы гожъялозы.

Можга

 Яратонзы — Удмурт шаер

Вуж Какся гуртысь библиотекаын поэзилы сӥзем ӝыт ортчиз.

Ужрад нимаськиз «Яратонэ мынам — Удмурт шаер», со сӥземын вал Александр Белоноговлэн вордскемез дырысен 85 ар тырмонлы. Вераны кулэ, тодмо удмурт кылбурчи кӧня ке аръёс талэсь азьло чиптэм-чаптэм ышиз. Озьы ке но литератураез яратӥсьёс сое ӧз вунэтэ. Поэзилы сӥзем ӝытэ вуылӥзы Вуж Юбера но Бадӟым Сибы гуртъёсысь удмуртлыкез гажасьёс. Вуж Какся гуртысь «Инвожо» клубе ветлӥсьёс А. Белоноговлэн кылъёсызъя гожтэм кырӟанъёсты быдэстӥзы.

Шаркан

 Инкуазь сярысь сюлмасько

Шарканын уродмем батарейкаосты люкан ортче.

Шаркан ёрос администрациын, шор ёзо школаын, нылпи творчествоя юртын, райполэн куд-ог магазинъёсаз вуж батарейкаосыз бичан понна нимысьтыз посуда пуктылэмын. Туннэ нуналлы батарейкаос 50 килограммлэсь ятыр люкамын ни. Батарейкаосыз сяна, одӥг интые люканы малпазы вуж лампаосты. Вакчи дыр куспын соос 400-лэсь трос люкаськизы.

Иж

Удмурт мода вань!

Ижын ортчиз модалы сӥзем арня.

Ижысь тодмо стилист Олег Ажгихин пӧртэм мастер-классъёс ортчытӥз, асьсэзыз возьматыны луонлык сётӥз гуртысь дизайнеръёслы но.

Кылсярысь, Якшур-Бӧдьяысь модая театр возьматӥз туала манеръя вурем удмурт сюан дэремъёсты — сюлыкъёсын, кузь дэремъёсын нылъёс юсьёс кадь адӟиськизы. Аслэсьтыз дэремъёссэ возьматӥз Эграысь Надежда Касаткина но. Таиз дизайнер яратэ инкуазьысь басьтэм материалъёсты, эгра дэремъёсты выль сямен вуре.

Пичи Пурга

 Одоле урмон

Ёросын 5 урмон учыр шараямын.

Шаерысьтымы Пудо эмъянъя управление ивортэмъя, туэ ар куспын гинэ шаерамы 27 урмон учыр пусъемын, тужгес трос — Пичи Пурга ёросын. Кызьы вераз та ёросысь валтӥсь эпизоотолог Валентина Логинова, урмон учыръёс шараямын Быстрово, Вуж Мӧнья, Шор Кечол, Пичи Бӧдья но Баграш-Бигра гуртъёсын. Гуртоослэн азбаразы я гидазы урмем ӟичы пырамен, 1 кеч но 1 кучапи кулэмын. Туннэ нуналлы 5 сюрс 248 сюро таза пудолы, 634 пунылы, 1 сюрс 14 писэйлы, 550 ыжъёслы но кечъёслы прививкаос пуктэмын. Гуртъёсын карантин ялэмын, калык пӧлын валэктон уж нуиське.

Юкаменск

Юртто быдэс ёросэн!

Ёросын 15-тӥ маёзь ялэмын «Семья» акция.

2-тӥ арзэ сое радъя ёрос администрациысь семьяосын ужанъя ёзэт. Отысь специалист Мария Васильева верамъя, та ужрад чакламын ёросысь трос нылпиё, шуге-леке сюрем семьяослы юрттӥськон понна. Ёросын улӥсьёс администрацие дӥськут, пыдкутчан, сиён-юон, книгаос, шудонъёс но мукетсэ ваё. Со сяна, администрациысь ужасьёс потало секыт улӥсь семьяос дӥне, эскеро соослэсь улон котырзэс, чаклало, маин выро нылпиоссы. Сюлмо гуртооссылэсь кузьымъёссэс кылем арын басьтӥзы 38 семьяос.

Кез

Тусыз воштӥськоз

Ёрос администрация калык пӧлын юалляськон ортчытэ: кызьы воштоно посёлоклэсь туссэ. Выльдӥськон ортчытон понна федерал бюджетысь коньдон висъямын.

Ужъёс кутскозы ни гужем. Калык малпанзэ вераз: кыретӥ лэзем шуныт вайись гумыос Кезлэсь туссэ шӧтэм каро. Ёрос администрацилэн йырызлэн воштӥсез Дмитрий Ефремов таин соглаш луиз — гумыосты утялтозы. Озьы ик малпамын администрацилэн юртэз азьын  спортивной площадка лэсьтыны, отчы ӟусъёс пуктыны.

Сьӧлта

Армия данын

Туэ тулыс ёросысь 10 пияшъёс армие мынозы.

Вуоно солдатъёсты кылем арняе Сьӧлта ёрос музее люкаллязы. Пияшъёс тодматскизы ёрослэн историеныз, купец черкогуртлэн улэм-вылэменыз, ёросысь потэм тодмо адямиосын. Ёросысь ветеранъёслэн огазеяськонэнызы кивалтӥсь Виктор Лебедев армия сярысь вераз. Патриотизмъя «Беркут» огазеяськонысь армие ветлэм курсантъёс Павел Кононов но Денис Шульмин солдатлэн данэз сярысь вераськизы. Тунсыко, армия сярысь вераськонэ нырысьсэ лыктӥз Анастасия Морозова. Нылаш дышетсконзэ военной вузын азинтыны малпа.

Якшур-Бӧдья

 Кин устогес

Ёросысь егит дышетӥсьёс устоез ним басьтон понна вожвылъяськонзэс мытӥзы.

Арлы быдэ ортчылӥсь вожвылъяськонэ туэ пыриськыны мылкыд каризы 9 школаысь егит визьнодасьёс, нылпиосын ужан стажзы 5 арлэсь ятыр луыны кулэ ӧвӧл. Быгатонлыкъёссэс эскеро Ӵошкыт, Кекоран, Селычка, Ӟатча, Лынга,  Чернушки, Мукши, Чур но Якшур-Бӧдья шор ёзо школаосын ужасьёс. Дышетӥсьёслэн вожвылъяськонзы 3 люкетлэсь ортче. Нырысетӥяз ваньзы ужан амалъёсынызы тодматӥзы. 2-тӥ люкетаз соос усьтэм урокъёс возьматозы. 9 мурт пӧлысь 5-ез, котькинлэсь трос баллъёс люкамъёс, финалэ шедёзы но Дышетӥсьёслэн нуналзы дыръя данъямын луозы.

 

 

 

 

 

 

 

Удмурт Дунне
By Удмурт Дунне 28 апреля, 2017 12:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<