Ёросъёсысь иворъёс: кыед поттон, нылъёсты вузан, «ДондыДор» центрез усьтон

Удмурт Дунне
By Удмурт Дунне Апрель 3, 2017 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ортчим шаермытӥ. Мар луиз кылем арня куспын  ёросъёсын?

Алнаш

Кизилилэсь пӧртэм ӧвӧл

Культура удысын ужасьёслэн нуналзылы сӥзьыса, ёросысь культура юртын нырысьсэ ортчиз маскаръяськон ӝыт.

Отын чузъяськизы такмакъёс, кырӟанъёс, эктонъёс. Соосты быдэстыны сцена вылэ «улэпкын» потазы Россиысь тодмо кизилиос — Алла Пугачёва, Жанна Агузарова, Лолита но трос мукетъёс. Учкисьёс соосын ӵош ӝытбыт яратоно кырӟанъёссэс кырӟазы, мылкыдзэс ӝутӥзы. Кытӥяз кӧтсэс кутыса серекъязы, сокем усто соосты возьматыны быгатӥзы алнаш нылъёс но пиос.

Иж

Юрттоз портал

Ижысь ужбергатонэн вырыны мылкыд карисьёслы Интернетын «Бизнес-навигатор МСП» портал усьтӥськиз.

Табере документъёсты лэсьтыны луоз, дорысь потатэк —  кулэ Интернет гинэ. Та вакытлы портал Россиысь 76 бадӟым городъёсын ужзэ мытӥз ини.

— «Бизнес-навигатор МСП»-е пырыса, нырысь ик пусйиськоно, — валэктӥз  экономикая министр Михаил Зайцев. —  Соку гинэ отысь кулэ иворез дунтэк шедьтыны луоз. Кылсярысь, кызьы бизнес-план гожтоно, кыӵе льготаос чакламын егит ужбергатӥсьёслы, кытысь музъем, вуз карыны инты дунтэмен басьтоно но трос мукет. Азьланяз Глазов, Вотка, Сарапул городъёсын но порталэз усьтыны чакламын.

Красногорск

 «Курыт!» кесяськизы

23-тӥ южтолэзе Васильевской черкогуртысь Людмила но Борис Феофилактов кузпалъёс 55 ар ӵош улэмзэс пусйизы.

Соосты ӟечкыланы вуылӥзы Васильевской муниципал кылдытэтлэн йырыз Генриетта Прокошева но ёросысь арлыдоосын кивалтӥсь Галина Гончарова. Шулдыресь кырӟанъёсын но такмакъёсын кузпалъёслэсь мылкыдзэс ӝутӥзы гуртысь арлыдоослэн «Ветеран» коллективзы но культура юртысь «Селянка» ансамбль. «Егит кузпалъёслы» та нуналэ «курыт!» шуыса трос пол кесяськизы, егит дырзэс тодазы вайытӥзы.

Пичи Пурга

Гаражын — кысык

Лымы шунамлэсь азьло бусыосазы уногес кыед поттыны тыршо ёросысь хозяйствоос.

Гурт удысъя управлениысь агроном Дмитрий Александров верамъя, туэ 30 сюрс 324 тонна кыед ворттэмын ни. Тазьы берло аръёссэ гинэ ужало, но пайдаез шӧдскымон, шуо. Со сяна, хозяйствоос али минерал удобрениос басьяло. Котькуд гектаре 11 килограмм понымон вань ни.

Кысык югдур гаражъёсын — тани-тани техосмотр кутскоз. Техника лымы улысь поттэмын, 90 процентэз комбайн-тракторъёс туннэ ик бусы ужъёслы дась. Ёросын кизёно 43 сюрс 104 гектар. Азьвыл аналтэм 43 гектарез но выльысь гырыны медо — таиз усёз «Восток-Агро» хозяйство вылэ.

Каракулино

Калыкез огазеяз

Ныргында гуртысь «Мудрость» клубе ветлӥсь нылкышноос ӟуч кылбурчиез Белла Ахмадуллинаез буре ваён ӝыт ортчытӥзы.

Апреле кылбурчилы 80 арес тырмысал. Библиотекарьёс солэн кылбур бичетъёсыныз адӟытон дасяллям, улэм-вылэмез но творчествоез сярысь туж узыр материал люкаллям, ӝытэ лыктэмъёс ымзэс усьтыса ик со сярысь кылзӥзы. Кылбуръёс сяна, ӝытбыт чузъяськизы Белла Ахмадуллиналэн кылъёсызъя гожтэм кырӟанъёс.

Ӟуч кылбурчи та нуналэ огазе кариз ӟучъёсты но, удмуртъёсты но, бигеръёсты но, башкиръёсты но.  Пумиськон туж шуныт ортчиз.

Вотка

Нылъёсты вузаллям Бахрейнэ

Вотка палъёсысь 4 кышномурт вылэ уголовной уж ӝутэмын. Соос егит нылъёсын лушкем вуз карыны кутскиллям.

Пенсионерка, солэн нылыз, нылкышно фермер но солэн нылыз кырсь уж борды 2014-тӥ арын басьтӥськиллям. Полицейскойёс соосты кырмизы кылем арын ноябрь толэзе. 2 ар куспын кышномуртъёс Вотка городысь, Дэри ёросысь 19-30 аресъем 7 адямилэсь улонзэ таркаса вуттӥллям.  Бадӟым уждун сӥзьыса, нылъёсты Бахрейн кунэ келяллям. Отын соосты мугорзэс вузаны косӥллям. Та сярысь, оло, туннэ номыр тодмо ӧй луысал. Нылъёслы берытскыны юрттэм кунмылэн Бахрейнысь посольствоез.

Глазов

Донды бордаз кыскоз

2018-тӥ арын Адам гуртэ чакламын туризмъя «ДондыДор» центр усьтыны.

Та бордын каль ужаськом ни, шуо Глазовысь культурая но туризмъя центрын ужасьёс. Со быдэсак сӥземын луоз Донды батырлэн улон вакытэзлы.

«ДондыДор» центре Россилэн пӧртэм сэрегъёсаз улӥсьёс вуылозы, вашкала но туала уйпал удмуртъёслэн улон-вылонэнызы тодматскозы. Та бадӟым уж борды гижысь-пиньысь кутскизы ини ёрос библиотекаын ужасьёс но, соос, вашкала удмуртъёслэн улэм-вылэмзы сярысь книгаосысь бугыръяськыса, трос выльзэ но тунсыкозэ шедьтӥзы — книгаосын нимысьтыз возьматон радъязы.

Кез

Вожвылъяськизы визьнодасьёс

Кез ёросысь дышетӥсьёс но нылпи садъёсысь воспитательёс пӧлын вожвылъяськон ортчиз.

Отчы пыриськизы 15 дышетӥсьёс но воспитательёс. Аслэсьтыз котыр ласянь яркыт, чырткем но визьмо луэмзэ возьматӥз Кезысь 2 номеро школаысь покчи классъёсты дышетӥсь И. Докучаева. Кыкетӥ интыез басьтыны шуд усиз Александрово шор ёзо школаысь О. Дерендяевалы. Нылпиосты дышетон удысын ӟеч тодон-валанзэс возьматӥзы Кезысь «Семицветик» садысь Т. Будина, «Теремок» нылпи садысь воспитатель М. Селивёрстова, 1 номеро школаысь дышетӥсьёс О. Максимова но С. Артемьева.

Сарапул

Ульчаысь кырмизы

Сарапулысь полициын ужасьёс наркотикъёсты вӧлмытӥсь 28 аресъем нылкышноез  кырмизы.

Со талэсь азьвыл йыртэмамез понна суд улэ шедьылэмын ни вылэм. Нылкышнолэсь «вуззэ» шедьтӥзы ульчаысь — Сигаево черкогуртын сылӥсь машинаысь.

Наркотикъёсты вузан ужен выре вылэм нылкышнолэн уртче улӥсь эшез но — Сарапул карысь 37 аресъем воргорон. Со но лушкаськемез но наркотик вузамез понна суд улэ шедьылэмын.

Кырсь ужен вырисьёс вылэ уголовной уж ӝутэмын. Воргорон дорысьтыз потаны лэземын ӧвӧл, нош нылкышно пытсэт сьӧры пуктэмын.

Дэри

250 нылпи дзюдоен эшъяськоз

Та нуналъёсы Дэри черкогуртысь дзюдоен эшъяськисьёслы спортивной центр усьтӥськиз. ое пуктӥзы Дэри ёрос администрация но Удмурт Республикаысь Дзюдоя федерация кичӧлтэм улсын.

Выль, югыт, шуныт но бадӟым зал чакламын 4-ысен 17 аресозь 250 нылпилы.

— Пиналъёсмы таза будозы, ульчаетӥ, юнме дырзэс быдтыса, уз ветлэ, — шуо анай-атайёс. — Нылпиосмылы саклык висъяло шуыса, тау кариськом ёросысь но республикаысь кивалтӥсьёслы.

Кияса

Толэз келязы

25-тӥ южтолэзе Кияса ёросын, тӧло-жобо но кезьыт куазь шоры учкытэк, ёрослэн йырызлэн кузьымез понна куасэн бызьылонъёс ортчизы.

Ужрадэ уно калык пыриськиз — нылпи садэ ветлӥсь тэшкылиос, школаын дышетскись пиналъёс, егитъёс но арлыдоос.

Куасэн бызьылӥсьёс понна ульчаын кык пуртыын сӥльын ӝук пӧзьтӥзы но чай пӧсятӥзы, нылпиослы ческыт сиёнъёс сётъязы. Ужрадын пиналъёслы мӧзмыны дыр ӧй вал, соос понна нимысьтыз дасямын вал шудон площадкаос.

Юкаменск

Йӧ вылын пӧсь луэ

Юкаменскысь тымет вылын арлы быдэ «Чорыгась пенсионер» ӵошатскон радъяськылэ.

Ужрадэ пырисько ёросысь котькуд муниципал кылдытэтысь чорыганы яратӥсь воргоронъёс но нылкышноос. Соос понна висьыны лыкто гуртооссы. Вожвылъяськон пӧсь но туж тунсыко ортче 3 номинациен: кин нырысь чорыг кутоз, кин котькинлэсь бадӟым чорыг кутоз но кин трос чорыг кутоз. Ваньзы ик вормисьёс «Огъя Россия» партилэсь синпель кузьымъёс басьтӥзы.

Удмурт Дунне
By Удмурт Дунне Апрель 3, 2017 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<