Йыртэманъёс йыло тулыс

Удмурт Дунне
By Удмурт Дунне 28 апреля, 2017 15:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кылем арын шаерамы устоез следователь луиз Руслан Эминов. 2016-тӥ арын 40 уголовной ужез сэрттыны-пертчыны быгатӥз. Мар юрттэ солы йыртэмасез шараяны?

Руслан Эминов час куспын 10 ужез лэсьтыса вуттэ. Зэм но, огвакытэ ик пиосмурт юалляське но, компьютерен но печатла, документъёсты дрелен чаж поттыса пася, венен-сӥньысэн тач-тач вуре…

Егит старший следователь туннэ тырше Следствиея управленилэн Ижысь Первомай ёросъя отделаз. 6-тӥ арзэ сяна уг ужа на. Озьы ке но кырсь ужъёсты кызьы шаплы шарае поттоно — ӟеч тодэ. Сыӵе шӧдонэз вираз пичиысен пыӵамын, угось семьяысьтыз вань воргоронъёс улонзэс сӥзиллям югдурез утён удыслы. Талы луыса, вылды, Эминов капчиен сэрттэ-пертче вашкала йыружъёсты но.

— 2004-тӥ арын уголовной уж ӝутэмын вал Ижысь воргорон вылэ. Солэн «Болото» нимаськись интыын музъем кесэгез вылэм, корка пуктэм. Но ачиз отчы каръяськымтэ. Улон интытэк, ужтэк кылем воргоронъёсты интыям. Таосыз коркаез утялтылӥллям, чыры-пыры пудо вордылӥллям. Вуттылӥллям курытсэ но ӟамыръяны. Озьы кузё но воргоронъёс вискын керетон пуромем. Кузё вожомем, ки улаз шедем кирпичен огзэ пиосмуртэ йыраз шуккем. Соиз 3-тӥ нуналаз кулэм. Та бӧрсьы кузё  кырмемын вал. Но сое кыл кутон улэ кыскыны ӧм быгатэ, угось ӟеч алибиез вал. Но уголовной ужез кутсконысеныз пумозяз бугыръяса, выльысен эскеронъёс ортчытыса, йыр быдтӥсез шараямы.

Эминовлэн кабинетэз котырысь калык уг бырылы. Вылысьтыз вылаз допросъёс мыно. Ӵош ужась эшъёсыз — татын тыршо на эшшо 4 следовательёс — Эминовлэн вормонъёсызлы уг паймо. Шуо: Руслан час куспын 10 ужез лэсьтыса вуттэ. Зэм но, огвакытэ ик пиосмурт юалляське но, компьютерен но печатла, документъёсты дрелен чаж поттыса пася, венен-сӥньысэн тач-тач вуре…

— Арнялы быдэ вошъяськыса дежурство нуиськомы, — вера Эминов. — Али мон дежурной. Соин ик эшшо но шаплыгес ужаны турттӥсько. Угось тодӥсько: ёросамы секыт йыруж лэсьтэмын луиз ке, ваньзэ куштыса, отчы потоно луоз — коть нуназе, коть уйшор бере. Та сяна, котькуд нунал ӵукна но ӝыт 9 часын оперативной совещаниосмы ортчыло. Отчы но вуттӥськоно.

Следователь чаклам ини: тулыс ужзы тымиське, угось секыт йыружъёс — сантэман, жугон, кышкатыса мурт ваньбурез лушкан — чутрак йыло. Талы янгыш ачиз адями: шуныт кариськемъя дӥсяське вакчигес но векчигес, зарни суйпоскесъёссэ, весьёссэ потта. Кезьыт куазь дыръя калык доразгес пуке. Тулыс азбаръёсы, ульчаосы потэ.

— Котькудӥз уголовной уж йыре, сюлэме пыӵаса кыле, — шуэ со. — Но дыр ортчемъя соос калленэн вуно. Вием, бырем нылпиосын герӟаськемъёсыз гинэ ялан син азьын уло. Доре бертыса валес вылэ выдыса, синъёсты кыниськод но — нылпиослэн тусъёссы, шокасьтэм мугоръёссы син азе пуксё. Ужаны кутскеме бере та пумысен сюлмаськыны но кутски вал ини — тусъёссы ялан сьӧрам ветлыло кадь. Юрттэт курыса, вазиськи трос аръёс ӵоже ужам следовательёслы. Соос пельпумъёсынызы гинэ выретӥзы, шуизы: милям но, пе, озьы ик…

Шутэтскон вакытэз но Эминовлэн бумагаос пӧлын ортче — лыдӟиськыны яратэ. Но детективъёсты палэнтэ гинэ. Отын трос выжыкылэз, пе. Россиысь Следствиея комитет толэзьлы быдэ «Предварительное следствие» зӧк журнал печатла. Соосты Руслан Гурбанович котькудзэ, йыраз кельтыны турттыса, кема бугыръя. Угось кескич йыртэмасьёсын ужасьёс отчы асьсэлэсь тодон-валанъёссэс гожъяло, али кутскись следовательёслы дэмланъёс сёто.

— Туннэ мон 4 уголовной ужъёс бордын вырисько. Пӧлысьтызы огез — шаерысьтымы секыт висись нылпиослы чаклам больницаен герӟаськемез — кема кыстӥське ини. Кылем арын июль толэзе отын 6 толэзьем нуны кулӥз. Та учырез сэрттон-пертчон вискамы мукет тырмымтэосты но шараямы. Кылсярысь, нылпиослэн картаосазы гожъямын, кыӵе эмъюмъёсын соосты йӧнато. Но малы ке но со эмъюмъёс больницаын чик ӧвӧл. Яке нылпиослы печенняен компот интые нянен ву сёто… Вань та учыръёсты али рос-прос эскериськомы, больницаын котькуд ужасьлэсь юалляськиськомы.

Ижысь Первомай ёросъя отделлэн кивалтӥсез Андрей Шуткин тодэ: Эминов йыружъёсты вакчи дыр куспын сэрттоз-пертчоз. Кылем арын 40 уголовной ужъёсыз пӧлысь огезлы но суд оправдательной приговор ӧз сёты. Озьыен, следователь ӟеч тыршем.

Ольга Корепанова

Удмурт Дунне
By Удмурт Дунне 28 апреля, 2017 15:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<