«Италмаслэн» выжыез. Анатолий Мамонтовлы — 80 арес

Удмурт Дунне
By Удмурт Дунне Апрель 6, 2017 16:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Анатолий Мамонтов 600-лэсь уно партитура гожтӥз.

7-тӥ оштолэзе 80 арессэ пусъе  Удмуртиысь калык артист, 53 ар ӵоже «Италмас» ансамблен кивалтэм Анатолий Мамонтов. Сое сӥлы карыса, концертъёс ортчозы.

Филармониын концерт сётоз «Италмас» ансамбль. Та коллективен герӟаськемын Анатолий Васильевичлэн быдэс улонэз. Вераны кулэ, ансамбльлэн сюресэз кутске хор бордысен. 1936-тӥ арын сое кылдытӥз Омскысь дирижёр Апполон Каторгин. 1960-тӥ аре, Казаньысь консерваториез быдтэмез бере, коллективе вуэ 23 аресъем Анатолий Мамонтов. Ансамбльлэн соку нимыз но ӧй вал ай. 1968-тӥ арын ансамбльлэн выль кивалтӥсез солы ним понэ — «Италмас». 1960-тӥ аръёсы удмурт калык кырӟанэз сцена вылысен профессионалъёс сямен быдэсъязы «италмасъёс» гинэ. Озьыен, «Италмас» ансамбль мукетъёсызлы анай интыын луылӥз. Сое Анатолий Васильевич шӧдылӥз — вань сюлэмзэ поныса, ансамблез котыр ласянь адӟем карымон карыны выриз. Трос калык кырӟанъёсты даурлы вунонтэм кельтӥз, партитураос кылдытыса.

— Анатолий Васильевичлэн туж трос кырӟанъёсыз кылемын — 600-лэсь уно партитураосыз. Ми ваньзэ соосты книгае пыртыны турттом. Соос та дырозь книгаен огпол но поттэмын ӧй вал на. Али уж нуиське ни, матысь дыре нотаосын кырӟанъёс калык доры вуозы, — вераз филармонилэн директорез Алексей Фомин.

Со сяна, атаезлэсь ужъёссэ книгаен поттыны малпа Константин Мамонтов но.

— Мон люкай солэсь архивзэ, бадӟым чемодан мырдэм ворсаськиз, — вера пиез Константин Мамонтов. — Атае ялан ветлӥз гуртъёстӥ, калык кырӟанэз кылылӥз но со бордысь произведение кылдытъяз. Кырӟанъёссэ сак кылзӥськид ке, отысь калык кырӟанлэсь гурзэ кылод. Книгаез поттон, сое дасян понна кулэ 200 сюрс манет пала. Одӥг интервьюаз атае шуиз вал: партитураосме книгаен поттыны быгатӥ ке, кыкетӥзэ вордӥсько.

Анатолий Мамонтов «Италмас» ансамблен.

Концертъёс бере чорыгалляз

Константин Мамонтов, пиез:

— Атайлэн ваньмон дырыз туж ӧжыт вал. Со ялан ужаз ансамбльын, ветлылӥз гастрольёсы, гуртын, крезьгур гожъяса, пукиз. Озьы ке но шутэтскыны но быгатылӥз. Дорамы котьку улӥзы пуныос — той-терьеръёс. Возьылӥмы аквариум, атае базарысь басьтылэ вал меченосецъёсты но гуппиосты. Удмуртиетӥ гастрольёсын ветлыкуз, сьӧраз кутылӥз резина пыж но визнан. Концертъёс бере уйин чорыганы потаськом вал. Гастрольёсы озьы ик сьӧраз нуллэ вал мопедзэ. 70 аресыз ортчем бере но со дачае мопедэн ворттылӥз на.

Спорт понна визьтэммемын вал. 80-тӥ аръёсы «Ижстальлэсь» одӥг шудонзэ но ӧз кельты. Толалтэ ӵошен ветлылӥськом вал мотогонкаосы. Котьку сьӧраз нуллэ вал фотоаппарат, нош берлогес —  видеокамера. Ӝытсэ, ваннае пытсаськыса, туспуктэмъёс лэсьтылӥз. Туж ӟеч кышъялляз сапег! Огпол,  зарезь дорын шутэтскыкумы, агаелэсь но мынэсьтым пыдкукмес тупатъяз. Сое адӟыса, мукет шутэтскисьёс но тэбинизы — нылпиоссылэсь кутчанъёссэс тупатъяны-выльдыны куризы.

  Учкисьёс ушъялозы

Евгения Медведева, «Италмас» ансамбльысь кырӟась:

— Анатолий Васильевич котькудмылэсь улонмес тодэ вал, пумиськыку но котьку юа, кыӵе ужъёсты. Кытысь-марысь арган гур, кырӟан кылэ ке, соку ик диктофоназ гожтэ, кышноеныз ӵош эктэмъёсты учкылэ, кельшемзэ соку ик коллективе вае вал. Ужын со туж чурыт, нош жаляны-юрттыны кулэ ке — небыт. Ми, артистъёс, возьмаськом вал солэсь ушъямзэ. Но со шуылӥз: тӥледыз учкисьёс мед ушъялозы, нош мон тышкаськи ке, тӥ эшшо но умойгес луоды. Улонын котькыӵе мед луоды — чебересь-а, тустэмесь-а но сцена вылэ потӥды ке, тӥ луыны кулэ мунёос кадь. Тӥ шоры учкыса, пиослэн дыльдызы шыр мед кошкоз.

Арганэн озьы уг шудо!

Иван Русских, «Италмас» ансамбльысь артист:

— Жалясько, вылӥ тодон-валан ӧй басьты шуыса, но Анатолий Мамонтов мыным вуз мында ик тодон-валан пыӵатӥз, кызьы коллективез шӧдоно, сцена вылын астэ возёно, кырӟано… Со гуртын будэмын бере, тодэ, кызьы Гыронбыдтон ортче, пиез армие келяло… Соин милемыз ялан тупатъялляз. «Иван, гуртын озьы арганэн уг шудо, тазьы кулэ», — киыныз ик возьматыса, вералоз вал. Гастрольёсын но гань-гань кариськыны маза ӧз сётылы. Ваньмон дыръя кин ке шур дуре, кин ке губияны кошке, но кепкаен лыктӥсь адямиез шуак адӟиськом ке, кеськиськом: «Мамонтов лыктэ!» Соку ик люкаськиськом. Репетициосты фойеын но ортчытъямы, уго Анатолий Васильевич котькуд минутэз творчестволы сӥзьыны турттылӥз.

Вераны кулэ, секыт дыръёсы со быгатэ вал аслэсьтыз чурыт кылзэ вераны, коллективез утьыны, артистъёслы улон интыен, садикен юрттылӥз.

Малы йырыд кырыж?

Ирина Мирхазова, «Италмас» ансамбльысь кырӟась:

— Нырысетӥ гастрольёсы бере Анатолий Васильевич монэ дораз чортӥз:  «Малы ваньмызлэн йыръёссы шонересь, нош тынад кырыж?» Залын со ялан блокнотэн пуке вал, чакламъёссэ гожъяса.

Анатолий Васильевич — туж творческой адями. Азьвыл толэзьёсын-толэзьёсын гастрольёсы ветлӥськомы вал. Паймисько, ку со вуттылӥз кырӟанъёсты нотаен гожъяны. Концерт быриз гинэ ай,  Анатолий Васильевич кыӵе ке песянай вӧзын пуке ни — калык кырӟанэз соку ик нотаосын гожтэ.

 

Мария Векшина

Туспуктэмъёс кутэмын К. Мамонтовлэн архивысьтыз

 

Удмурт Дунне
By Удмурт Дунне Апрель 6, 2017 16:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<