Гожъяськись ожмаськись. Захар Прилепинлэн творчество, политика шоры учконъёсыз

Удмурт Дунне
By Удмурт Дунне 17 апреля, 2017 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Южтолэзь пумын Иже вуылӥз тодмо писатель, журналист, ДНР-лэн армиысьтыз майор Захар Прилепин.  Творческой пумиськонын со мадиз, кызьы ОМОН-ысь вуиз гожъяськонэ, нош собере выльысь — ожмаськонэ. Литература сярысь вераськон ӵемысь выжылӥз туала политикае.

З. Прилепин: пушкам котьку но военной адями пуке.

Литература сярысь

— Войнае мынытозям, мон литератор вал, — шуэ Захар Прилепин. — Гожтӥ 17 книга, соос дуннеысь 20 кылэ берыктэмын, пусъемын литература удысысь вань бадӟым премиосын, Нобельлэн  сянаеныз. Таин тырмоз. Лев Толстойлэн тани 90 том гожтэмез, но малпасько,  солэсь творчествозэ эскерисьёс но ваньзэ ӧз лыдӟе, дыр.  Кытчы сомында?

Куд-огез шуо, Прилепин войнае мынӥз выль книга гожтон понна. Ӧй, со понна одно ожмаськонэ пыриськоно ӧвӧл. Мон Донецке нырысьсэ 2014-тӥ арын мынӥ, соку куд-ог учыръёслы паймылӥ ай, нош али ваньмызлы дыши ни, мынам сомында историосы, дугдылытэк гожъяны луысал, но уг поты. Соин Донбассын мон блокнотэн уг ветлӥськы — пыӵалэн, угось та вие потэ ожмаськеме,  Россиез утеме.

Туала ӟуч писательёс пӧлысь мон пусйысал 4 нимтулэз: Алексей Иванов, Михаил Тарковский, Евгений Водолазкин но Александр Терехов. Туж тунсыко соиз: усто писательёс пото провинциысь: Алексей тани Пермьысь, али Екатеринбургын улэ, Миша воксё Енисей дурысь, улэ  гуртын, черк ӝутыны юрттэ, кыштыр-кыштыр гожъяське… Вот та 4 адями, лыдъясько,  классикае пыроз, соосты азьланяз школаосын но университетъёсын дышетозы.

Берло книгаосыз сярысь

— «Обитель» сӥземын ГУЛАГ-лы. Мон та темая трос лыдӟи, но мыным ӧз тырмылы зэмлык. Потӥз аслам бугыръяськеме. Лыдӟисьёс юало:  книгаяды маиз зэм, маиз малпамын? Мон шуысал: ваньмыз зэм. 3 ар пуки архивъёсын, документъёсты  лыдӟыса-эскерыса. Книгаме йылпумъян понна кылиз на вал Фёдор Эйхманислэн, лагерьлэн начальникезлэн, нылыныз гинэ пумиськыны, тодылӥ, со улэп, Москваын улэ. Но со вераськыны пумит луиз. Соин ик берпуметӥ главазэ  йырысьтым басьтӥ. Но оскоды оло уд, книга потэм бере со мыным ачиз жингыртэ: вералэ, пожалуйста, эшъёсы пӧлысь кин монэ вузаз тӥледлы? Нокин ӧз, шуисько, ачим малпай. Со мыным ӧз оскы, угось гожтэме укыр зол тупа, пе, зэмлыклы…

«Взвод. Офицеры и ополченцы русской литературы» книгае пыризы Зарни даурысь 11 писательёслэн но поэтъёслэн биографиоссы,  Державин но  Давыдов бордысен кутскыса Чаадаевозь но Пушкинозь — соос киязы перо гинэ ӧз возе, пыӵалэн но ожмаськизы. Кин ке  Бородиноын, кин ке Польшаын, Швециын вирзэ кисьтӥз, Пугачёвлэн бунтаз пыриськиз,  Кавказэ служить карыны  мынӥз… Соослэн творческой биографизы  пӧлэстӥське военной службаен.  Мон ачим военной бере, мыным та тема котьку тунсыко вал, соин малпай 19-тӥ даурысь поэтлэсь-воинлэсь образзэ улӟытыны. Огшоры гожъяськыны яке ожмаськыны гинэ мӧзмыт — улонэз котькуд ласянь шӧдыны-валаны кулэ.

Лыдӟиськон сярысь

— Мон  чик но уг кайгыриськы, лыдӟо-а монэ, уг-а. Дыр ортчыса гинэ, тодыны луоз,  ӟеч-а тон писатель, ӧвӧл-а. Но уг яратӥськы сыӵе адямиосты, кудъёсыз асьсэды калыклэн  син азяз уськытонтэм вылысь азьвыл но шуо вал: Пушкин-Толстой интые, мон, эсьма, Ломоносовез лыдӟо… Озьы ик али но: туала писательёслэн ӵабъямзылы дырез быдтытозь, мон, эсьма, классикъёсты лыдӟо… Уг лыдӟо созэ но, тазэ но. Мон аслам батальонэ понна Донецкын но юромо  библиотека люкай. Лыдӟиськон мылкыдзэс туж уг шӧдӥськы. Но уг но косӥськы — умой адямиос вань чик лыдӟиськисьтэмъёс пӧлын но, зэм, соосын мӧзмытгес.  Котькудӥз та улонын аслэсьтыз лулзэ пӧртэм сямен уте: кин ке лыдӟиське, кин ке вӧсяське, кин ке ожмаське…

Журналистика сярысь

— Ожмаськем сяна, мон вырисько журналистикаен — мынам 2 газетэ,  эшшо  телеведущий луыса ужасько,  киноын шудӥсько.

Ноку но ӧй малпалля журналист луыны, мон ОМОН-ын службаме нуисько вал, Чечняын, Дагестанын ожмаськи, но асьтэос тодӥськоды, кыӵе бугырес вал 1990-тӥ аръёс. Мынам пиналы вордскемын вал ни, нош уксёе уждунысен уждунозь но уг тырмы. Озьы кайгыронъям эшеным пумиськи, со  одӥг газетэн кивалтэ вал. Ма, ойдо, пе,  корреспондентэ. Кыӵе мынэсьтым журналист, соку ӧй дӥсьты. Но мукет ӵектонъёс ӧй вал бере, амалтэк асме эскероно кариськи.

Ачим но пайми, макем бордаз кыскиз монэ журналистика. Котькуд номерын газет бамлы быдэ сямен материалъёсы потазы, ӧй гожъя, дыр, сад-бакча сярысь гинэ. Со но ӧз тырмы, та  холдингысь ваньмаз 8-аз газетъёсы-журналъёсы гожъяськыны кутски. Одӥг фамилиен печатласькыны умой ӧвӧл кадь, аслым кушем нимъёс (псевдонимъёс) пуктылыны кутски. Нялтас вераса, Захар — песятаелэн нимыз, ачим мон паспортэя — Евгений.  Но Захар ним сокем лякиськиз мон борды, табере ачим но пӧртэмлыксэ уг адӟиськы ни. Кушем нимъёсын одӥг пол тунсыко учыр луиз.  Нижний Новгородысь  кивалтӥсьёслэн куд-ог ужъёссыя  расследование лэсьтӥ, сое газет пыр шарае поттӥ. Соку губернатор Борис Немцов вал, редакторлы жингыртыса, косъяське, пе: отын тӥляд сьӧраз ортчем 2 журналистъёсты вань — Лавлинскиен Нисифоров, куштэ соосты! (Нош соиз но, таиз но — со мон, огез кушем нимы песянаелэн фамилиезъя, мукетыз — анаелэнъя). Редактор, пе, юа: нош Прилепинэз уллялом-а? Эн, созэ, пе, кельты, умой гожъяське…

Семья сярысь

— Атае — Липецк улосысь дышетӥсь, анае — Рязань котырысь медик. Но выжыея — песятайёсыя — мон ӟуч крестьян пи.  Вордӥськи гуртын. Али но гуртын улӥсько — Нижний Новгород котырысь посёлокын. Кышноеным ӵош 4 пинал будэтӥськом. Куд-огез юало: кызьы тӥледды кузпалды войнае лэзиз? Малы нош со монэ возьыны кулэ? Нырысь ик,  со бызиз военнойлы, нырысетӥ пимы вордскыку, ОМОН-ын служить карисько вал ай. Собере, пиналъёсы аналтэмын ӧвӧл, мон ялан окопын уг пукиськы ук, бертылӥсько,  вуылӥсько телевидениын  программаос лэсьтыны. Нялтас вераса, ӵапак пиналъёсылы луыса мон  вамыштӥ, дыр, кинематографе. Одӥг пол  Москваысь жингыртӥзы, киноын кыӵе ке бандитлэсь рользэ шудыны ӵектыса.  Мон соку ик чутрак пумит луи. Доре бертыса,  оломалы нылпиос азьын верано кожай. Соос нош кытӥ-мар садикын эшъёссылы ушъяськыса вуттӥллям, озьы соослэсь льӧль малпанзэс  быдэстон вылысь соглаш кариськытэк ӧйлась. Со бӧрсьы  эшшо одӥг фильмын шудӥ, но кино экранэ ӧз поты на. Мыным кельшиз, но валай, макем секыт актёрлэн ужез.

Ожмаськон сярысь

— Кылем арын журналистъёс Прилепин писательлэн  ожмаськонэ мынэмез пумысен сенсация лэсьтыны  кутскизы. Но со мыдлань, шуысал мон. Угось мон нырысь ожгарчи вал, собере писатель луи, соин ик мынам пушкам  котьку но военной адями пуке.  Донбассэ мынон сярысь малпанэ  2014-тӥ арын ик кылдӥз. Быгатысал  соку ик рядовойёс борды итӥськыны, но мон офицер! 2015-тӥ арын мон ДНР-лэн тӧроезлэн А. Захарченколэн советникез луи, пумен аслым батальон люкан сярысь сюлмаськи, озьы 2016-тӥ арын гужем малпанэ быдэсмиз — табере мынам аслам батальонэ вань.  4 нылпи ӧжыт потӥз, лэся, табере сюэз понна сюлмаськисько, угось войнаын, ыбылӥськон сяна, туж трос мукет сюлмаськонъёс но вань. Вылаз ик, мон Донбассын улӥсьёслы гуманитарной юрттэт люканэн вырисько.

Ку йылпумъяськоз керетон? Куке вормоз зэмлык…

Зинаида Рябинина

Туспуктэм: zaharprilepin.ru

Удмурт Дунне
By Удмурт Дунне 17 апреля, 2017 15:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<