Галина Кулакова уйвӧтаз ялан бызьылэ на

Удмурт Дунне
By Удмурт Дунне 28 апреля, 2017 14:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

29-тӥ апреле 75 арес тырмонзэ пусъёз шаерысьтымы туж тодмо адями, спортысь легенда Галина Кулакова. Галина Алексеевна алигес пумиськылӥз шаерысьтымы журналистъёсын. Отчы ӧтемын вал эшъёсыз Нина Парамонова но Тамара Тихонова.

Спортысь легенда Галина Кулакова.

«Прощальный поцелуй»

Вотка ёросысь Степаново гуртысь Алексей Николаевич Кулаков школаын дышетӥсьын ужаз. Гуртысьтызы нырысетӥосыз пӧлысь Быдӟым оже кошкемын, нош кема ожмаськыны солы уг кылды. Гуртэ вуэм нырысетӥез похоронкаез Дарья Арсентьевна Кулаковалы сётӥзы. Лушкемен бӧрдылӥз ке но, суй-пыдзэ ӧз юскы, кӧтаз кылем пиналзэ умой вордон сярысь сюлмаськиз. 1942-тӥ арын апрель толэзе Кулаковъёслэн семьяязы 9-тӥ пинал — Галина — вордскиз.

Аръёс ортчизы. Школазэ йылпумъяса, Галина дышетскон сярысь ӧз ик малпаськы. Шонерак вамыштӥз фермае. Нырысь ужаз кунян сюдӥсь луыса, отӥяз скал кыскиз. Шаплы тыршемезлы эшъёсыз но паймылӥзы. Толэзь куспын кунянъёсыз 1 килограммлэсь трослы куайылӥзы, котькинлэсь трос йӧл кыскылӥз. Сьӧр гуртэ ӝыт шулдыръяськыны ветлылӥз на. Нырысь пыдын бызьылэм, собере великен ворттылэм. Озьы бызьылыса ветлонъяз ик мугорзэ но кыдатэм, вылды. Нырысь колхоззы понна куасэн бызьылӥз, нош отӥяз — заводын ужась апаез понна. Заводлэсь данзэ республикаын утёно луоз шуыса тодмо луэм бере Кулаковаослэн лушкем ужзы шараяськиз. Со ик луиз Галина Кулаковалэн бадӟым спортэ вамыштэмез.

Анайзы Галяез яратыса «прощальный поцелуй» гинэ шуылэм. Пичи дырзэ тодаз вае ке, Галина Алексеевна соку ик вордскем гуртсэ син азяз пуктэ. 9 нылпи пӧлысь, пе, та дыре 3 сузэръёс кылемын. Арлы одӥг пол, гужем кисьтон (поминка) нуналэ, вордскем гуртаз бертылэ.

Пу куасъёс оскымонэсь

Гуртысь нылашлэсь куасэн бызьылыны быгатонлыкъёссэ шӧдыса, тренеръёс Олимпиада сярысь кылпум поттылыны кутскиллям. Совето Союзысь ӵошатсконэ мынэмез бере сое «доярка» шуыса серекъяны выриллям, но номыр шоры учкытэк, спортсменка азьлань мынӥз. Эшъёсыз пӧлын Галя тужгес кужмоез вал, дыр, нош тазалыкезъя — ляб. Огаз ӵошатсконын финиш гожез выжемез бере 12 нуналлы йырсазьзэ ыштылӥз. Эмъясьёс спортэн люкиськыны косӥзы, нош со ӧз кылзӥськы. 1968-тӥ арын нырысьсэ тол Олимпиадае пыриськиз. Та ӵошатсконын солэн луонлыкез вал зарни медаль басьтыны, финишозь 500 метр кылиз на вал — усиз.

Галина Кулакова 4 пол Олимпиадаосы пыриськемын. 4 зарни, 2 азвесь, 2 бронза медальёс басьтэмын.

— Удалтӥз 1972-тӥ арын: Япониысь Саппоро городын ортчем Олимпиадаын ваньмаз 3 стартын ик зарни медальёс утӥ, — шуэ Галина Алексеевна. — Со вунонтэм ӵошатскон вал. Со аре куд-ог командаосысь спортсменъёс пластик куасъёсын бызизы ни, нош ми — пу куасъёсын. Но милемлы со вормыны ӧз люкеты. Пу куасъёс вылын кыдамын бере, милемлы соос туж оскымонэсь потӥзы.

Галина Кулакова 4 пол Олимпиадаосы пыриськемын. 4 зарни, 2 азвесь, 2 бронза медальёс басьтэмын. Дуннелэн чемпионкаез 9 пол вал, СССР-лэн чемпионкаез — 39 пол. Спортын басьтэм бадӟымесь вормонъёсыз понна 1984-тӥ арын со луиз Олимпийской орденлэн азвесь кавалерез.

— Эх, ми бызьылон вакытэ басьтэм медальёсмы понна тырмыт коньдон сётысалзы ке, дунне вылысь огез узырез адями луысал, дыр, — серекъяса вера Галина Кулакова. — Зарни медальёсы понна сётэм коньдонзы соку «Волга» машина басьтыны но ӧз окмы.

Дано спортсменка пайме, туала бызьылӥсьёс шоры учкыса. Финише вуэмзы бере, пе, ваньзы сямен усё, модалы пӧрмытӥзы сое. Куд-огез понна возьыт луылэ, пе.

— Туала вакытэ спортсменъёслэн куасъёссы но роллеръёссы асьсэос ширто ни, — вераськонамы итӥське Г. Кулаковалэн эшез Нина Парамонова. — Нош ми вакытэ роллер шуонъёс 5 килограмм кыско вал. Ми вакытэ мазь шедьтыны гинэ но шуг вал. Кунгож сьӧры потакумы, одно ик кабак вина сьӧрамы нуллӥмы мазьёслы воштон вылысь. Табере улон воштӥськиз, куасъёс дасяса сёто, бызьыны гинэ мылкыдыд мед луоз.

Г. Кулаковалэсь бызьылонъя рекордзэ лыдэ басьтоно ке, одӥг нунал куспын тужгес троссэ 84 иськем куасэн но 106 иськем питрано куасъёс вылын ортчем. Ар ӵоже ог 11 сюрс иськем люкаське вылэм. Дано

спортсменка серекъя, туала вакытэ, пе, машинаен 5 ар куспын но сомында уг ортчиськы ни.

Шыпыт юбилей

Руль сьӧрын Галина Алексеевна ачиз ворттылэ, тазалыкез вылэ ӝожтӥськемез потэ ке но. Кылем арын сентябрь толэзе усьыса кизэ чигтэм. Бурмыны кутскем ни вылэм, декабрь толэзе нош ик со киыз вылэ усем. Юрт котырысь вань ужез, пе, Нина Аркадьевна быдэстэ.

Роллер шуонъёс 5 килограмм кыско вал.

Г. Кулакова но Н. Парамонова тулыслы дасяськиллям ни. Парниказы кизем киярзы ваньмыз потэмын, картошка мерттӥллям, оло, адямиослэсь вазьгес сиыны кылдоз шуыса.

— Пуны вордонлэсь куштӥськыны медӥськомы ни вал, — шуэ Г. Кулакова. — Азьвылэз пересь но туж вожась вал, бордам йӧтскись адями шоры вожез потыса утылӥз. Но пунытэк улыны  кема ӧз кылды, нош ик немец выжыысь пуны кузьмазы. Укыр егит, шудэмез потэ, котыртӥмы тэтча. Вань на писэймы. Уйин кыре потамезлэсь акыльтӥ: я педло куриське, я пыремез потэ. Дышетӥ форточкаетӥ пыраны-потаны. Эшшо вордӥськомы на курегъёс, гужемлы бройлер чипыос басьтӥськомы. Нуналме пудоослы сиён пӧзьтон бордысен мытӥсько: курегъёслы — картошка, пунылы — шыд. Соослэн кӧтсы тырем бере гинэ ачим но сиськыны пуксисько.

Толалтэзэ та кышномуртъёслэн ваньмон дырзы уг луы. Шаерамы ортчылӥсь куасэн бызьылонъя ӵошатсконъёсы сюан генералъёс выллем, пе, ветлӥськомы. Нош дуннелэсь чемпионатъёссэ но Олимпиадаосты учкыны дорын, пе, умойгес.

— 2006-тӥ арын Тамара Тихоноваен вуылӥмы Италиысь Турин городын ортчем тол Олимпиадае, — шуэ Галина Кулакова. — Нина Аркадьевнамы гуртэ кылиз. Кунгож сьӧры вуимы но, улыны стадионлэсь кыдёке интыязы. Отчыозь пыдын мынӥмы, кынмыса сылӥмы но дорамы коскаса вуимы. Кык стартэз учкыны кылдӥз ик, отӥяз висьыны усимы. Гостиницаын телевизорзы ӧй вал, Олимпиада сярысь  верась ӧвӧл. Уд но оске, вань иворез тодылӥмы, Удмуртие жингыръяса. Нинамы куаретӥз соку, кин, пе, Олимпиадае мынэмын. Со дырысен спортсменъёс понна  дорын висиськомы.

Галина Кулакова 25 ар пала Дэри ёросысь Италмас каргуртын улэ. Кемалась бадӟым спортысь кошкиз ке но, куасэн бызьылонъя ӵошатсконъёс туннэ но уйвӧтаз лыкто.

Дано спортсменка юбилей ӝытсэ туэ шыпытак ортчытыны дасяське, азьвылаз, пе, солань-талань ветлыса, жади. 29-тӥ апреле Дэри черкогуртысь культурая юртэ юбилярез ӟечкыланы вуозы Россиысь эшъёсыз. Зина Амосова но Елена Вяльбе жингыртыса ивортӥллям ни ке, Раиса Сметанина малпаське ай. Та нуналэ дано спортсменкалы Удмурт шаермы выль машина кузьмалоз.

Валентина ЕМЕЛЬЯНОВА

   

Удмурт Дунне
By Удмурт Дунне 28 апреля, 2017 14:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<