Энвиль Касимов: Адями ас пушказ — огназ

Удмурт Дунне
By Удмурт Дунне Апрель 6, 2017 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Энвиль Касимов — политик, журналист, суредась.

Энвиль Касимов — политик, журналист, суредась,  Кун Кенешысь Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя комиссилэн кивалтӥсез. Сюбег кабъёсы тэрисьтэм, но со дыре ик улонлэсь кудпала питырамзэ туж юн шӧдӥсь. Энвиль Владимирович «Удмурт дунне» газетлэн коллективеныз пумиськылӥз. 

Энвиль Владимирович Касимов вордӥськиз 1961-тӥ арын Балезиноын. Дышетскиз Удмурт кун университетысь суредаськонъя но графикая факультетын, Москваысь Суриков нимо художественной институтын. Москваысь «Глобус» кооперативын суредась луыса тыршиз.
1993-тӥ арын берытскиз Удмуртие, Ижысь адӟытонъёсты радъянъя «Галерея» центрлэн директорезлэн воштӥсез луиз. «Ижевск завод» фирмалэн дизайн-группаеныз кивалтӥз, «Ижевск клуб» огазеяськонлэн тӧроез, «Алюминийлэсь лэсьтӥськон конструкциос» ООО-лэн валтӥсь директорез, «АСК-монтаж» огазеяськонлэн иворъёсъя но аналитикая отделэзлэн кивалтӥсез, «Известия Удмуртской Республики» газетлэн валтӥсь редакторез вал. 1999-тӥ арысен туннэ нуналозь — Кун Кенешлэн депутатэз.
Россиысь Театр удысын ужасьёслэн но Журналистъёслэн огазеяськонзылэн, Удмуртиысь Писательёслэн огазеяськонзылэн ёзчиез. Суредъёсыз утисько нимаз адямиослэн коллекциосазы Франциын, Германиын, США-ын, Норвегиын, Австралиын, Россиын.

— Энвиль Владимирович, тӥ выжыдыя бигер ке но, удмурт калыклэсь дунне валанзэ, оло, удмуртъёслэсь но ӟечгес шӧдӥськоды…

— Мон Удмурт шаерын улӥсько ук. Собере, мон суредась. Удмурт кун университетысь худграфын дышетски Юрий Лобановен ӵош. Ми соин ялан споръяськылӥм. Али но споръяськиськом. Мон ноку ӧй адӟылы, удмуртъёс асьсэ лушкем быгатонлыкъёссэс шара мед возьматозы шуыса. Нош Юра ваньзэ эркын, ӵашетыса возьматэ. Но солэн аслаз сюресэз…

— Творчество но политика — кызьы соос одӥг адями пушкын уло? 

— Котькыӵе уж — со творчество. Инмар, пе, адямиез ачиз кадь кылдытэм. Озьы адями, котькыӵе удысын мед тыршоз, маке выльзэ лэсьтыны быгатэ. Но асьмелэн малы ке пӧртэм ужъёс борды пӧртэм «суредъёс» лякемын. Журналистъёс таӵеесь, пе, эмъясьёс — сыӵеесь. Тани политика — кырсь уж, шуо. Но мон шуысал, политика кытӥяз чылкытгес но валамонгес ай, творчество удысэн ӵошатыса. Угось политикаын ваньмыз кабъёсъя радъямын-чакламын. Нош суредасьёслэсь, поэтъёслэсь дуннезэс чакласькод ке, маиз но отын ӧвӧл.

Али ваньмыз сокем ӝог ортче, ивор шур сьӧраз нуыса кошке трос бадӟым авторъёслэсь нимъёссэс. Культура кыле пичи шормуӵъёсы. Озьы, одӥг ласянь, Пётр Захаровлэн но со котырысь адямиослэн асьсэ шормуӵсы (кылбурчи тусовказы), Ар-Сергилэн — аслаз. Аспӧртэм шормуӵъёс-тусовкаос — Богдан Анфиногенов, Дарали Лели но мукетъёс. Та адямиос ог-огенызы кусып уг возё. Ог-огзы доры ветлон выжъёссы гинэ но ӧвӧл. Мон малпасько вал: та урод. Но али валасько: та адямиос укыр пӧртэмесь — озьы кылдо пӧртэм ӧръёс. Сыӵе ик югдурзы суредасьёслэн но.

Совето вакытъёсысь егит дыр.

— Кыӵеен адӟиськоды Удмурт шаерысь искусстволэсь ӵуказе нуналзэ? Луоз-а асьмелэн искусствоосъя рос-прос музеймы?

— Ижкар — искусство понна туж паймымон инты. Куд-ог городъёсын вань учкисьёс, но ӧвӧл суредасьёс. Мукет городъёсын ӧвӧл суредасьёс но, учкисьёс но. Нош Ижкарын соосыз но, таосыз но туж трос. Малы? Татын, шумесын сямен, сураськемын пӧртэм вакытъёс но калыкъёс. Нырысь ик, Ижкарез лэсьтон вакытэ кин но кытысь но ӧз лыкты, кыкетӥез — 1918-тӥ аръёсы Ижысь трос калык кошкиз, куинетӥез — Быдӟым война вакытэ дорамы Бауман нимо институт выжиз, вуизы эвакуацие шедем трос тунсыко адямиос. Эшшо одӥгез вакыт космосэн герӟаськемын. Ижын кылдӥзы «Прогресс» научно-исследовательской институт, радиозавод, «Аксион» выллем предприятиос, соос пыр асьмеос дуннеез паськытгес адӟыны кутским. Туж трос сётӥз Удмурт кун университет. Арлы быдэ татысь пото дышетскем адямиос. Пӧлазы суредасьёс но, соослэсь ужъёссэс учкисьёс но.

Жаляса верано, Ижевск, Удмуртия творчествоен вырись адямиоссэс дунъяны уг быгато. Но культуралы саклык ӧм ке висъялэ, асьмеос ялан урод уломы. Суредаськон искусствоосъя музеямы адӟытонъёс радъясько 300 квадрат метр интыын. Нош сыӵе залъёс ӧжытсэ 1 сюрс квадрат метр луыны кулэ. Ветлӥ музейысьтымы хранилищеосы. Отын художникъёслэн 15 сюрс пала пӧртэм ужъёссы утисько. Со ужъёслэн огъя дунзы одӥг миллиард манет пала луоз.  Кылсярысь, отын Менсадык Гарипов суредасьлэн ужъёсыз вань. Нош со нимо-дано художник — суредъёсыз Третьяковской галереяын но утисько! Асьмелэн музеямы пӧртэм вакытъёсысь пӧртэм авторъёслэн ужъёссы вунэтэмын, калык синъёслэсь палэнын кыллё. Та югдурез пичиен-пичиен тупатыны тыршиськом. Али вераськон мынэ Ижын «Артрезиденция» усьтон сярысь. Отын пӧртэм адӟытонъёс лэсьтыны луоз, поэтъёс, писательёс пумиськылыны мед быгатозы.

— «Известия Удмуртской Республики» газетлэн валтӥсь редакторез луыса ужакуды, тӥ дуннеысь тодмо адямиосты «Дано удмурт» премиен пусйылӥды. Малы?

— Со мынам проектэ ӧвӧл. Соин выризы суредасьёс Сергей Орлов, Юрий Лобанов, кылбурчи Пётр Захаров, кырӟась Надежда Уткина. Та проект пумысен ми кема споръяським. Угось со удмуртъёсты ваче вуттыны кутскиз, куд-огез отысь ултћянзэ адњизы. Но чаклано ке, проект азьын воксё мукет ужпум сылӥз: Удмурт шаерен тунсыкъяськонэз бугыртоно. Озьы Дмитрий Пригов кылбурчи, Эмир Кустурица режиссёр, Юрий Гагарин космонавт но мукет тодмо муртъёс борды «Дано удмурт» ним лякиське ке, быдэс дуннеысь адямиос утчаськыны кутско: нош кинъёс со — удмуртъёс, кытын, кызьы уло.

Тодам лыктэ на, кызьы рок-крезьгурчилы Артемий Троицкийлы та нимез сётон ужрад мынӥз. Брангуртысь песянайёс соку нокинлы тодмо ӧй вал али. Троицкий — ӝужыт воргорон, дораз матэктӥз пичи гинэ мугоро Наталья Пугачёва. Песянай чыртыозяз мед сузьтӥськоз шуыса, Артемий пыдесъяськиз. Учкисько но, рок кизилилэн синъёсаз — синкылиос. Озьы паймытон вылысь малпам акция пӧрмиз социальной проектлы.

Жаль, Удмуртия уг быгаты ушъяськыны, ассэ ӟеч ласянь возьматыны. Нош асьмелэн республикамы, уно мукетъёсыныз ӵошатыса, трослы ӟечгес. Уг валаськы, малы ми асьмеды, ушъям интые, курланы дыртӥськом. Оло, со озьы калыклэн менталитетэз шӧдӥське. Тани али куаретӥськом, шоркармы лымы гурезьёс пӧлы вые ни шуыса. Но учконо ке, Уфа, Пермь городъёсын, асьме шоркармылэсь соос узыресьгес ке но, лымыен югдурзы сыӵе ик.

Творчество удысысь эшъёсыныз А. Юминовен но А. Троицкиен ӵош.

— Ваньзэ менталитет вылэ погыльтыны уг луы, дыр…

— Озьы, вылды. Но монэ паймытэ удмуртъёслэн котьку котькытын кыкетӥ интыын луэмзы. Азьпал радэ потыны соос уг дырто яке уг дӥсьто. 1999-тӥ арын мон нырысьсэ луи Удмуртиысь Кун Кенешлэн депутатэз. Соку парламентын удмурт депутатъёс бигеръёслэсь ќжытгес вал. Мон пайми: кызьы озьы? Удмуртиын 30 процентэз улӥсьёс — удмуртъёс, нош бигеръёс 7 процент гинэ.

Вазенгес ай мыным шуизы вал: удмурт гуртын, пе, кинлэн ке липетсэ кортэн кыскыны коньдонэз луиз ке но, шиферен ик липиськоз, калыклэсь висъяськемез уз поты.

— Но али озьы ӧвӧл ни. Одӥгез лэсьтӥз ке, мукетъёсыз но солэсь адӟем карыны тыршозы.

— Озьы, калык воштӥське. Но калык радъя улыны тыршон, одӥг ласянь, умой сям. Солы луыса удмуртъёслэн аспӧртэмлыксы утиськиз.

Али Удмуртия быдэс дунне понна — тӧдьы вишты. Сое усьтоно на. Мон шӧдӥсько, маке сыӵеез татын луоз ай, дуннелы со усьтӥськоз ай. Аспӧртэм утчаськонъёсынызы тунсыко луо этнофутуристъёс. Но, зэмзэ вераса, этнофутуризм — со сыӵе ик постмодернизм, пичияк гинэ этно буёлэн шобыртэмын ке шат. Мон Юрий Лобановлэн этнофутуризмъя вань фестивальёсаз ветлэмын. Малпанэ одӥг: огинтыяд сылэм интые, кытчы ке мынон — њеч ини.

— Тӥляд искусстводы паймытъям гинэ ӧвӧл, куддыръя кышкатэ но. Кылсярысь, кырыжам мунёос, пӧйшур йыро олокинъёс…

— Эшшо — мон уг лэзиськы кутъёсты виылыны. Виылоно сооссэ гинэ, кудъёсыз тӥледыз куртчыло. Нош мукетъёсыныз огкыл шедьтыны тыршоно. Маин тунсыко кут? Со мамонт вакытъёсы ик улӥз ни, али но улэ. Мынам кутлы сӥзем кылбуръёсы но вань. Нош собере шӧдтэк шорысь творчествоям кылдӥз Барби мунё. Адями малпа: кык синмыз, кык пельыз, кык киыз — ваньмыз интыяз. Но азьланяз, уно аръёс ортчыса, адямилэн тусыз, оло, воксё мукет луоз. Одӥгез пельыз мукетызлэсь бадӟымгес, нош пушказ кыӵе ке гаджет юнматэмын луоз, киосаз кык кузь чиньыосыз, кудъёсыныз со тапыр гинэ кнопкаос зӥбылэ, но, шуом, куинь киыз. Малы куинь? Нылкышноос котьку шуо ук: эшшо одӥг кимы луысал на ке… Пӧртэм тусо-ымныро мунёос — со адями дуннеез валаны тыршон.

Адями малпа, та дуннеын со тужгес визьмо, тужгес усто. Но зэмзэ ке, оло, тӥни со кут яке кузьыли адямилэсь визьмогес ай. Соин астэ инкуазьлэсь вылӥе пуктоно ӧвӧл.

— Одӥгез эшты шуэ: Энвиль Касимов, пе, туж лякыт адями, солэн малпамезъя, улонысь кошкем адямиос ялан вӧзамы уло, Энвиль соосын вераське, визь-кенеш куре… Таин ик герӟаськемын улонысь кошкемъёслы гожтэтъёс гожъямды? Огшоры адями понна воксё валантэм: малы тӥ сопал дуннее кемалась ини кошкем адямиослы гожъяськоды?

— Кулэм адями сярысь тодазы возё ке, со улэп. Мон малпай гожтэт гожтыны соослы, кинэ аслам эшъёсыным лыдъясько: Д. Леннон, К. Малевич, С. Джобс, Д. Кеннеди, Л. да Винчи, Ю. Гагарин, Л. Толстой, Р. Зорге но мукетъёс. Гожъяй тылыен (соку гинэ валай, макем воштӥськемын ини киос, макем секыт ни тылы кутыны). Мон соосын вераськи эшъёсын сямен. Тросаз гожтэтъёсам ивортылӥ Удмуртия, удмуртъёс но асьме кумышка сярысь. Удмурт кумышка сярысь мынам аслам малпам мадёсэ но вань: кумышка — со песянайёслэн синкылиоссы.  Кузь сӥзьыл-тол ӝытъёсы удмурт песянайёс пукон коркаосын киуж ужало, кырӟало. Нош кырӟанъёссы сокем ӝожесь —  синвуэз потто. Тӥни озьы со кырӟанъёс бордысь ик вордске удмурт кумышка. Келям гожтэтъёсы уг берытско бере, озьыен отын кин ке соосты лыдњиз, калыкмы сярысь тросгес тодӥз.

— Тӥ пичи дырысеныды ик сыӵе аспӧртэм вал-а?

— Мон вордӥськи чугун сюрес дорысь ог 20 метр кемын — Балезиноын. пичи дыры пурысь вал, ачим туж возьдаськись, могаса вераськись вал. Бӧрысь гинэ тодӥ ни кужмо карин бигер выжыысь луэмме. Атае — Владимир Михайлович — ожгар вакытэ, 1942-тӥ арын, вордӥськем адями, аслаз бигер луэмез сярысь ӧз вералля. Бен, бен, вал вакыт, куке удмуртъёс гинэ ӧвӧл, бигеръёс но асьсэ выжызылэсь возьдаськизы. Ми улӥмы баракын, 9 квадрат метр висъетын 5 кузя.

Улонам туж бадӟым удалтон — Москваысь Суриков нимо институтын дышетскон. Огшоры институтын гинэ ӧвӧл, СССР-ысь Суредасьёслэн огазеяськонзылэн кивалтӥсезлэн Таир Салаховлэн мастерскояз. Та адями милемыз выль сямен ветлыны дышетӥз кадь.

— Бӧрсьысь бӧрсе 4 ӧтчамын тӥ Кун Кенешлэн депутатэз луиськоды ни. Тӥляд малпамдыя, кыӵе законъёс, адями сярысь малпаськытэк, лэсьтэмын?

— Тазалыкез утён удысъя. Азьвыл радлыклэсь куштӥським, нош выльзэ рос-прос кылдытыса ӧм вуттэ. Асьмеды кужмысь сямен донго коньдонэн эмъяськонэ. Но коньдонэн эмъясь медициналэн ӟечлыкез урод. Со дыре ик кун поликлиникаосын калыкез дунтэк эмъясь врачъёс жадемын. Мыным уг кельшы, эмъясьёсты али ваньмыз курлало шуыса. Ас вакытаз озьы курлазы милициын ужасьёсты, ярам, али югдур воштӥськиз. Тазалыкез утён удысын ужась шоры но гажаса учкыны мед быгатысалмы, оглом радлык ӟеч мед ужасал.

Юрттэт курыса, дорам трос адямиос вазисько. Тани огпол вуиз кышномурт — нылыз туж секыт висе. Мон Москваысь клиникаен вераськи, нылашез отчы эмъяны келямы. Со дырысен уно аръёс ортчизы. Кемалась ӧвӧл мон нош ик со кышномуртэн пумиськи, нылыз бурмем, дышетске ни, пе, Москваысь одӥгаз вузын. Туж шумпотӥ со понна.

— «Мынам Удмуртие» радиоын тӥляд «Карлутка» передачады вань. Таиз тӥледлы малы?

— Та передачаез ми Наталья Морозоваен ӵош меӵак эфирын нуиськом. Вераськиськом Удмуртиысь паймымон интыос, пӧртэм мадёсъёс сярысь. Ваньмыз та мыным аслым тунсыко. Трос кенешиськом удмурт кылэз но культураез утён сярысь. Одӥгаз эфирамы ӧтчам Алексей Загребин тодосчиез (али Кун Думаысь депутат). Со мадиз, кызьы шедьтэмын вал К. Гердлэн куараеныз гожъямъёс. Мон сыӵе пайми: макем небыт куараез вылэм сыӵе кужмо лул-сюлэмо югдытӥсьлэн!

Передачаез лэсьтӥсько таӵе малпанэн: мӧзмыт медаз луы. Соин ик тыршисько аслэсьтым но улонме тунсыкогес карыны. Шумпотӥсько, визьмо, эрико, выжызылэсь, кылзылэсь возьдаськисьтэм егитъёс шоры учкыса.

— Нош асьтэлэн нылды маин шумпоттэ?

— Со выре творчествоен. Ӟеч тодэ венгер кылэз. Дышетскиз Будапештысь технологияя но экономикая университетын. Огпол дорам лыктӥз но шуэ: мон удмурт кылэз дышето, мынам, пе, удмуртъёс пӧлын эшъёсы трос, соосын удмурт сямен вераськысал… Вормонъёсыз, проектъёсыз понна туж шумпотӥсько. Кылсярысь, эшъёсыныз ӵош Ижын со радъяз егит суредасьёслэсь «Говорит Ижевск!» адӟытонзэс.

Али егитъёс трос тунсыкозэ лэсьто, пӧртэм ужрадъёс, акциос, адӟытонъёс радъяло. Мон отчы учкись сямен гинэ ветлӥсько на, азьвыл вакытъёсы выллем, экспонатъёсты нуллоно уг луы.

— Трос пӧртэм адӟытонъёсты пӧлысь син шоры йӧтэ «Волки» нимамез. Кион ӵемысь герӟаське оген улонэн. Пыдлон лул-сюлмады тӥ — огнады?

— Котькуд адями ас пушказ — огназ. Оген луэмысьтыз ик, со ассэ пӧртэм арбериосын, коӵышъёсын-пуныосын котыртэ. Нош кионлы сӥзем ужъёсы шӧдтэк шорысь кылдӥзы. Мон туж яратӥсько пӧйшуръёсты. Соос сярысь ужъёсы трос.

Эшшо вераме потэ: ассэ гинэ яратӥсь, йырзэ урдыса ветлӥсь адями ноку творчествоен уз выры. Но суредэз суредаку, журналистикаын сямен ик, дырыз дыръя дугдыны быгатоно, эсэпсэ валано. Ужед бордысь пӧсям вулэн зыныз медаз шӧдӥськы, со кужмысь, пычкиськыса лэсьтэмын медаз луы.

Кивалтӥсьёс Пельмень-fest фестивальын пельнянь кутыны дасясько.

— Куд-ог ужъёсты секыт мылкыд кельто. Асьтэос тае шӧдӥськоды-а?

— Уг, но уноез верало. Тон, шуо, сыӵе сайкыт, улонэз яратӥсь адями, малы ужъёсыд сокем пеймытэсь? Оло, шуо, пичи дырысьтыд кыӵе ке шуккетъёс шӧдӥсько? Ма, мынам аслам но тодэме потэ творчествоелэсь ошмес синзэ. Мукет ласянь, ас вакытаз мон «Танатос» группае пырисько вал. Отысь эшъёсыным ӵош ми ӵемысь кулонэн шудылӥм. «Известия Удмуртской Республики» газетын ужакум, мынам кабинетам корос сылӥз. Вордӥськем нуналам адямиос лыкто ке, кузьымъёссэс со коросэ тырисько вал. Нош аслым кытчы ке шуак мыноно, кинэ ке маин ке ӟечкылано ке, секретарез курисько ни: мын ай, коросысь маке утчаськы, кыӵе ке кузьым шедьты…

— Кулон шоры сокем капчиен учкиськоды?

— Тодӥськоды-а, адямилэн кызьы улэмез валтӥсез уг луы. Валтӥсь интыын со, кызьы адями кулӥз. Тани улонысь кошкиз одӥгез эше, сюрс пала адями лыктӥз сое келяны. Пыраклы люкиськыку гинэ, валано, макем бадњым но макем кулэ адями кошке…

— Интернетысь вотэс бамъёстэс чаклано ке, ӵемысь азьпал радэ потэ Буддалэн тусыз. Малы?

— Буддизм философия туж матын удмурт калыклы. Мынам эше — суредась Сергей Орлов — буддист, улэ нюлэскын. Со пыр ик аспӧртэм мылкыдъёс мыным но пыӵало. Ижкарлэсь ог 40 иськемын нюлэскын мынам но коркае вань — аспӧртэм арт-нюлэс.  Отчы мон арнялы быдэ эшъёсыным ӵош вуылӥсько. Гур эстӥськом, турын-куаръёсын чай париськом, суредаськиськом, выль проектъёс сярысь вераськиськом. Улон кузя валтӥсь малпанэ — мӧзмыт гинэ медаз луы. Мон тодӥсько: пенсие потӥ ке но, асме пќртэм удысын эскеремысь, творчествоен выремысь уг дугды.

Елена Миннигараева

 

 

 

 

 

Удмурт Дунне
By Удмурт Дунне Апрель 6, 2017 17:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<