Элькун бюджетэ 2 миллиард манет ватсаськиз

Удмурт Дунне
By Удмурт Дунне 3 апреля, 2017 09:44

Дыраз кутэм ужрадъёс элькунмылы пайда ваёзы.

29-тӥ мартэ ортчиз Кун Кенешлэн 29-тӥ сессиез. Нуиз сое парламентлэн Тӧроез Владимир Невоструев.

2 миллиард манет ватсаськиз

Эскеремын 20 юанъёс, соос пӧлысь 11-ез — законъёслэн проектъёссы.

Эскерем законопроектъёс пӧлысь валтӥсез луиз 2017-тӥ но 2018-тӥ-2019-тӥ аръёслы бюджетэ воштонъёс пыртон. Кызьы валэктӥз коньдон ужпумъёсъя министр Станислав Евдокимов, воштонъёс нырысь ик герӟаськемын бюджет сярысь элькун законэз Россилэн законэныз тупамон каронэн но дуно бумагаос басьтонэн — тазэ улосъёслы ӵектӥз Россилэн Президентэз Владимир Путин.

— Бюджетлэн доход люкетэз ог 2 миллиард 206 миллион манетлы йылэ, — пусйиз коньдон ужпумъёсъя министр. — Со пӧлысь 1 миллиард 10 миллион палаез вуиз Россилэн бюджетысьтыз, со сяна, туэ 2 толэзь куспын элькунысьтымы промышленной предприятиос, чакламлэсь тросгес вуз поттыса, выт уногес люказы.

Бюджетлэн расход люкетэз йылоз ог 1 миллиард 935 миллион манетлы. Данакез со кошкоз социальной удыслы. Кылсярысь, вылӥ технологиосын эмъянлы ватсаськоз 40 миллион манетлэсь ятыр, 490 миллион манет пала — школаосын дышетскон интыос усьтонлы, та пӧлысь 97 миллион манетэн тӥрлык басьтэмын луоз Можгалан выль пуктћськись школалы. Ватсаса коньдон озьы ик учкемын гурт удыслы, спортзалъёсты выльдонлы но мукет.

Бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова, коньдон ужпумъёсъя министр борды итӥськыса, вераз:

— Бюджетэ воштонъёс туж умоесь. Пусйыны кулэ министерствоосмылэсь   Россиысь ведомствоосын ужаны быгатэмзэс. Талы луыса элькунмы Россиын юнматэм уно программаосы пыриськоз — та пумысен 37 огкылъёс гожтэмын. Озьы федерал казнаысь ватсаса коньдон вуоз, со юрттоз тазалыкез утён, дышетон, калыклы юрттэт сётон удысъёсын кылдэм ужпумъёсты сэрттыны-пертчыны.

Комиссиослэн выль кивалтӥсьёссы

Сессиын эскерем мукетъёсыз законопроектъёс герӟаськемын быръёнъёсын, пичи но шор ужбергатонэз азинтонэн. Юнматэмын дунтэм дунын улон инты басьтыны быгатӥсьёслэн списоксы — отчы шедизы ёрмыса улӥсь, трос нылпи будэтӥсь семьяос, сирота кылемъёс но эшшо кӧня ке категориосы пырисьёс. Егитэн табере лыдъясько 35 аресозь эмчиос, татчыозь 30 арессэс тырмытэмъёсты соос пӧлы ӧз пыртылэ. Озьыен, гуртэ ужаны мынӥсь тросгес егит специалистъёс юрттэт басьтыны быгатозы. Кызьы тодӥськом, элькунамы программа кутэмын. Соя элькун бюджетысь егит фельдшеръёслы одӥг пол 300 сюрс, врачъёслы 500 сюрс манет сётӥське.

2016-тӥ арлы йылпумъянъёс лэсьтӥзы на Адямилэсь правооссэ утёнъя уполномоченной Вениамин Соломенников но Ужбергатӥсьёслэсь правооссэс утёнъя уполномоченной  Александр Прасолов.

Кун Кенешысь Экономикаын политикая, промышленностья но инвестициосъя ялан ужась комиссиен табере кивалтоз Александр Мурашов. Нош Наукая, дышетонъя, культурая но егитъёсын ужан политикая ялан ужась комиссиез валтоз Ольга Черкасова.

Кыксылэсь но кандидатуразэс ӵектӥз парламентлэн Тӧроез Владимир Невоструев. Депутатъёс, лушкем куара сётыса, соглаш кариськизы. Со дыре ик ас мылкыд каремезъя мандатэзлэсь куштӥськиз депутат Рада Смаева. Озьы та вакытлы Кун Кенешын 2 мандат буш. Кун Кенешысь 5-тӥ ӧтчамысь депутатъёс ужалозы на туэ сентябрёзь.

Элина Кумачёва

Туспуктэм: udmgossovet.ru

Удмурт Дунне
By Удмурт Дунне 3 апреля, 2017 09:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<