Балезиноын улӥсьёс ӝожтӥськизы ФАП ӧвӧлтэм, юон ву, жуг-жаг куян пумысен

Удмурт Дунне
By Удмурт Дунне Апрель 25, 2017 13:37

Удмуртилэн Тӧроезлэсь ужзэ быдэсъясь Александр Бречалов кылем кӧснуналэ вуылӥз Балезино ёросэ. Котырес ӝӧк сьӧрын со вераськиз ёросын ву тудӟон вакытлы дасяськон, юон вуэн кылдэм югдурез тупатон но трос мукетыз сярысь. Озьы ик пумиськылӥз огшоры калыкен.

Балезиноослэн ӝожтӥськонъёссы трос.

ТудвуКылем арын Чупчи шур тудӟемен валче Балезино каргуртысь Лесобазаын улӥсьёс коркаосысьтызы пыжъёсын гинэ потаны быгатӥзы. Та вакытэ ульчаос шуръёслы пӧрмылэмын вал. Ву улэ сюриз 152 коркаосысь 1 сюрслэсь ятыр адями. Секыт адӟон палэнтӥ ӧз ортчы Татьяна Корепановалэсь юртсэ но. Cоин но, дыр, туэ но корка азьысьтызы пыжзы утялтэмын ӧвӧл,:оло, кулэ луоз.

Кылем арын сямен медаз луы шуыса, туэ бадӟым уж лэсьтэмын ни, со сярысь вераз Балезино ёрос йырлэн воштӥсез Василий Некрасов. Со шуиз: ортчытэмын кышкыт учыръёсты алонъя комиссилэн кенешонъёсыз, МЧС-ысь специалистъёсын, администрациысь ужасьёсын дышетонъёс радъямын, адямиосты огдырлы интыяны сэрегъёс висъямын, йӧ пуштытъямын Кожиль, Туктым гуртъёс котырын, Чупчиын усьтэмын вулэсь ӝуждалазэ чакланъя 2 пост, дасямын 4 пыжъёс но луо тырыны 1 сюрс 500 мешокъёс. Та вакытлы Чупчи 0,8 метрлы ӝутӥськемын, курданы мугъёс ӧвӧл ай.

Озьы ке но гань-гань кариськоно ӧвӧл, шуиз Россиысь МЧС-лэн Удмурт Республикая Валтӥсь управлениезлэн кивалтӥсез Пётр Фомин. Али ӵошкыт интыосысь лымы шунамын ни ке но, со трос на нюлэсъёсын. Куазь шуак шуныт кариськиз ке, лымы музъеме пыӵаса уз вутты но шуръёсы васькыны быгатоз. Соин югдурез спасательёс син азязы возё. Нюлэсъёсты инмысен чаклало беспилотникъёс, МЧС-ын кылдытэмын 94 оперативной группаос.

Александр Бречалов балезиноослы валэктӥз: сюлмаськытӥсь юанъёсын соос вазиськыны быгатозы таяз арняе ёросэ министерствоосысь вуэм специалистъёслы.

 

Юон ву

Балезиноос трос аръёс ӵоже курадӟо ини юон вузы урод луэмен. Каргуртын улӥсьёслэн коркаосазы ву лыктэ Чупчи шурысь, нош солэн пыдэсыз кырсёмемын ни. Али Инкуазез утёнъя но инкуазь узырлыкъёсъя министерство Чупчи шурлэсь пыдэссэ чылкытатыны но муромытыны проект дася. Со дась луыны кулэ август толэзьлы. Чылкытатон ужъёсты быдэстон понна ичизэ 150 миллион манет кулэ луоз. Гуртоослэн сюлмаськонзылы пум поныны вань мукетыз но луонлык. Та сярысь вераз инкуазез утёнъя но инкуазь узырлыкъёсъя министрлэсь ужзэ быдэсъясь Александр Нестеров. Балезиноысь гумыосы ву лэзьыны луысал Вылӥ Кестым месторождениысь. Отын суткалы быдэ 5,6 сюрс кубометр ву кошке, нош балезиноос нуналаз кулэясько 4,5 сюрс кубометрлы. Проект дасяны но скважинаос гудыны ог 200 миллион манет кулэ луоз, шуиз А. Нестеров. Но вань на эшшо одӥг могӟет: вуысь шедьтэмын кремний вещество. Вуэз солэсь чылкытатон понна ватсаса ог 55 миллион манет кулэ луоз на.

Ёросын кылдэм югдурен тодматскыса, Александр Бречалов шуиз:

— Балезино ёрос — одӥгез сюлмаськытӥсез. Соин арня вискын татчы Удмуртиысь министерствоосысь специалистъёс потозы. Соос арня ӵоже ёросын кылдэм шуг-секытъёсты пыр-поч эскерозы, собере тупатон борды басьтӥськом. Адӟомы, мае ӝегатскытэк лэсьтоно, мае кельтыны луоз вуоно аръёслы. Калыклэсь сюлмаськонъёссэ тупатон понна вань кужыммес сётом.

Озьы ик Александр Владимирович пусйиз: югдурез тупатонлы висъям котькуд манет интыяз мед кутӥськоз. Балезиноын быдэсъяськись ужъёсты син азяз возёз Тӧролэн но Правительстволэн администрациенызы кивалтӥсьлэсь ужзэ быдэсъясь Сергей Смирнов.

А. Бречалов ёрос кивалтӥсьёсты Балезиное пыронысь жуг-жаг гурезез утялтыны куриз.

Ӝожтӥськонъёс

Пенсионерка Нина Шиляева кӧня ке ар талэсь азьло оптимизациен сэрен ворсаськем ФАП-сы сярысь вераз.

— Балезиноез чугун сюрес кыклы люке, одӥг палаз ог 10 сюрс адямиос уло, — шуиз со. — ФАП-мы ворсаськемен йырин, пенсионеръёс но нылпиосын анайёс, курадӟиськомы больницае сюрыны.

Александр Бречалов кышномуртэз кылзӥз. Учком, мар быгатом карыны, шуиз.

Гуртоос курлазы куашкан калэ вуэм юртъёсысь адямиосты выль улон интые выжтон программая пуктэм коркаосты, веразы урод сюресъёс сярысь, ӝожтӥськизы, татчыозь ёрос йыртэк уло шуыса. Асьсэлэсь оскымон муртсэс но ӵектӥзы. Балезиноысь одӥгез егит анай ёросазы удмурт кылэз азинтон сярысь юаз. А. Бречалов шуиз: Удмуртиын трос пӧртэм калыкъёс уло ке но, нырысь ик саклык висъяськоз удмурт культураез утёнлы но азинтонлы.

Александр Бречалов балезиноослы валэктӥз: сюлмаськытӥсь юанъёсын соос вазиськыны быгатозы таяз арняе ёросэ министерствоосысь вуэм специалистъёслы.

Ангелина Снигирёва

Туспуктӥз Э. Карипов

 

Удмурт Дунне
By Удмурт Дунне Апрель 25, 2017 13:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<