Никита Ильин нимо музейын люкамын Улын Юриысь вашкала арбериос

Удмурт Дунне
By Удмурт Дунне 5 апреля, 2017 08:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Людмила Ильинична музеен кивалтэ, нош Михаил Никандрович кузпалызлы юрттӥське.

Пичи Пурга ёросысь Улын Юри гуртысь Никита Ильин нимо музейын калыкез капчи мылкыдын пумитало Людмила но Михаил Фёдоровъёс.

Музей нылпи садэн одӥг липет улэ интыяськемын. Азбараз пырыку ик, син шоры йӧтэ вашкала кенос. Отын уробоос, дӧдьыос, куиськон станокъёс, канаос но уно пӧртэм арбериос сыло.

— Школаын дышетскись нылпиос музее ӵем вуыло, куддыръя урокъёссэс но татын ик ортчытъяло, — вера Людмила Ильинична. — Вашкалаосмылэсь улэм-вылэмзэс, ужан тӥрлыксэс но дӥськутсэс нылпиос паймыса ик учкыло. Мукет гуртъёсын улӥсьёс но экскурсиосы ӵем  вуыло, вашкала арбериостэс утиды, тус-тас карыны ӧд сётэ, шуо. Таӵе данъяськымон но дуно кузьым — музей — гурт калыкезлы кельтӥз Никита Ильин, туэ солы 85 арес тырмысал. Ми пиналъёсын ӵош гурт кузя, пересьёслэсь юалляськыса, вашкала арбериосты, дӥськутъёсты но туспуктэмъёсты бичаса, ветлӥмы. Тани та кузесь ӟусъёсты Тихон Тихонов сётӥз вал. Арлыдоос али ке но жалятэк ваё куэм дэремъёссэс, пужъятэм но чильпам ӵушконъёссэс, ӝӧккышетъёссэс, валес котырзэс. Мар, пе, юнме соосты сандыкын возёд, музейын коть адямиос адӟозы.

Бичам тӥрлыкмы трос луэм бере Никита Ильич комната куриз. Гуртлэсь но «Кизили» колхозлэсь (бӧрысь со Киров нимо луиз) историзэс, ож лудэ ветлэмъёс,  гуртын улэмъёс но со вакытэ улӥсь адямиос сярысь трос материал люказ. 1650-тӥ арысен кутскыса 2002-тӥ арозь Юлдаш выжыезлэсь пушъетъёссэ шедьтӥз. Ми но школаын дышетскись нылпиосын ӵош музон выжыосысь адямиос дортӥ ветлӥмы. Та музеймы дэмен кылдытэмын, табере сое утьыны гинэ кулэ ини.

Музейысь адӟыны луэ данэ потэм адямиоссылэсь тусбуйёссэс. Соос пӧлын Удмуртиысь дано артистка Екатерина Яковлева, Россиысь культура удысысь дано ужась Екатерина Антонова, кылбурчи но тодосчи Георгий Архипов, подполковник Семён Дмитриев но мукетъёсыз.

Любовь Тихонова

Удмурт Дунне
By Удмурт Дунне 5 апреля, 2017 08:45 Updated