Якшур-Бӧдья черкогуртын гурт шудонъёс ортчизы

Удмурт Дунне
By Удмурт Дунне Март 2, 2017 16:54

Кылем арня пумын шаерысьтымы гурт спортсменъёс Якшур-Бӧдья черкогуртэ люкаськылӥзы. Отын ортчизы 23-тӥосыз Гурт тол шудонъёс, медальёс понна  902 мурт нюръяськиз.

5 иськеме бызьылонын вормизы Д. Леконцева, В. Главатских, Д. Белослудцева. Стартэ пото воргоронъёс.

Лэсьтэменыз уг буйгало

23-тӥ феврале трос калык люкаськиз ёрос центрысь стадионэ. Нырысь ик сӥё-дано усьтӥзы выльдэм куас базаез но йӧ площадкаез. Ужрадэ люкаськемъёслы шуныт кылъёс веразы но спортын бадӟымесь вормонъёс сӥзизы Удмурт Республикалэн Тӧроез Александр Соловьев, Кун Кенешлэн Тӧроез Владимир Невоструев, шаерысьтымы нимо-дано спортсменъёс Галина Кулакова, Тамара Тихонова, Нина Парамонова, Якшур-Бӧдья ёрослэн йырыз Андрей Лекомцев но мукетъёсыз.

Кызьы пусйиз Александр Соловьев, та шудонъёсты ортчытон Удмуртиын сяме пыӵамын ни, ӟеч ужлэсь азьланяз но ум куштӥське. Гурт шудонъёс шаерамы арлы 2 пол ортчо, куно пумитась ёрослы стадион яке куас база лэсьтӥське. Таӵе ӟеч уженыз Удмурт шаер мукет улосъёслы но адӟем карымон луэ.

Атайёс ворттылыто семьязэс.

Якшур-Бӧдьяысь тэль дурын сылӥсь куас база 2 поллы паськытаз. Куа-сэн бызьылӥсьёс сяна, отын кылиськыны-дӥсясь-кыны быгатозы хоккеен шудӥсьёс но. Нош шудозы соос шобыртэм йӧ площадкаын. Табере тренеръёс но хоккеистъёс ӟигарзэс уз быдтэ ни, йӧ площадкаез лымылэсь сузяса. Куа-сэн бызьылӥсьёс мугорзэс кыдатыны быгатозы югдытӥськись куас сюрес вылын.

Якшур-Бӧдья ёросысь спортсменъёс шаерысьтымы кужмоосыз пӧлы пыро. Соин ик лэсьтэменыз гинэ мылкыдзы уг буйга. Соослэн туж потэ на югдытӥськись сюрестћзы гужемзэ питрано куасъёс вылын бызьылэмзы, нош йӧ площадкаын быдэс ар ӵоже конькиен нискыламзы. Бӧдьяослэсь сюлмаськонъёссэс шаерысьтымы вылӥ кивалтӥсьёс кылӥзы, оскытӥзы, черкогуртысь спортъя объектъёсын лэсьтӥськон ужъёс азинтэмын луозы шуыса.

10 иськем бере.

   5-тӥ элемент

Гурт шудонъёслэн утисьсы — Оскон кизили. Ӵапак та кизили, 5-тӥ элемент выллем, огазея малпанэз, ужез, кужымез, осконэз но спортэз. Оскон кизилие нуись куас сюрес вылын эшшо 24 пичи кизилиос пишто. Озьы вань ёросъёс югдытӥзы кадь Якшур-Бӧдья ёросэз.

23-тӥ Гурт шудонъёсыз усьтонэ люкаськизы вань ёросъёсысь командаос. Тросэз синмаськыса учкизы Кияса но Кизнер ёрос командаос шоры. Соослэн чебер дӥськутсы вань спортсменъёслэсь вормон мылкыдзэс пуромытӥз кадь. Гурт шудонъёслэсь флагзэс ӝутӥзы но тылзэ ӝуатӥзы Якшур-Бӧдья ёросысь тужгес нимо-дано спортсменъёс.

Хоккей. Вормизы Дэри, Вотка, Балезино ёросъёс, Якшур-Бӧдья — 4-тӥ интыын.

Ужрадэз усьтон рос-прос радъямын вал. Дасяллям ас кужыменызы. Кызьы ивортӥз ёрос администрациысь культурая, егитъёсын ужанъя но спортъя управлениен кивалтӥсь Елена Тимофеева,  ужрадэз сӥё-дано усьтонэ 300-лэсь трос адями пыриськиз, 4 толэзь пала репетициосы ветлӥзы. Соосты радъязы режиссёр Алексей Барышников но хореограф Светлана Кайсина. Одӥгез ӝож: ӧз шӧдӥськы удмурт шӧм. Сцена вылэ бӧдья выжыос удмурт дӥсен потыку, куриське на вылэм удмурт крезьгур. Жаляса верано, Якшур-Бӧдьяысь Гурт шудонъёсыз усьтон нуналэ но, бӧрысь но удмурт кыл ӧз чузъяськы. Мукетыз но ӝоже уськытӥз: Гурт шудонъёсыз учкыны калык ичи люкаськылӥз, хоккеез вератэк. Якшур-Бӧдья ёрослэн командаез шудыку таяз гуртъёсысь но лыктылэмъёс вал.

Тужгес пичиез пинал 8 аресъем Софья Санникова анай-атаеныз.

Вормонъёс но келянъёс

Гурт шудонъёс ортчон нуналъёсы спортсменъёслэсь чиданлыксэс одно ик эскере на куазь. Таяз учыре но выль усем лымы но пельтӥсь тӧл куасэн бызьылӥсьёслэсь трос кужымзэс быдтӥзы. Куд-ог ёросъёслэн нимысьтыз куас дасясьёссы вань, тупась мазь быръё ке, спортсменъёссы капчиенгес бызё. Ӵошатсконлэн нырысетӥ нуналаз командаен спринт дыръя йӧкурам куас сюресъёсысь тросэз пезьдылӥзы, пыдзэс вольтчытӥсьёс но вал. Мукет нуналъёсаз куасэн бызьылӥсьёсты выль лымы катьтэммытӥз.

Кылем арен ӵошатыса, куасэн трослы кужмогес бызьылӥзы ке но, выль рекордъёс пуктэмын ӧй вал. Угось шаерысьтымы тросэз спортсменъёс та вакытэ пырисько Россиын, Европаын но дуннеын ортчись ӵошатсконъёсы.

Вормисьёс

Спортзалъёсын но омыр ӟырдамын вал. Кечато пул сьӧрын нюръяськисьёс пӧлын нырысьсэ вормисьёс радэ шедизы Красногорск ёросысь шахматэн но Юкаменск ёросысь шашкиен шудӥсьёс. Баскетболэн шудон но арысь аре кужмоя. Воргоронъёс медаль понна нюръяськизы 2 арнялы азьпал Ижысь гурт хозяйствоя академилэн спортзалаз. Нылкышноос пӧлын тужгес кужмоосыз вал Алнаш но Ува ёросъёсысь командаос. Якшур-Бӧдьяын соос 2 пол пумиськылӥзы. Нырысетӥ шудон дыръя кужмогес вал алнашъёс. Ӵапак та командаос ик зарни медаль понна но нюръяськоно луизы. Таяз учыре ини уваос вормизы.

Кызьы пусйи ни, тужгес трос калык люкаськылӥз хоккеен шудонэз учкыны. Арлы быдэ та ӵошатсконъёсы вуылӥзы Дэри, Вотка, Глазов, Эгра ёросъёсысь командаос. Таяз учыре эграос воксё но финалэ ӧз шеде. Нош Глазов ёросысь хоккеистъёс 6 кузя гинэ лыктӥллям: 4-ез — шудӥсьёс но 2-ез — капка возьмасьёс. Чик вошъяськытэк шудыса но, вань командаослы кужмо пумитъяськизы.

Жаль, бӧдьяослы асьсэлэн йӧзы ӧз юртты, удалтонлыксы ичигес вылэм, лэся. Сотэк кызьы валэктод на Якшур-Бӧдья но Дэри командаослэсь шудэмзэс. Пумиськонзы йылпумъяськытозь 50 секунд кыльыку, азьпалан вал на бӧдьяос. Но дэриос шудонлэсь лыдзэ 1:1 каризы, эшшо ке буллитъёс дыръя азьпала потӥзы. Озьы тӥни Дэри ёрослэн командаез зарни медаль басьтӥз. 2-тӥ луизы Воткинск ёросысь хоккеистъёс, 3-тӥ — балезиноос, нош Якшур-Бӧдья ёрос — 4-тӥ гинэ.

Арлы быдэ Гурт шудонъёс дыръя синмаськыса учкисько семьяос шоры. Таяз учыре но тросэз соос 2-тӥ яке 3-тӥ нылпиосынызы вожвылъяськизы ини, тужгес пичиезлы пиналлы — Каракулино ёросысь Софья Санниковалы — 8 арес вал. Кузпалъёсты Алёна но Сергей Санниковъёсты нылзы, пе, спортэ кыске.

Гурт шудонъёс-2017: Инты но дыр

 Паймонъёс, вуоно пумиськонъёс

Гурт шудонъёс дыръя спортсменъёс ӝожтӥськыло сиёнлы. Таяз учыре озьы ӧй вал — пӧрасьёслы ваньмыз тау каризы. Якшур-Бӧдьяе люкаськем калыкез ческыт сиёнэн шумпоттӥзы Ижысь пӧрасьёс. Технолог Наталья Ложкина ивортэмъя, Гурт шудонъёсы 4 нуналлы городысь 14 пӧрасьёс вуылӥзы. Сьӧразы вайиллям ужан тӥрлыксэс: тусьтыос, шыд но ӝук пӧзьтон пуртыос. Котькуд спортсменлэн рационэз чакламын вал нуналаз 3,5 сюрс калорий тыр.

Мукетыз паймон учыр вал вормисьёсты данъян дыръя. Зарни медаль басьтӥсьёс понна чузъяськиз ёроссылэн гимнэз, нош экран вылын возьматӥськиз ёроссылэн гербез. Со сяна, та шудонъёс азьын нырысьсэ калыклы возьматэмын вал «Удмуртия» издательствоын печатлам «Сельские игры в Удмуртии» книга. Солэн авторъёсыз —  гурт хозяйствоя кун академиысь профессор Николай Соловьёв, Гурт шудонъёсыз кылдытӥсь, калыккуспо категориен судья Вячеслав Беляев но комментатор Игорь Ильин. Нырысьсэ та книга поттэмын вал 2008-тӥ арын. Быдэсак выльдэм книгаез нырысь ик кузьмазы журналистъёслы но нырысетӥ тол шудонъёсыз  радъясьёслы.

23-тӥосыз Гурт шудонъёс йылпумъяськизы. Та ӵошатсконъёсын 14-тӥзэ вормиз Эгра ёросысь команда. 2-тӥ но 3-тӥ группаын вормись луизы Якшур-Бӧдья но Юкаменск ёросъёсысь командаос. Вуоно тол шудонъёс ортчозы Пичи Пурга черкогуртын.

Ӵапак та нуналъёсы Новосибирск улосын кутскозы Россиысь гурт спортсменъёслэн 8-тӥ тол шудонъёссы. Шаермылэсь данзэ отын утёзы Якшур-Бӧдья ёросын вормисе потэмъёс — Юкаменск, Можга, Шаркан, Дэри но Эгра ёросъёсысь спортсменъёс.

Валентина Емельянова

Удмурт Дунне
By Удмурт Дунне Март 2, 2017 16:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<