Война вае курадӟон

Удмурт Дунне
By Удмурт Дунне Март 22, 2017 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Нырысетӥ дунневыл ож дыръя быдэс дуннеысь 8 миллион пала мурт пленэ шедьылӥз. Герман пленэ сюрылэм Удмуртиысь Азарий Шкляев. Россиысь социал-демократической партие пыремын 1903-тӥ арын, большевикъёс сое Лазарь шуо вылэм.

100 ар талэсь азьло, 1917-тӥ арын, феврале но октябре революциос вал. Соослэн мугъёссы сярысь тодыны луэ «Удмуртия Нырысетӥ дунневыл ож аръёсы: революцие сюрес» лекциосын. Толэзяз огпол соосты Ижын ортчытэ история наукаосъя доктор, Кун Думаысь депутат Алексей Загребин пӧртэм тодосчиосын ӵош.

Крестьян улон

— 20-тӥ даурлэн кутсконаз Удмуртиысь калык выриз музъем ужен, — вера Удмурт кун университетысь доцент, история тодосъя кандидат Анна Субботина. — Герман ож потэм бере ӵапак крестьянъёс нырысь ик вуизы сборной пунктъёсы. Ож возьматӥз шаерысьтымы экономикалэсь тырмымтэоссэ, ляб интыоссэ. Асьме дорысь трос сиён-юон, шуныт дӥсь фронтэ кошкылӥз. 1916-тӥ арын ялӥзы на продразвёрстка — котькуд крестьян кунлы сиён-юон, ю сётыны кулэ вал юнматэм дунын. Тросэз соку туж умой валазы, мар со сыӵе сютэм улон но висёнъёс.

— Продразвёрстка ялэмын вал ке но, фронтын сиён-юон, ож тӥрлык ӧз тырмылы, — вера Алексей Загребин. — Россия войналы дась ӧй вал угось. Патронъёс ыбылыса быризы. 1915-тӥ арын асьме солдатъёс тушмонлэн 10 ыбемезлы пумит огпол гинэ ыбыны быгато вал. Уно солдатъёс быризы, армия Варшава дорысен Ригаозь чигназ.

Фронтысь асьме палъёсы вуылӥзы сӧсырмемъёс, пегӟисьёс (беженцы), пленэ сюремъёс. Югдур секытгес но секытгес луиз. Пленэ басьтэмъёслэн лыдзы ялан будӥз. Соосты нырысь кунмылэн кыдёкысь улосъёсаз лэзьязы, бӧрысь Россилэн шор улосъёсаз гинэ келяллязы ни, ужатӥзы.

— Шугъяськонъёс кылдӥзы эмъян удысын, — веранзэ азьланьтэ Анна Субботина. — Уноез врачъёс но фельдшеръёс кошкизы ож лудэ. Соин валче шаерамы оспаен но тифен висисьёслэн лыдзы шӧдскымон будӥз. Эмъясьёс тырмымтэен, йӧнатон понна уксё басьтыны ӧдъязы (отчыозь со котьку дунтэк вал), больницаосысь йӧнатӥськон интыосты кулэстӥзы. Югдурез кызьы ке тупатон понна лэземын вал берпуметӥ курсъёсын дышетскись студентъёсты йӧнатон уж борды басьтӥськыны.

Ижын лекциос ортчытъя история наукаосъя доктор, Кун Думаысь депутат Алексей Загребин пӧртэм тодосчиосын ӵош.

Вылӥ кивалтӥсьёс вань та шуг-секытъёсты, кылдэм югдурез адӟытэк-валатэк ӧз улэ, но мае ке воштыны ӧз дыртэ.

Гуртъёсын но каръёсын кылдылӥсь унозэ юанъёсыз сэрттыны-пертчыны оскемын вал земствоослы — интыысь аскивалтонлы. Соос сюлмаськизы ожгарчиослэн семьяоссылы юрттэт висъян пумысен, озьы ик радъяллязы лыдӟиськыны дышетонэз. Герман ож кутскемлэсь азьло грамотаез тодӥсьёс туж ӧжыт вал. Но оже кошкемъёс доразы гожтэтъёс лэзьяны кутскизы но, соосты лыдӟон понна дышетскыны мылкыд карисьёслэн лыдзы шуак будӥз.

Заводъёс — фронтлы

Нырысетӥ дунневыл ож вакытэ но шаерамы ож тӥрлык потто вал.

— Война кутскыку, Россия империысь 3 бадӟым заводъёс пӧлысь одӥгез асьме дорын интыяськемын вал, — вера Ижысь техникая кун университетысь история тодосъя кандидат Светлана Рябая. — Соку Ижын ож тӥрлык поттӥсь но корт ӵыжатӥсь заводъёс ужазы, Воткаын — корт лэсьтӥсь завод. Со сяна, трос заводъёс дасязы пыдкутчанъёс, кылсярысь, гын сапегъёс. Эшшо вылӥллям на нимаз пичи фабрикаос, соосты возиллям бай адямиос. Сыӵе фабрикаосын потто вылэм пӧйшуран пыӵал.

Нырысетӥ дунневыл ож та заводъёслэн ужазы воштонъёс пыртӥз, угось Тулаысь но Сестрорецкысь бадӟым предприятиос ӧз вуттэ ни быдэс армилы пыӵал поттыны. Соин асьме заводъёс кутскизы ож тӥрлык лэсьтыны, тросгес — винтовкаос но патронъёс, нош Воткинскын — гранатаос. Уж зол мынӥз, заводъёс дугдылытэк ужазы. Но бадӟым шугъяськонъёс кылдӥзы сюрес ӧвӧлэн: 1916-тӥ арын гинэ Ижозь чугун сюрес лэсьтӥзы, соиз но чакламын вал ож тӥрлыкез фронтэ нуллон понна гинэ.

Заводъёс фронтлы эшшо золгес юрттыны быгатысалзы, отысь устооссэ ужасьёсыз оже ӧй басьтысалзы ке. Интыысь кивалтӥсьёс трос пол вазиськылӥзы, соосты берыктыны курыса. Куронзэс быдэстыны луонлыкъёс ӧй вал. Соин гуртэ кылем 16 аресысен 55 аресозь адямиосыз заводъёсын ужаны косӥзы. Со понна уждун ӧз тыриськы. Ужан нунал кузьгес каремын вал. Озьыен, быдэс Иж но Вотка тыршизы вормонэз матэктытон понна. Соин валче калыклэн вожпотонэз будӥз: уксё уг тыро, нош дунъёс ожлэн нырысетӥ нуналъёсаз ик вылӥе лобӟизы. Кылсярысь, война кутскон азьын 10 курегпуз сылӥз 4 копейка, нош война пумын — 1 манет. Фронтэ шуыса огшоры калыклэсь сиён-юонзэ, дӥськутсэ талаллязы. Вазиськиллям вылэм купецъёслы, машинаоссэс курыса. Но ас мылкыдызъя одӥг вузчи но со быдӟа ваньбурзэ сётымтэ.

Трос ужъёсы пленэ сюремъёсыз но кысказы, но Вотка заводэ соосты ӧз лэзьылэ — асьсэ армизылы пумит гранатаос лэсьтыны оскод-а? Нош Сарапул но Елабуга уездъёсысь заводъёсын пленэ шедемъёсты но ужато вылэм.

— Нырысетӥ дунневыл ож дыръя адямиос валазы: ми асьмеос асьмеды быдтыны быгатӥськом. Со вакытэ малпам ож тӥрлыкен вакчи дыр куспын сюрсъёсын-сюрсъёсын муртъёсты виылыны луэ ни вал, — вера Алексей Загребин.

Елена Рябина

Туспуктэм басьтэмын  Удмуртилэн туала историезлэн документациезъя центрысь

Удмурт Дунне
By Удмурт Дунне Март 22, 2017 15:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<