Университет бере — гур сьӧры

Удмурт Дунне
By Удмурт Дунне Март 10, 2017 11:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Н. Гумлы пӧраськисьлэн дӥсез тусызъя, нош ужез — сюлмызъя.

Сӥзьылысен ужасько Ижысь огаз барын, пӧраськисько. 

Школа бере мыным тунсыко вал удмурт кыл, соин дышетскыны мынӥ Удмурт кылосбуръя факультетэ. Нош армия бӧрсьы малпанъёсы воштӥськизы, улонын маке выльзэ эскереме потӥз. Уж утчаны кутски — одӥгаз баре пӧраськись кулэ вал.

Мыным котьку кельше вал пӧраськыны, маке киосын лэсьтыны, со дыре ик трос адямиос азе ӵем потатэк, соосын вераськытэк. Та уж мыным ӵапак тупаз. Кин ке вералляз, кухняын секыт йӧтоз, пуксьыны но дырыд уз луы. Малпасько вал, соос пӧясько шуыса, нош али валасько — секыт. Ужано 13 час, быдэс нунал пыд вылын, шутэтскон нуналъёсы нош — 16 час.  Куддыр тон 3-4 час ӵоже пуксьыны но, гур сьӧрысь палэнэ вамыш но лэсьтыны уд быгатӥськы — дырыд ӧвӧл. Огпол ужай 7 нунал ӵоже ӵукнаысен ӝытозь, ӵыдэтскытэк. Секыт йӧтӥз.

Пӧраськон табере хобби ӧвӧл ни. Студент дыръям  эшъёсме печенняосын шумпоттылӥ. Ческыт шуыса ушъяллязы, ӵемгес пӧралляны курылӥзы. Одӥгез почта пыр но келяны косӥз вал… Одессае. Кыдёкын, куке но пумиськыкумы, куноято ай, шуи. Пичи дыръям мамалэсь пыжиськемзэ учкисько вал. Со ческыт бисквит лэсьтылӥз. Кури дышетыны, мама дорын ӧз луы ке, мон аслым ачим сое пӧраны но сиыны мед быгатом шуыса.  Со бӧрсьы дыши печення пыжыны, ӵемысь шутэтскон нуналъёсы гур сьӧрын бергасько вал, аслым но кельше, мукетъёсызлы но умой. Нош али аслым но маке ческытсэ пӧраны дыры ӧвӧл ни. Каньылзэ гинэ лэсьтӥсько: губиен картошка, шыд, макарон. Уж дорын но маке аслэсьтыдзэ пӧраны уг пӧрмы —  менюысь сиёнэз дышем сямъя лэсьтоно, кызьы кулэ, тон солэсь туссэ гинэ мукет карыны быгатӥськод.

Мон яратӥсько курыт яке чырс-гольтрес шӧмо сиёнэз. Уг яраткы сугонэз но йӧлэз — сугонлэн зыныз кӧш, йӧлэз мон уг юиськы. Ачим меню лэсьтысал ке, отын трос луысалыз парсь сӥлен сиён, ыль чорыг (сашими), кӧня ке пыжиськем. Мукет ласянь, менюез малпаны кулэ заведенилэн куронъёсызъя. Удмурт ресторан усьтӥд ке, одӥг пельнянен но перепечен гинэ калыкез уд кыскы. Вал ук «Перепечкин» кафе, кема ӧз ужа, пытсаськиз. Маке выльзэ но тунсыкозэ малпаны кулэ, со дыре ик ӧвӧл вунэтоно вужзэ.

Зэмзэ ке, мон али уг валаськы, мар мыным кулэ. Быръем сюрестӥм ик мыноно ке,  ачим кадь ик адямиосын эшъяськоно, нош кыл тупатыны мыным секыт.  Азьланяз, оло, маке воштӥськоз.

Никита ГУМ

 

 

Удмурт Дунне
By Удмурт Дунне Март 10, 2017 11:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<