«Удмурт пиналлы — удмурт выжыкыл» конкурсын вормисьёс быръемын

«Лудкеч но эбек» выжыкылэз лыдӟе Наталья Крюкова Софья нылызлы

«Удмурт нылкышно кенеш» кылем арын, Анайлэн нуналызлы сӥзьыса, Интернетын ялӥз вал «Удмурт пиналлы — удмурт выжыкыл» конкурс. Акция ӟечен лыдъямын но азинтэмын вал праздник бере но.

Анай-атайёс нылпиоссылы удмурт кылын выжыкыл лыдӟемзэс пуктыса, Интернетэ поттӥзы. Берло со ужъёс понна куаразэс сётъязы огшоры адямиос. «Тужгес устоез выжыкыл лыдӟись» ним понна вожвылъяськиз 7 адями. Алигес конкурслы йылпумъянъёс лэсьтэмын. Озьы, 927 куара люкаса, нырысетӥ интые потӥз «Курка, ӵӧж но мукетъёсыз» выжыкыл. 786 адями дурбасьтӥз «Лудкеч но эбек» понна, 3-тӥ инты утӥз «Кескич шырпи» выжыкыл, со 724 муртлы кельшем.

— Куара сётон, лайкъёс, перепостъёс удмурт лулчеберетэз азинтонын туж кулэ, — вераз «Удмурт нылкышно кенешлэн» кивалтӥсез Надежда Степанова. — Пичи уж бордысен кутскыса, бадӟым гурезез берыктыны луоно. Выжыкыл пыр анай кылмы котькуд коркае, семьяе пырыны мед быгатоз.

Конкурсын вормисьёсты пусъён ортчоз 6-тӥ оштолэзе Ижысь Эшъяськон юртын «Удмурт нылкышно кенешлэн» «Табань-клубаз». Отчы ӧтемын конкурсэ вань пыриськемъёс.

Ангелина Снигирёва

Видео-ужъёсын тодматскыны луоз  Мамины сказки — Анай выжыкыл вотэс бамысь