«Удмурт Кенеш» огазеяськонлэн ужаз пыриськись визьмо, йӧно нылкышноос сярысь

Удмурт Дунне
By Удмурт Дунне Март 10, 2017 13:33

Татьяна Ишматова, «Удмурт Кенеш» огазеяськонлэн тӧроез

Котькуд огазеяськонлэн аслаз дано адямиосыз вань. Нылкышно нунал азьын вератэк кельтыны уг луы «Удмурт Кенеш» огазеяськонлэн ужаз пыриськись визьмо, йӧно нылкышноос сярысь.

Ассоциацилэн кылдон вакытысеныз удмурт нылкышноос выризы югдытон, калыкез огазеян ужъёсын. Солэн историяз пыраклы кылемын Надежда Бочкарёва, Елена Ботникова, «Удмурт Кенешен» огвакытэ кивалтэм Роза Яшина, ёросъёсысь азьветлӥсьёсты басьтоно ке — Нина Образцова, Мария Ишматова, Надежда Золотарёва, Надежда Пахомова но трос мукетъёс. Пушказы тэрисьтэм мылкыдзэс соос удмуртлыкез азинтонлы сётӥзы. Али но визь-кенешен юртто.  Пусъеме потэ на Правительстволэн Тӧроезлэсь азьвыл воштӥсьсэ Антонина Лисинаез. Со общественной ужен меӵак ӧз выры ке но, туж трос лэсьтӥз  удмурт движенилы юрттон понна, калыкмылэсь сюлмаськонъёссэ матэ карылӥз. Солэсь лэсьтэм ӟеч ужъёссэ али но тодамы возиськом, тау кариськом.

«Удмурт Кенеш» огазеяськонэн кема аръёс ӵоже кивалтӥзы пиосмуртъёс. Но бордазы котьку ужазы нылкышно воштӥсьёссы: Нина Малых, Галина Шушакова, Ирина Шеда-Зорина…

Вератэк уг луы «Удмурт Кенешлэн» бурд улаз ужась «Удмурт нылкышно кенеш» сярысь но. Удмурт нылкышноослэсь движенизэс ас вакытаз кылдытӥз Татьяна Корнилова. Кема дыр ӵоже та огазеяськонэн кивалтӥз Людмила Христолюбова. Жаль, та тодосчи улонысь вазь кошкиз. Удмурт движениез пушкытӥз со кадь ӟеч тодӥсь адямимы асьмелэн ӧвӧл ни.

Нош кыӵе ужаз Галина Никитина! Кӧня ёросъёсы потаз, калыкез ӝутъяны, бурдъяны быгатӥз. Удмурт движение пыриськись нылкышноос соослэсь адӟем карыны кулэ.

Та тулыс нуналъёсы котькудӥзлы сӥземе потэ пуксисьтэм мылкыд. Мылкыд вань ке, гурезьёсты но берыктыны луэ. Бадӟым тау кареме потэ вань нылкышноослы, та улонмес шулдыргес, чебергес каро шуыса. Чебер мед луом вылтусмыя но, лул-сюлэммыя но. Удмурт нылкышнолэн йӧнлыкез, сабырлыкез котьку мед паймытозы.

Туспуктӥз А. Горбунов

 

Удмурт Дунне
By Удмурт Дунне Март 10, 2017 13:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<