«Удмурт Кенеш» огазеяськонлэн Елабугаысь ёзэз ужзылы йылпумъянъёс лэсьтӥз

Удмурт Дунне
By Удмурт Дунне 20 марта, 2017 08:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт Кенеш» огазеяськонлэн Татарстанысь Елабуга городысь ёзэз  йылпумъянъёсъя но быръёнъя кенеш ортчытӥз, нош ӝытазе сӥё-дано пусйиз «Инвожо» ансамбльлы 10 ар тырмонэз. Ужрадэ вуылӥзы «Удмурт Кенешлэн» тӧроез Татьяна Ишматова но Татарстанысь удмуртъёслэн национально-культурной автономизылэн кивалтӥсез Александр Герасимов, солэн воштӥсез Марианна Иванова.

Елабугаысь удмуртъёс нырысьсэ огазе люкаськизы 2007-тӥ арын, нош 2010-тӥ арын Татарстанысь удмуртъёслэн национально-культурной автономизылэсь Елабугаысь филиалзэ пусйизы.

Огазеяськон возиське «Инвожо» калык ансамбль котырын. Отчы 14 адями ветлэ, пӧлазы вань ни егитъёс но. Соостэк уг ортчы городысь но ёросысь одӥгез но шулдыръяськон ужрад. Кылем арын пыриськизы Казаньын ортчем этнофутуризмъя калыккуспо симпозиуме, отын возьматӥзы «Выль кен басьтон» йылолэз. Уг вунэто  вордӥськем шаерзэс — Удмуртиез но: арлы быдэ пырисько  Гербере, 2014-тӥ арын вуылӥзы «Быг-Быг» фестивале. «Инвожоос» удмуртлыксэс  клубын, сцена вылын гинэ уг возьмато, сое тросгес калык пӧлы потто — озьы Елабугаын Удмурт культуралэн нуналъёсыз дыръя Грак ёросысь Вуж Эгра гуртысь  «Жильыртӥсь ошмес» ансамбльысь эшъёсынызы ӵош пырак ульчаын концерт возьматӥзы, вӧзтӥзы ортчисьёс, вань ужзэс вунэтыса, удмурт концерт учкизы.

Ансамбль  3 ар ӵоже гинэ аслыз калык ним басьтӥз. Табере соос городын нимо-дано артистъёс. Кылдэмзы дырысен 80 ужрадэ пыриськемын! 2015-тӥ арозь ансамблен кивалтӥз ӟуч кышномурт Людмила Фуженкова.

— Вань эшъёсы паймо вал, кызьы ог-огмес валаськом. Сюлэм огкадь кырӟа ке, валано вылэм, удмурт нылкышноосын туж тупаса улӥм, — тодаз вае со ужан аръёссэ.

Ансамбльысь арганчи — бигер, но удмурт кырӟанъёсты, пе, асламъёсызлэсь но зол яратӥсько.

Али  ансамблен, огазеяськонэн сямен ик, кивалтэ  Нина Колесникова. Нина Васильевна — Алнаш ёросысь,  Елабугаын пинал дырысеныз улэ, пӧртэм ужын ужамын, но кырӟамысь ноку ӧй дугдылы, шуэ. Шаплы кышномуртэз татысь ёрос кивалтӥсьёс но кыдёкысен тодмало, угось со, бигер городын улэмзы шоры учкытэк,   удмуртъёс сярысь вунэтыны уг сёты. Мар бен, сюлмаськемез син азьын — «Инвожоысь» артистъёс  ас нимзылы тупало —  сцена вылын  тузӥ костюмъёсын кырӟало-верало, кивалтӥсьсылы но арганчизылы ставка висъямын. Сюлмаськонзы вал люкаськылон интыен, репетиция ортчытыны, пе, зал сёто, но костюмъёсын, инструментэн солань-талань кыстаськонтэм вылысь нимаз висъет кулэ на вылэм… Та юанзы но син куспын сэрттӥськиз — пумиськонэ лыктэмын вал ёрос администрациен кивалтӥсьлэн воштӥсез Людмила Рыбакова но культурая управленилэн кивалтӥсез Александр Иванов, соос сӥзизы матысь дыре ик городысь огаз кинотеатре нимаз сэрег висъяны. Эшшо мар кулэ? Выль костюмъёс, катаос мултэс ӧй луысалзы, выль инструмент… Татарстанысь удмуртъёслэн автономизылэн кивалтӥсез, ужбергатӥсь   Александр Герасимов со вие ик амал шедьтӥз: ӝыны дунэз ёрос ас вылаз басьтыны дась ке, ӝынызэ мон ачим тыро.

— Соглаш! — капчияк вазиз ёрос кивалтӥсьлэн воштӥсез Людмила Рыбакова. — Понедельнике счёт вае, пятницае пыдкутчан басьтэмды луоз ни, — учкиз со «инвожоос» шоры.

Майбыр, лулским ми, ижъёс, асьме понна…

Пусйыны кулэ, Елабугаын бадӟым саклык висъяське  выжы калыкъёслэн огазеяськонъёссылы, соос татын лачак.

— Удмурт огазеяськон — одӥгез мыло-кыдоез но шулдырез, котькыӵе ужрадэ капчи ӝутӥське, — пусъе Татарстанысь калыкъёслэн ассамблеязылэн Елабугаысь представительствоезлэн кивалтӥсез Зулейха Эмирбекова.

Со сярысь ик юбилей ӝытын ӟечкыласа вераськизы мукетъёс но. «Инвожоысь» артистъёс одӥгтэм пусъемын ёрослэн Данъян грамотаосыныз но Таукаронъёсыныз.  Усточиосты Таукаронъёсын пусйиз на «Удмурт Кенеш» огазеяськонлэн тӧроез Татьяна Ишматова.

— Тӥ милемлы котыр ласянь сокем матын, ноку малпанмы ик уг лыкты палэнысь карыны. Уката дунъямон бускель элькунлэн асьме огазеяськонэз сӥлы каремез, асьсэлэнъёсын оградэ пуктэмез. Со понна тау карыны кулэ визьмо кивалтӥсьёслы.

Нош Менделеевскысь но Грак ёросысь Юраш гуртысь кырӟась эшъёссы, «инвожоосты» 10 ар тырмеменызы ӟечкыласа, асьсэлэсь кырӟанъёссэс быдэстӥзы.

— Ас поннамы ум улӥське, ялан тазьы ог-огмы доры куное потаськом, ог-огмылэсь дышетскиськом, — шуо соос. — Со ласянь «Инвожо» ми понна адӟем карымон, ми тани нотаосты но ум валаське, кызьы кылӥськом, озьы кырӟаськом, нош соос зэмос артистъёс кадь, «калык» ним токма уг сёто, вылды.

* * *

Елабуга — удмуртъёс понна туж матын, малы ке шуоно 1921-тӥ арозь со пырылӥз Вятка губерние. Ӵапак Елабугаын интыяськемын вал удмуртъёслэн аспӧртэм  шоркарзы — 1917-тӥ арын уездысь земство бордын  кылдытэмын вал удмурт культурно-просветительской общество. Со ас азяз пуктылӥз удмурт калыкез югдытон, дышетон но культураез вӧлмытон ужпумъёсты. Нош 1918-тӥ арын общество бордысь кылдӥз Удмурт кенеш (совет). Елабугаысь учительской семинариын дышетскизы тодмо-дано удмуртъёсмы, та городын потӥзы  «Виль синь» но  «Гудыри» газетъёс, татын судить каризы мултан удмуртъёсты, татын 1918-тӥ арын ортчиз нырысетӥез удмурт ӧтчам! Туж шумпотымон, бигер город али но уте со тодметъёсты, нош экскурсовод Александр Иванов сокем гажаса маде котькуд «удмурт учыр» сярысь — сюлэм пачылме  вераны луонтэм  кужымен.

— Кайта сю ар тырме нырысетӥ ӧтчам  дырысен, соин валче чакламын калыккуспо научно-практической конференция радъяны. Мон лыдъясько, сое одно Елабугаын ортчытоно, — шуэ Татьяна Ишматова. — Ортчем сюресэз ӟеч тодыса-адӟыса, азьлане вамышъяны капчигес.

Зинаида Рябинина

 

 

Удмурт Дунне
By Удмурт Дунне 20 марта, 2017 08:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<