Уддядиос гуртсэс чеберто, спортэн эшъясько, культуразэс утё

Удмурт Дунне
By Удмурт Дунне Март 30, 2017 15:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кияса ёросысь Карамас-Пельга муниципал кылдытэтлэн йырыз Г. Бигбашев.

Кияса палъёсысь Карамас-Пельга муниципал кылдытэт ёросын одӥгез азьмынӥсез луэ. Солэн вормонъёсыз, шумпотонъёсыз но шуг-секытъёсыз сярысь вера кылдытэтлэн йырыз Григорий Бигбашев.

— Кияса ёросысь Карамас-Пельга муниципал кылдытэтэ 3 гуртъёс пыро: удмурт Уддяди (Карамас-Пельга), со ик луэ муниципал кылдытэтлэн центрез, бигер Байсар (Байсары) но пор Уськыр (Унур-Киясово). Та гуртъёсын улӥсьёслэн огъя лыдзы — 660 мурт, — шуэ Григорий Романович.  —
Уддядиын вань выль школа, нылпи сад, туала куронъёсъя пуктэм ФАП, Удмурт лулчеберетъя центр, клуб но лавкаос — отын ик ужало куд-огез гуртоосмы. Байсар но Уськыр — пичиесь, со гуртъёсын улӥсьёс уксё потто мукет интыосын. Тросэз ужаны Киясае ветло. Ярам, ёрос центр милесьтым кыдёке интыяськемын ӧвӧл: Уддядиысен Киясаозь 7 иськем. Уж ӧвӧлэн тросэз егитъёс кошко городъёсы.

Кылем арын производствоен югдур уродмиз, малы ке шуоно вань скалъёсыз быдтӥзы, лейкозэн висё шуыса. Но «Кияса» агрокомплекслэн кивалтӥсьёсыз оскытӥзы, туэ выльысь ваньзэ берыктозы шуыса. Выльдӥськозы фермаос, отчы ваёзы 1000 йыр скал. 50 пала мурт уже интыяськыны быгатоз.

— Карамас-Пельга муниципал кылдытэт — одӥгез азьмынӥсез. Кылсярысь, 2013-тӥ арын со Кияса ёросын «Устоез муниципал кылдытэт» нимын, нош тӥ «Муниципал кылдытэтлэн устоез тӧроез» нимын пусъемын вал. Кыӵе ужъёсты понна данъязы?

— Вожвылъяськон ёросамы арысь аре ортчытъяське, солэн трос куронъёсыз. Лыдэ басьтӥсько поселенилэн пӧртэм вормонъёсыз, азинсконъёсыз. Азьвыл аръёсын ӵошатыса, гуртъёсын улон одно ик умойгес луыны кулэ.

Ми та вожвылъяськонын ӧй вормысалмы, калыкен огкылысь ӧй ужасалмы ке. Гуртоосмы туж вазиськисесь, котьку юрттыны дасесь. Субботнике-а, концертэ-а чортӥськод — дэмен вуо. Соиз ласянь каньыл ужаны. Туж мыло-кыдоесь мӧйыосмы — огезлэсь но ужрадлэсь кылемзы уг поты, ӵошатсконъёсы гинэ но асьмелэнъёс понна висьыны потало.

Кылем арын ми пыриськимы благоустройствоя элькун конкурсэ но 400 сюрс манет утӥмы. Соин басьтӥмы нылпи площадкалы арбериос, сяська мерттыны посуда, но ар пумозь соосты пуктыны ӧм вуттэ, туэ лэсьтомы. Кылеменыз уксёен урамъёсамы валэктӥсь табличкаос, иворен стендъёс юнматъямы, урамъёсмес югдытӥмы. Выль нылпи площадка пуксёз Байсарысь клуб азе. Нош Уддядиын сыӵе площадкаос лэсьтӥмы сельсоветлэн, анай-атайёслэн но «Огъя Россия» партилэн уксёенызы. Соосты пуктыны уддядиос асьсэос потазы.

«Инвожо» ансамбльлы 30 ар тырмиз.

Ас мылкыдызъя гуртэз чебертыны котьку юрттӥське Владимир Тукаев. Со школаын трудлы дышетэ, нылпиосты но кыске кыӵе ке тунсыко арбериос лэсьтонэ. Дэмен соос пуктӥзы школа вӧзы пичи корка, табере отын пиналъёс шумпотыса шудо, толалтэ котыраз нискылало. Озьы ик Владимир Наумович кивалтэм улсын  дышетскисьёс Катанчи нюкез утялтӥзы.

Нош Удмурт коркан ужасьёс чебертӥзы Сарали ошмес дурез, сельсовет юрттӥз соослы стройматериалэн.

Владимир Андрияновмы туж сюлмо. Сюрес вылысь костаськись изэз яке потӥсь вуэз адӟиз ке, палэнтӥ уз кошкы — тупатоз. Кулэ ке кыӵе ке ужъёсты быдэстыны, котьку юрттӥське, аслаз трактореныз ветлэ. Нош солэн выныз Николай Андриянов сюресъёсты тупатъя, толалтэ лымы донга. Гуртысь тылъёсыз чакла электрик Николай Иванов. Соослы дыраз уждун тырыны котьку ик уг пӧрмы, озьы ке но ноку уг ӝожтӥсько, югдурез валало, ужзэс рос-прос быдэсъяло.

Уксё уггес тырмы. Поселениослэн бюджетсы арысь аре кулэсме. Азьло муниципал кылдытэтэ подоходной налогысь 10 процентэз кыле ке вал, али — 2 процентэз гинэ. Уксё вуэ ар пумын, ваньбур но музъем понна вытъёсты бичам бере. Нош ар ӵоже ми улӥськом ёрос но элькун бюджетъёс чотын, соостэк нокызьы уг луы.

Жуг-жаген яке сюресъёсын югдурез шуг-секытъёс пӧлы ӧй пыртысал. Сюресъёсыз гужем пичиен-пичиен лэсьтӥськом-тупатъяськом, толалтэзэ лымыез донгаськом. Талы кутӥськомы Сюрес фондысь уксёез, со ог 4 ар талэсь азьло кылдытэмын вал.

Жагмес одӥг интые поттаськом но сутӥськом вал ай, но табере косозы ни, дыр, дун тырыса, Ижысь полигонэ нуллыны. Мукет гуртъёсын верало, нюлэсъёсазы но жуг-жаг костаське шуыса. Милям сыӵе шугъяськонмы ӧвӧл, улон интымес чылкыт возьыны тыршиськомы.

Уддяди гуртысь Удмурт корка кунооссэ 6 маршруттӥ ортчытэ

— Быдэс элькунамы но солэн палэназ Уддяди тодмо аслаз культураеныз, сям-йылолъёсты утеменыз.

— Уддядиын вашкала сям-йылолъёс утисько, соин со бордаз трос куноосты, туристъёсты кыске. Гуртамы пӧртэм ужрадъёс ортчыло. Кылсярысь, толалтэ вуылӥзы быдэс Россиысь но палэнысь этнофутуристъёс Ю. Лобанов суредасьлэн проектэзъя симпозиуме. Куноосыз шумпотыса пумитало Удмурт коркан — Удмурт лулчеберетъя юртын, кудӥныз быгатыса кивалтэ Елена Белослудцева. Юрттӥсьёсыныз ӵош со куноосыз сям-йылолъёсынымы тодматэ, табанен-перепечен утялтэ, гуртмес возьматэ.

Культураез утёнын но азинтонын бадӟым уж лэсьтэ «Инвожо» ансамбль, соин трос аръёс ӵоже ини кивалтэ Надежда Пахомова. Туэ «Инвожо» 30 арзэ пусйиз. Отчы шумпотыса кыстӥсько пиналъёс но.

Ми дорын бадӟым саклык висъяське спортлы. Али куасэн ветлон трассамы вань, уйин со югдытӥське. Школа стадионын вылысьтыз вылаз ӵошатсконъёс ортчыло, туэ гинэ куатез радъяськизы ни. Кылем кӧснуналэ тани «Удмурт дуннелэсь» ӵошатсконъёссэ ортчытӥм.

Туэ потэ на радъяммы Максим Пилоянлы сӥзем пробег. Гуртмылэн историяз со адями туж бадӟым пытьы кельтӥз. Максим Николаевич кивалтыку, «Ленинец» колхозмы ялан азьмынӥсьёс пӧлын вал. Со дыръя пуктӥськиз школа, клуб, котельной. Озьы ик М. Пилоян лэсьтӥз Киясаысен Уддядиозь сюресэз, сое калыкын «Армян тракт» шуо. Ӵапак отӥ пробег ортчоз. Таӵе бызьылонэз 2 пол радъяллямы ни (нырысьсэ ортчыкуз, Максим Николаевич улэп вал ай).

Шумпотымон, гурт калыкмы спортэ кыстӥське шуыса. Школаез йылпумъясьёс азьланяз но соин выремысь уг дугдо, бадӟым ӵошатсконъёсын гуртмылэсь, ёросмылэсь, элькунмылэсь данзэ утё.

Гуртоосмы асьсэды пӧртэм удысъёсысь шедьто, азинлыко луо.

Елена Рябина

Туспуктӥз Александр Горбунов

 

Удмурт Дунне
By Удмурт Дунне Март 30, 2017 15:53 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<