Уддяди гуртысь Удмурт корка кунооссэ 6 маршруттӥ ортчытэ

Удмурт Дунне
By Удмурт Дунне Март 28, 2017 10:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Уддядиын котьку но удмуртъёс улӥзы, одӥг мадёсъя сое бигер пи Карамас но удмурт ныл Пельга кылдытӥзы ке но.

Гуртэз азинтозы куноос?

Вашкалаез утиське туалаез пыр

Кияса ёросысь Уддяди гуртысь Удмурт корка куноосты пумита 2004-тӥ арысен. Со луиз ини элькунысьтымы огез тодмоез удмурт культурая центр.

Тунсыко удмуртъёс

Уддядиын котьку но удмуртъёс улӥзы, одӥг мадёсъя сое бигер пи Карамас но удмурт ныл Пельга кылдытӥзы ке но. Вӧзаз ӟуч, пор но бигер гуртъёс, соин уддядиос, мукет калыкъёсыз, культураосыз тодыса но гажаса, котьку улӥзы. Гурт калык оске удмуртъёслэн вашкала инмаръёссылы, азьвыл сямен ик, тырше инкуазен но семьяен герӟаськем сям-йылолъёсыз ортчытъяны. Удмурт оскон пумен вунэмен, лэся, берло аръёсы гуртэн тунсыкъяськыны кутскизы тодосчиос но, туристъёс но.

— Удмурт коркаез усьтыны кичӧлтӥсьёс — гуртысьтымы арлыдоос, — вера Уддядиысь «Удмурт лулчеберетъя юртлэн» (Удмурт коркалэн) директорез Елена Белослудцева. — Соос вӧсяськон инты усьтыны куризы. Та ужпум борды гижысь-пиньысь басьтӥськиз Надежда Пахомова — «Удмурт Кенеш» огазеяськонлэн Кияса ёзэзлэн азьвыл кивалтӥсез.

Уж пӧрмиз. Со дырысен Удмурт коркан уно ужрадъёс ортчизы ни. Нырысетӥосыз пӧлысь — 2005-тӥ арын радъям калыккуспо «Юмшан» ужрад но Уддядилэсь 300 арзэ пусъён. Соку гуртэ нырысьсэ трос туристъёс вуизы но со дырысен ӧз ни бырылэ, шуыны луоз.

— Туннэ нуналлы дорамы вуылӥзы ни Финляндиысь, Эстониысь, Венгриысь но Европалэн мукет сэрегъёсысьтыз, озьы ик Австралиысь, Нигериысь, Китайысь, Япониысь куноос, — вера Елена Белослудцева. — ӵемысь вуыло Россиысь куноос. Кин ке лыктэ группаен, кин ке — ас понназ. Ми соосты ваньзэс огкадь шумпотыса пумитаськом.

Куноос пырисько удмурт сям-йылолъёсты ортчытонэ, шуом, сюанын тӧр луо (туж шумпотыса сектасько), дышетско табань пыжыны, удмурт дӥськут мертало, мастер-классъёсы вуыло.

12 ёросысь спортсменъёс ӵошатскизы «Удмурт дунне» газетлэн кубокез понна

Пусйыны кулэ: Удмурт корка куноосты пумитаны малпамын ӧй вал. Со гуртоослы пукон корка сямен усьтӥськиз. 2011-тӥ арын гинэ луиз Удмурт лулчеберетъя юрт. Нош 2010-тӥ арысен туристъёс понна но ужаны кутскиз. Туннэ нуналлы Кияса ёросын 7 тур малпамын: калык культура, Инмарлы оскон, Выль ар, Вӧйдыр, инкуазез утён, вашкала оскон но «Юмшан» этношудон. Православноез сяна (сое бырйисьёс тодматско Данилово но Первомайск черкогуртъёсысь черкъёсын), 6 мукет туръёс — быдэсак яке оглюкетэз — ортчо Уддядиын. Калык культураен тодматскыны лыктэмъёслы возьмато адямилэн улонысьтыз куинь сюанъёсты, Вилез яке Гужем юонэз. Инкуазез утёнлы сӥзем «Азвесь ошмесъёс» сюресэз ортчыкузы, куноос пылатӥсько Уддядиысь Сарали но Первомайск черкогурт палась дун-чылкыт Флорлэн но Лаврлэн ошмесъёсазы. «Юмшан» шудон малпамын вал кунгож сьӧрысь туристъёс понна, со тодматэ удмуртъёслэн сям-йылолъёсынызы, улэм-вылэменызы. Бӧрысь та кичӧлтонэз Кияса ёросысь егитъёсын ужанъя ёзэт тунсыкоен лыдъяз, ёросын ортчытӥз, нош собере — ёросъёс куспын но. Вашкала осконлы сӥзем тур тужгес яра нылпиослы. Куноосты пумита Карамас но вера, Пельга кышнозэ чер-чуръёс (висёнъёс) лушказы шуыса. Нылпиос, 2 группалы люкиськыса, быдэс гуртэз котыртыса, 5 станциосы вуылыса, Пельгаез мозмытыны кулэ.

Уксё лыктэ, Уддяди чеберске

Удмурт корка усьтӥськыку, бордаз 1870-тӥ аръёсы пуктэм кенос гинэ вал. Туннэ нуналлы куноос быгато гужем беседкаын пукыны, тӧдьы но сьӧд мунчоосы пырыны, кык кунокуаосын улыны: огез 20-тӥ даурысь, мукетыз 19-тӥ даурысь удмурт корка сямен лэсьтэмын. Со сяна, Удмурт корка вӧзын выльдэмын Быдӟым куала, со сылэ аслаз азьвыл интыяз ик. Ваньмыз со лэсьтэмын Удмурт коркан поттэм уксёен. Коньдон кутӥське юрт котырез но гуртэз азинтонлы.  Малпанъёс трос на. Азьланяз Сарали ошмесэз чебергес кароно, вӧзаз синпелет пуктоно.

Ар ӵоже Удмурт корка кӧня ке сюрс мурт вуылэ.

Ар ӵоже Удмурт корка кӧня ке сюрс мурт вуылэ. Шумпотымон, арысь аре соослэн лыдзы будэ шуыса.

Уддядие туристъёс вуылыны кутскем бере гуртоос нырысь паймо вал, мар ветло шуыса.

— Дыр ортчемъя дышизы, пумиськонъёсы асьсэос но пыриськыны кутскизы, — шуэ Елена Белослудцева. — Ма, Удмурт коркалэсь пайдазэ но шӧдӥзы, луоз. Ми татын 6 кузя ужаськом. Куддыр, куноос трос кузя лыкто ке, ваньзэ лэсьтыса ум вуттӥське, гурт калыкез юрттӥськыны ӧтиськом, ужамзы понна уждун тыриськом. Киужен вырисьёс ваё тунсыко ужъёссэс, ми соосты вузаськом, уксёзэ кузёезлы сётӥськом.

Берло дыре зол юрттыны кутскиз Уддядиысь ветеранъёслэн огазеяськонзы. Кивалтэ соин Лидия Соловьёва. Мӧйыос Удмурт корка пукыны но, праздникъёсы но ветло (пусйыны кулэ: уддядиос асьсэ йылолъёсазы палэнысь муртъёсты уг пырто, асьсэ понна вӧсясько но курисько, осконзэс исаны уг сёто). Тау карыса ветеранъёс юрттэтсэс ӵектӥзы — веник керттћзы. Мунчое пырисьёс уго трос. Азьланяз мӧйыос Удмурт лулчеберетъя юртлэсь сад-бакчазэ но утялтыны юрттозы.

— Туризм гурт улонэ трос воштонъёс пыртэ ке но, номыр аламазэ уг вайы, — шуэ Елена Белослудцева. — Ми котьку дась куноосты пумитаны, но вераны кулэ: туроператоръёс пыр ветлон дуно усе, ас кожазы лыктћсьёс кык поллы ичи дун тыро.

Удмурт лулчеберетъя юрт интыяськемын таӵе адресъя:

Удмурт Элькун, Кияса ёрос, Карамас-Пельга гурт, Октябрьлы 50 ар урам, 22 номеро юрт.

Герӟаськоно 8-912-873-51-89 телефонъя.

vk.com/club40843322

c-belosludcevaep@rambler.ru

Елена Рябина

Удмурт Дунне
By Удмурт Дунне Март 28, 2017 10:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<