Шарканын — Макс-старт, Глазовын — Трубашурысь батыр, Кезын — инкуазез утён

Удмурт Дунне
By Удмурт Дунне Март 18, 2017 16:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вавож

 Дано адями

Та нуналъёсы тодмо луиз «Ёрослэн дано адямиез» нимын пусъёно мурт.

Ёрос Кенешысь депутатъёс огкылысь соглаш луизы «Ёрослэн дано адямиез» нимез Эмезьгуртысь (Малиновкаысь) Анатолий Егоровлы сётыны. Анатолий Максимович — УАССР-ысь дано дышетӥсь, 30 арлэсь ятыр Гурезь-Пурга школаен кивалтӥз, Кузебай Гердлэсь нимзэ калык пӧлы берыктыны юрттӥз. Ӵапак со сюлмаськемен, 1998-тӥ арын, К. Гердлы 100 ар тырмон аре, школаын усьтӥзы К. Гердлэсь музей-юртсэ. Удмуртлыкез ӝутыны юрттэмез понна Анатолий Егоров пусъемын К. Герд нимо премиен.

Кияса

Валэктыны — 1 минут

Ёросысь культурая юртын егитъёс пӧлын ортчиз нырысетӥез таиз ар понна «Минута» визь сынан.

Шаплы, визьмо, етӥз луэмзэ эскериз 9 команда. Егитъёс быръёнъёсъя, инкуазез утёнъя, калык сям-йылолъёсъя но мукет удысъёсъя тодон-валанзэс эскеризы. Юанлы 1  минут куспын валэктон шедьтоно вал. Быдэс шудон ӵоже 2 командаос ваче мынӥзы. Но берпуметӥ юанын Первомайской муниципал кылдытэтысь визь погъёс Атабайысь егитъёсты ӝыны баллы азьпалтӥзы. Вормисьёс коньдон кузьым утӥзы. Солэсь оглюкетсэ соос секыт улӥсь семьяослы висъяны кенешизы.

Сьӧлта

 Дор палъёсаз берытскиз

Кылем арня пумын ёрос библиотекаын Валерий Злобинлэн суредъёсыныз адӟытон усьтӥськиз.

Валерий Васильевич вордскемын Мельничата гуртын, Сьӧлтаысь шор ёзо школаез йылпумъяса, спецсвязъя Кировысь училищеын дышетскиз. Ижысь металлургической заводын ужакуз, суредаськыны быгатонлыкъёссэ синйылтӥзы но художник-оформителе пуктӥзы. 1972-тӥ арын со Чайковский городэ улыны кошке. Огдырлы но ӧз люкиськылы суредаськонэн. Солэн ужъёсыныз адӟытонъёс вал Пермь но Ижевск городъёсын, Казахстанын, Украинаын, Финляндиын, Чехиын, Германиын.  Вордскем палъёсаз суредась буш киын ӧз вуы, куд-ог суредъёссэ Сьӧлта ёрос библиотекалы кузьмаз.

Красногорск

Адӟем карымон

Черкогуртын ортчиз Удмуртиысь арлыдоослэн 3-тӥ тол спартакиадазы.

Ӵошатсконэ пыриськизы 55 арессэс ортчем нылкышноос но 60 ареслэсь мӧйы воргоронъёс. Арлыдоос куасэн бызьылӥзы, шашкиен но дартсэн шудӥзы. Малы  быръемын Красногорск черкогурт? Ӵапак та ёросысь арлыдоос спортъя ужрадъёсы туж мыло-кыдо пырисько. Мугорез кыдатон культурая, спортъя но егитъёсын ужан политикая министерство ивортэмъя, ёросысь 60-сен 79 аресозь адямиос пӧлысь 13 сюрс 895 мурт мугорзэ кыдатэ, нош 80 ареслэсь бадӟымъёс пӧлысь — 807 адями. Тӥни кинъёслэсь адӟем кароно!

Шаркан

 Макс-старт

Максим Вылегжанинлы дурбасьтыса, Шарканын ортчоз «Макс-старт» ужрад.

Шаерысьтымы дано спортсмен, Россиысь спортъя мастер, Олимпиада шудонъёсын 3 азвесь медаль басьтэм мурт та вакытэ бадӟым стартъёсы пыриськонлэсь палэнтэмын. Ёрос администрация, солы дурбасьтыса, бадӟым ужрад ортчытыны малпаз. 18-тӥ феврале 16 часын куасэн бызьылонъя ӵошатскон ортчоз, мылкыд карисьёс викторинае но пыриськыны быгатозы. Вань юанъёс Максим Вылегжанинэн герӟаськемын луозы.

 Глазов

Трубашурысь батыр

11-тӥ южтолэзе Адам гуртэ уно калык люкаськылӥз — отын ортчиз «Донды-батыр» ёрос вожвылъяськон.

Ужрадэ пыриськизы, котыр ласянь быгатонлыкъёссэс возьматӥзы 7 егит пиос но воргоронъёс. Вожвылъяськон туж пӧсь ортчиз. Устоосыз пӧлысь устоез луиз — «Донды-батыр» ним басьтӥз — Трубашурысь Иван Максимов.

Батыръёслы сӥзьыса радъямын вал командаос куспын ӝук пӧзьтонъя вожвылъяськон. Со понна ульчаын сылӥзы 5 пуртыос. Ческыт пӧраменызы висъяськизы Адам шор ёзо школаысь дышетӥсьёслэн но нылпиослэн командазы но Адамысь ик арлыдоослэн командазы — соос калыкез паймытӥзы йӧлын ӝукенызы. Со сяна, кырӟазы-веразы, люкаськем калыклы капчи но задор мылкыд сётӥзы.

Можга

 Герберын гырдаллялоз вал

Пазял гуртын улӥсьёс 17-тӥ июне Гербер ортчытыны дасясько.

Удмуртъёслэн Гербер шулдыръяськонзылы дэмен дасяськон мынэ. Кылем арня пумын Нациосын ужан политикая министерствоын кенешон ортчиз. Отын пыр-поч вераськизы ужрадэз ортчытон сярысь. Герберлэн шорсюлмыз герӟаськоз валъёсын. Ӵапак та ёросын кутске Вало шур, вордо ватка, кабардинской, орловской, ӟуч тяжеловоз но мукет выжы валъёсты. Бадӟым удмурт шулдыръяськонэз ортчытонлы шаермылэн бюджетысьтыз 1 миллион 425 сюрс манет висъяны чакламын.

Юкаменск

Чорыгазы егитъёс

Ёросысь егитъёслэн 12 командаоссы но Яр ёросысь команда люкаськылӥзы Улӥ Пажма гуртэ чорыганъя вожвылъяськонэ.

Ужрад шур дурын ортчиз. Нырысь ик егитъёс вожмаськыса йӧ портӥзы. Табере отысь чорыг поттоно — командалы быдэ 1 визнан сётӥзы. Кинлэн куриказ чорыг нырысь дэмӟоз — со ик вормоз. Ӵошатсконлы 2 но ӝыны час висъязы. Вожвылъяськисьёс воксё ӝожомизы вал ини, уг зыгаты шуыса, но яръёслэн шумпотон куараоссы — куриказы чорыг сюрем — егитъёслэсь мылкыдзэс бурдъязы. Озьы яръёс вормисе потӥзы.

Кез

 Ӟеч уж — инкуазез утён

Ёросысь школаос пӧлын «Ӟеч уж» проектъёс гожтонъя вожвылъяськон ортчиз.

Ужрадэ 9 школаос пыриськизы. Кылем арня пумын вожвылъяськонлы йылпумъянъёс лэсьтэмын вал. Вормисьёс пӧлы шедизы Александрово, Степанёнки, Кезысь 1 номеро, Кузьма, Пужмезь  школаос. Пиналъёслэн ваньмыз сямен ужъёссы сӥземын вал тылобурдоосты, инкуазез утёнлы. Ёросын вормисе потэм школаослэсь проектъёссэс келялозы шаерамы ортчись вожвылъяськонэ.

Пичи Пурга

 Мунёос сярысь кенешизы

Кылем арня пумын ёрос библиотекае трос калык люкаськылӥз.

Котырес ӝӧк сьӧрын радъям кенешонэ лыктӥзы гурт библиотекаосын но культурая юртъёсын ужасьёс, нылпи садъёсысь воспитательёс. Соос вераськизы ёросын 2-тӥзэ ортчоно «Пурга мунё» фестиваль сярысь. Ёросын улӥсьёс соку пӧртэм выжы калыкъёслэсь 230 мунёоссэс лэсьтӥзы. Таяз учыре эшшо но тросгес калыкез люканы малпамын, ужрадлы дасяськонэз толэзьлы азьпал ик мытӥзы.

Якшур-Бӧдья

Дано спортсменъёс

Кылем арняе ёросысь шаертодонъя музейын «Мы выбираем спорт» бичетэн тодматскон ортчиз. Со ёросысь спортлэн историезлы сӥземын.

Пумиськонэ вуылӥзы Якшур-Бӧдья ёросысь нимо-дано спортсменъёс В. Шкляев, Г. Иванов, Н. Замыров, А. Вахрушева, Е. Виноградова но мукетъёсыз. Люкаськемъёслы тау кариз ёрос Депутатъёслэн Кенешенызы кивалтӥсь, та бичетэз поттыны кичӧлтӥсь Сергей Поторочин. Та нырысетӥ вамыш гинэ, пусйизы ёросысь архив ужъёсъя ёзэтысь специалистъёс. Азьланяз бичет паськытатэмын луоз — отчы тросгес спортсменъёс сярысь гожтозы, туспуктэмъёсты пыртозы.

УД

Удмурт Дунне
By Удмурт Дунне Март 18, 2017 16:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<