Пичи Пургаысь ДОСААФ-лы — 50 ар

Удмурт Дунне
By Удмурт Дунне Март 3, 2017 10:29

Пичи Пургаысь ДОСААФ-ен кивалтӥсь А. Мельникова.

Пичи Пурга ёросысь ДОСААФ-ын ужасьёс 2 полэс шумпотонэн пачылмемын — соос выль юртэ пыризы но юбилейзэс пусйыны дасясько. Со сярысь кенешиськом Пичи Пургаысь ДОСААФ-ен кивалтӥсен Анна Мельниковаен.

— Анна Александровна, выль юртэныды сяна, тӥледыз ӟечкыланы кулэ, дыр,  юбилейёсыныды.

— Озьы. Али гинэ, 23-тӥ толшоре,  Россиысь ДОСААФ-лы 90 ар тырмиз. Нош ДОСААФ-лэн ёросысьтымы ёзэз усьтӥськем дырысен 50 ар ортчиз. Асьмелэсь юбилеймес кылем арын пӧртэм мугъёсъя ортчытыны ӧм быгатэ. Малпаськом туэ Россиысеныз ӵош карыны. Удмуртиысь вань ДОСААФ но автошколаос понна бадӟым ужрад ортчыны кулэ южтолэзь котырын Пероггуртысь патриотической клубын. Ужрадэ вылӥ кивалтӥсьёс но лыктыны малпало.

— Таӵе чебер, туала куронъёсъя пуктэм вӧл-вӧл выль юртэ пыремдылы шумпотӥськоды, дыр?

— Кин ӟечезлы шум уз поты! Та нуналэз ми кема возьмамы. Талэсь азьвыл ужамы пулэсь лэсьтэм ӟоскыт интыын, вуж ни вал со. Одӥг липет улэ интыяськемын вал магазин но, парикмахерской но.  Адямиос отысь ӧз бырылэ. Табере интымы котьмарлы тырмыт — водительёсты дышетон классъёсмы 2, вӧл-вӧлэсь соос, 30 адями тэрымонэсь.

Вазен ДОСААФ-ёс котькуд ёросъёсын сямен вал. Ай 3-4 ар талэсь азьло 13 районъёсын возиськизы на. Туннэ нуналлы республикаямы ваньмыз-ӧвӧлэз 8 ДОСААФ-ёс кылемын.

ДОСААФ-ёс пӧлын ми арысь аре нырысетӥ интые потаськом. Вормонъёсмы шӧдскымонэсь: водительёсты дышетон понна машинаосмес выльдыны быгатӥм, милям соос 5. Басьтӥмы ноутбук, 4 компьютер, проекторен экран но тренажёр. Тренажёр одно ик милемлы кулэ, со дышетон программая чакламын. Машина руль сьӧры пуксемзылэсь азьло дышетскисьёсмы одно ик тренажёр сьӧрын пукыны кулэ. Эмчилэн урокъёсаз манекен сылэ. Со вылын дышетскисьёс сюрес вылын шуге-леке шедем муртлы нырысетӥ юрттэт сёто. Классъёсын, ульчаын сямен ик, светофоръёсмы сыло.

— Озьыен, тӥ, возиськыны быгатэм гинэ ӧвӧл, азинскиськоды но…

— 50 ар талэсь азьло кылдытэм организациез нокызьы но ворсаны сётыны кулэ ӧвӧл. Быгатэммыя ужаны тыршиськом, милям филиал радэ выжеммы уг поты.

Ми ӵош ужаськом, пӧртэм ужрадъёс ортчытъяськом ёрос администрациен, егитъёсын ужанъя отделэн но  спорткомитетэн. Арлы быдэ толшор толэзе куасэн бызьылонъя но ыбылӥськонъя ӵошатсконъёс ортчытъяськом. Туэ но соос милям вал ини. Ӵошатсконэ пыриськыны мылкыд каро школаын дышетскись нылпиос но, егитъёс но, арлыдоос но. Со милям туж тунсыко ортче. Одӥгзэ но куас вылэ султэм муртэ синпель кузьымтэк ум кельтӥське.

Юн кусып возиськом ёрос военкоматэн. Призыв дыръя соос монэ комиссие пукыны ӧтчало. Армие кошкись пиослы сӥзьыса, тулыс но сӥзьыл бадӟым ужрадъёс  радъяськом.  Со сяна, бадӟым классъёсын дышетскись нылпиосын военно-патриотической ужрадъёс ортчытъяськом, доразы потаськом. Трос саклык висъяськом водительёсты дышетонлы.

Коллективмы бадӟым ӧвӧл. Валтӥсь бухгалтермы Екатерина Петрова та удысын кема тырше ини. Сюрес вылын ворттылонъя правилоосты но машиналэсь кызьы ужамзэ валэктэ Сергей Емельянов. 3 водительёсмы вань: Дмитрий Титов, Алик Нафиков но Дмитрий Тронин, соос курсантъёсты машинаен ворттылыны дышето. Со понна юри Можга каре ветло, отысь автошколалэн автодромаз ворттыло. Вань милям асьмелэн но автодроммы, но со туала куронъёслы уг тупа ни, вужмиз. Городын сюресъёс но светофоръёс уно ук, тодон-валан басьтыны отын трослы пайдаёгес. Дышетскисьёсмы экзаменъёссэс  Можгаын сёто. Котькудаз экзаменэ ачим но ветлыны тыршисько.

Медицина люкетэз нуэ Роза Терликова. Со ми дорын дасо аръёс ужа ини.

Мон ДОСААФ-е 25 ар талэсь азьло вуи. Нырысь-валысь валтӥсь бухгалтер луыса ужай. Табере 17 арзэ ини кивалтӥсьлэсь биньгозызэ валтӥсько.

— Араз кӧня адямиез водителе дышетӥськоды?

— Одӥг кадь уг луы. Куддыръя мылкыд карисьёс туж трос люкасько, 30-лэсь но ортче. Нош али 18 адями тодон-валан люка. Дышетскисьёсмы, мукет автошколаосын сямен ик, 3 толэзь дышетскыса, право басьтыны быгато. Оглом вераса, ми дорын араз 150-180 адями тодон-валан люка.

Кутӥськом 17 арессэс тырмытэм пиосты но нылъёсты. Тодон-валан сётӥськом понедельнике, вторнике но среда нуналъёсы ӝытазе, уж бере, 18 часысен 21 часозь. Юбилеенымы валче али дышетскон дун кулэстэмын.

Любовь Тихонова

Удмурт Дунне
By Удмурт Дунне Март 3, 2017 10:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<