Пичи Пурга ёросысь Улӥ Посьтол гуртын ӧвӧл фельдшерзы

Удмурт Дунне
By Удмурт Дунне 28 марта, 2017 17:43

Пичи Пурга ёросысь Улӥ Посьтол гуртысь калык 6-тӥ арзэ фельдшер вите.

Гурт поселениен кивалтӥсь Фёдор Верёвкин нуналлы быдэ сюлэмыз вӧсь луыса ортче ӵогам медпункт вӧзтӥ. Арлы быдэ ёрос больницае заявка сётэ, фельдшер курыса. Толыкез ӧвӧл. Артысь Дэри ёросысь Постол станциын лулсэренызы курадӟисьёслэн больницазы вань. Татын уждун но бадӟымгес, уж но сменаед дыръя сяна ӧвӧл — гань-ганьгес. Ӵапак со больницае ик кошкиз гуртысьтызы фельдшер.

Улӥ Посьтол гуртысь медпунктэ егит специалист вуиз ик вал. Таиз коть мед выжыяськоз шуыса, ремонт борды басьтӥськизы. Медпунктлэсь липетсэ профнастилэн шобыртӥзы, выжъёссэ юнматӥзы, пушсэ висъетъёслы люкылӥзы, укнооссэ буязы. Выльдэм юртэ выль оборудование вуттӥзы. Но семьяяз шуг-секытъёс кылдэмен, вылез фельдшерзы но гуртысь кошкиз. Со дырысен медпункт сирота кадь огназ кылиз. Лымы но зор-кот улын со ялан ланьыра. Огпалтӥз борддорыз но  тэшка ни. Нош корказез воксё шальтраз. Выж миськись Надежда Тёмкина ӧй луысал ке, секыт лымы улын, оло, воксё пограсал ни.

Медпункт оскемын утялскисьлы.

— Мужикме лымы куяны ыстӥсько, — шуэ нылкышно. — Утялтытэк кызьы возёд? Улэп кадь потэ медпунктмы. Со янгыш шат огназ кылемезлы? Куддыр малпасько ик: нокинлы но со кулэ ӧвӧл ни, мыным сяна. Фельдшер кошкем бере нырысь-валысь сюлэм ик вандӥськиз. Табере дыши ни буш юртэз утялтыны.

Специалистлы быдэс гуртэн шумпотысалзы. Вирзӥбетэз мертаны, укол пуктыны гинэ но татын нокинлы. Нош улэ 400 адями. Таос пӧлысь ог 30 процентэз — егитъёс. Нылпизы висем сярысь справка басьтон понна гинэ но Пичи Пургалась ёрос больницае ветлоно луо. Одӥг бумага понна быдэс нунал черодын пукиськом, шуо. Нош висьыны кутскид ке, врач доры сюрытозяд, рейсовой автобуслэсь бере кылёно, пе. Пичи Пурга но Улӥ Посьтол вискын 30 иськем, аслад машинаед ӧвӧл ке, котьмаин берт. Озьы 2 нуналэн но врач доры сюрыны выриськом, шуэ Улӥ Посьтол гурт поселениен кивалтӥсь Фёдор Верёвкин.

Гуртазы эмчилы дышетскем адямиос вань. Вазиськид ке, укол пуктытэк уз кельтэ, дыр, но косъяськыны умой ӧвӧл. «Скорой» ӧтиськод ке, Пичи Пургалась со тол куазен быдэс час лыктыны дауртэ. Со дыр куспын коть кул, шуо гуртоос. Озьы уноез больницае ветлытэк улэ, тазалыксэ ялан аналтэ.  Зэм, куд-огез Норья я Кабыста гуртъёсы вазисько ик, виссы 7 но 3 иськем.  Но весь мурт дортӥ ветлод шат? Фельдшеред вӧзад ке, уйзэ ик каньыл изёно, шуо гуртоос.

Зэм, медпунктэз усьяло ик — нылпиослы прививка пуктылыку. Мукет дыръя ӧс  ӵогамын. Котьма ке но гуртоос осконзэс уг ышто. Кабыста гуртысь медпунктэ алигес егит нылкышно вуиз ук. Ирина Сапожникова татчы бызиз. Оло, со 2 гуртлы ужалоз: кӧня ке нуналзэ Кабыстаын, кӧня ке нуналзэ Улӥ Посьтолын. Фёдор Верёвкин но нылмуртлы тае ӵектыны малпа. Талы ачиз Ирина Сапожникова мар вераны ик пайме.

— Кык гуртлы ужаны секыт ӧй луысал, вормысал, вылды. Но мынам аслам пиналъёсы пичиесь ай: огез садэ ветлэ, мукетыз гуртын пуке. Кабыстаысь медпунктэ  но кышкасагес лыктӥ, пӧрмыто я уг шуыса.

Кин тодэ, гуртэ вуэм егит фельдшерлы кытчы пырон инты луысал ке, оло, лыктӥсез но сюрысал. Гурт поселениысь специалистъёс верамъя, корка уг сётӥськы. Но буш коркаос гуртын вань, частникъёс сое арендае сётыны дасесь.

Нялтас вераса, Улӥ Посьтолын гинэ секыт югдур ӧвӧл. Ёросысь валтӥсь врачлэн воштӥсез Ольга Прозорова верамъя, туннэ фельдшеръёс ӧвӧл бадӟымесь гуртъёсын но — Уромын, Аксакшурын. Кечол гуртысь медпунктын акушеркалы ёрмо.

— Туала вакытэ нокинлэн но гуртын ужамез уг поты, — вера Ольга Александровна. — Элькун программая гуртэ лыктӥсь фельдшерлы туэ январьысен 300 сюрс манет тыриське. Но со программая но нокин ӧз вазиськы. Ваньзылэн городэ кылемзы потэ. Гуртын уго туж секыт: висисьёс уйин но сайкатозы.

Медпунктъёсын али ужасьёслы ог 40 арес. Таосыз но пенсие кошкизы ке, ӧйтӧд, егитъёсты кытысь шедьтомы, шуэ Ольга Прозорова. Ёрос йырлэн воштӥсез Алексей Рублёв шуэ: специалистъёсты утчаськомы.  Утчало соосты  Тазалыкез утёнъя министерствоын но. Шаерысьтымы котькуд ёросысь сямен одӥг ке но медпунктын фельдшеръёс уг тырмо.

Елена Сараматова

Туспуктӥз Анна Чернова

 

Удмурт Дунне
By Удмурт Дунне 28 марта, 2017 17:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<