Моноспектаклез азьланьтӥське

Удмурт Дунне
By Удмурт Дунне Март 16, 2017 16:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Татьяна Зайцева: удмуртъёс наукае мыныны уг дырто.

Татьяна Зайцева тодосчилы — 60 арес

Быгато-а наука но дышетон артэ вамышъяны, кенешиськом кылосбур наукаосъя докторен Татьяна Зайцеваен. Со гожтӥз 200-лэсь уно научной ужъёс, 3 монография, кивалтэ УдГУ-ысь Удмурт кылосбуръя, финно-угроведениея но журналистикая институтысь удмурт литературая но Россиысь выжы калыкъёслэн литератураоссыя кафедраен.

— Татьяна Ивановна, тӥ пыриськоды Чувашиысь но Саранскысь диссертационной кенешъёсы. Соин, малпасько, вераны быгатӥськоды, кызьы азинске выжы калыкъёслэн науказы.

— Зэм но, чувашъёсын милям кафедрамы но, институтмы но ӟеч кусыпъёс возе. Отын азинто Москваысь дунне литературалэн институтэзлэсь (ИМЛИ) сям-йылолъёссэ, со институтэз мон йылпумъяй, быдтӥз сое В. Родионов но, кенешлэн кивалтӥсез. Россиысь диссертационной кенешъёс туннэ куспазы зол гинэ вожвылъясько, та пумысен, оло, Чувашиысезлы капчигес но. Со дораз кутэ тюрк но, ӟуч но, фин-угор но темаосты нуись аспирантъёсты. В. Родионов озьы ик шуэ: фин-угоръёс дорын мон фин-угор, бигеръёс дорын — бигер, ӟучъёс дорын — ӟуч. Та кенеш удмуртъёслы но диссертациоссэс утьыны сюрес сётӥз. Татын удмуртъёс понна ӧс усьтэмын ке но, асьмелэнъёс наукае мыныны уг дырто. Берло дыре бигеръёслэн, чувашъёслэн, поръёслэн трос кандидатъёссы кылдӥзы, нош кӧня милям… Лулӟиськод гинэ…

Саранскын мон докторантураме ортчи. Таиз кенеш фин-угор дуннелы матын луэ, кемалась ужа ни, татын мынам трос эшъёсы. Выльдӥськонъёс та кенешлэсь но палэнэ ӧз кыле. Туннэ солы тужгес но секыт, дыр, малы ке шуоно со фин-угор темаез гинэ нуэ, нош ми, фин-угор тодосчиос, ӧжыт кузя.

Кенешлэн ёзчиез луыны берло дыре тунсыко но со дыре ик секыт луиз. Куддыръя малпасько: нош кулэ-а со мыным, удмуртъёс наукае уг мыно ке? Уго кенешлэн ёзчиез азе туж чурытэсь куронъёс пуктӥсько. 3 арлы огпол одно ик монографиед потыны кулэ, статьяосыд, рецензиосыд луыны кулэ, со сяна, кунгож сьӧрысь журналъёсын печатласьконо, мукет тодосчиос тынад ужъёсыд вылэ мед чӧлскылозы но трос мукет. Озьы ик луыны кулэ аспирантъёсыд, соосты кандидатозь будэтоно — мынам сыӵеосы ӧвӧл, шуыны луоз, тросэз, ужзэс ӝыныё куштыса, наукаысь кошко.

— Россиысь ӧжытаз вылӥ дышетсконниосын саклык висъяло на Россиысь выжы калыкъёслэн литератураоссылы. Туала удмурт литератураез эскерисьёс но трос ик ӧвӧл.

— Москваын дышетскыкум, адямиос СССР-ысь литератураен юн тунсыкъясько вал. Ми со вакытэ гожъяськись тодмо писательёсын, кылсярысь,                      Ю. Бондаревен, Р. Гамзатовен, Ю. Рытхэуен, Ч. Айтматовен но мукетъёсыныз, пумиськонъёсы ветлыны яратӥськом вал. Артэ пукиськод ке латышъёсын, литовецъёсын, армянъёсын, туркменъёсын, соос юало: кин тӥляд, удмуртъёслэн, тодмо гожъяськисьты вань, кинэ лыдӟоно? Соку мон малпаськыны кутски: зэм но, кин милесьтым туала литературамес кылдытэ? Одӥг чувашлы кышкаса Г. Красильниковез ӵектӥ. Берло со лыктӥз но тау кариз, тунсыкоесь гожъяськисьёсты вань шуыса. Мон но чувашъёсты лыдӟыны кутски. Азьло умой вал уга: туннэ роман эрзя, чуваш, пор яке бигер кылын потӥз, нош ӵуказе сое ӟуч кылэ берыктӥзы ни.

Наукаен вырон — со, вань творческой ужъёс кадь ик, висён. Лекция лыдӟон — со моноспектакль, кудзэ дышетӥсь ачиз гожтэ, малпа, учкисьлы-студентлы возьматэ. Огдыре студентъёсты дышетыны но наукаен вырыны, мон сямен,  уг луы. Тон шори люкиськиськод. Бакчаяд бадӟым емышъёс сыӵе дыръя уг кисьмало ни. Кылсярысь, нуназе лекциосты нуиськод, нош наукаен вырыны кутскиськод 5 час бере яке шутэтскон нуналъёсы, уйёсы. Озьы луыны кулэ ӧвӧл, юнме шат тодӥсь муртъёс шуо: вузъёсын наукаез азинтыны али туж секыт.

Ми дышетон удысын воштӥськонъёс пӧлы выемын. Та югдур воксё палэнтӥз ни монэ наукалэсь но, улонлэсь но. Кызьы студентъёслэсь визьзэс эскероно, кызьы соослы занятиос радъяно — ваньзэ тае кагаз вылэ гожтоно. 50 бамъем ужан программаосты лэсьтон студентъёслэсь палэнтэ. Со сяна, вузысь тодосчи дышетсконние студентъёсты утчаны кулэ на. Казаньысь тодосчиос, ми кадь, гуртысь школаостӥ ветло меда? Кызё аръёс ортчыса, малпасько, шуозы: та воштӥськонъёс куашкатӥзы ӟеч дышетонэз.

Аслам удысам мон ӟеч профессионал меда? Выль произведениос кылдо, мон соосты лыдӟыса уг вуттӥськы бере, дунъяны но уг быгатӥськы ни. Мынам тодон-валанъёсы 70-тӥ-80-тӥ аръёсысь литературае кылемын. Соин берло аръёссэ удмурт литература пумысен вераськыны ик шурдӥсько.

— Озьы ке но ялан выль ужъёс поттӥськоды?

— Грантъёсын ужаськом. Утӥм ни 3 грант, озьы потӥзы удмурт драматургилы, нылпи литературалы сћзем но удмурт литератураын ож темаез усьтӥсь научной статьяосын бичетъёс. Пумозяз вутто ик, дыр, удмурт комедилы сӥзем эскеронъёсме. Вормонъёсы пӧлы пыртӥсько Москваысь тодмо тодосчиен Р. Хайруллинэн ӵош быдэстэм «Литература народов России» учебникмес.

— Нош удмурт литература али кыӵе югдурын? Драматургия но берло дыре уг азинскы, шуо.

— Юаны кулэ: малы? Азьло произведенилы заказ вуэ вал. Драматургимы солэсь ляб-а вал? Лябесь-а В. Садовниковлэн яке  Е. Загребинлэн пьесаоссы? Ӧвӧл! Тросэз ужъёс кужмоесь, заказъя кылдытэмын ке но. Гожъяськисьёс мед кылдозы шуыса, драматургиын нош ик заказ кулэ.

Мон пыриськисько Удмуртиысь Правительстволэсь литературной премизэ сётъянъя комиссие. Конкурсэ вуэм ужъёс пӧлын сюлме пырисез ӧжыт. Бен, вакытмы сыӵе: дыр чаляк ортче. Егитъёс уг пуко ни уен-нуналэн лыдӟиськыса. Ми, кылсярысь, азьвыл аспирантъёс, Москваысь Ленинской библиотекае пыриськом вал 9 часын ӵукна, нош потӥськом, Кремльысь кизилиос ӝуаку.

Со сяна, шӧдӥське кунгож сьӧрысь масскультуралэн улонамы пыӵамез. Ми бадӟым ӟуч писательёс вылын будӥм, писательёсмы лыдӟылӥзы, малпасько, В. Распутинэз, Ч. Айтматовез, соос пыр дуннеез усьтылӥзы. Али «Удмурт дуннелэн» «Ингож» но «Дарт» приложениосысьтыз кунсьӧр авторъёслэн произведениоссылы рецензиосты лыдӟыса, аслым юан сётӥсько: Россиысь писательёслэн, режиссёръёслэн книгаоссы, кинооссы нокинлы тунсыко ӧвӧл ни-а, мар-а?

— Уж бордын — ӵукнаысен уйшорозь. Ку шутэтскыса вуттӥськоды?

— Улон, шур сямен, чаляк кошке, шутэтскон но уж огазе сурасько. Ял карисько, конференцие яке ужъя ик палэнэ потакум, кельше ветлыны театръёсы. Туж яратӥсько пичи городъёсты — Глазовез, Чайковскиез, Воткинскез, Сарапулэз… Кыдёкын ке но, шумпотыса мынӥсько Глазовысь дышетӥсьёсты дасянъя институтысь студентъёс доры лекция лыдӟыны. Яратӥсько лыд-ӟиськыны.

Россиез котыртысал, олокӧня аръёссэ Сибире мыныны турттӥсько ни. Мыным уйпал калыкъёслэн литературазы но туж кельше. Со матын на инкуазьлы, фольклорлы, зэмос улонлы. Шундыпуксён палась литература ас пушказ выемын, улонлэсь вандэмын, ассэ малпам дуннеен котыртэмын. Мон яратӥсько книгаосысь улонлэсь шокамзэ шӧдыны. Яратӥсько сӥзьыл тэлез: кӧня ке лымы усемын, котырын чус, нош тон гань-гань писпуос пӧлтӥ ветлӥськод.

Мария ВЕКШИНА

Удмурт Дунне
By Удмурт Дунне Март 16, 2017 16:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<