Куастэс эн ватэ на!

Удмурт Дунне
By Удмурт Дунне 17 марта, 2017 10:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

18-тӥ южтолэзе (мартэ) Кияса ёросысь Уддяди  (Карамас-Пельга) гуртын ортчозы «Удмурт дунне» газетлэн  кубокез понна куасэн бызьылонъя ӵошатсконъёс. Туэ кубокмы 55-тӥзэ шудытӥськоз. Ужрад пумысен кенешиськом  газетлэн валтӥсь редактореныз Зинаида Рябининаен.

— Зинаида Кирилловна, егит лыдӟисьёс ваньмыз, оло, уг тодо, мар ӵошатсконъёс со, малы газет выре спорт ужрад ортчытонэн.

— Бен, угось историез кыстӥське ни 1952-тӥ арысен. Со вакыт  кунмы туж зол сюлмаськиз калыке таза улонэз вӧлмытон, спортэз азинтон сярысь. Совето идеология  пыӵаны кулэ вал котыр ласянь. Нош кин сое тужгес ӟеч вӧлмытылӥз, ӝуткалляз?  Шонер — ивор вӧлмытӥсьёс. Кивалтӥсьёс туж  ӟеч амал шедьтӥзы — котькуд элькун газетлы кыӵе ке ӵошатсконэз осконо. Озьы, кылсярысь, «Удмуртская правда» кыл кутӥз  велогонкаос понна, «Советской Удмуртия» куасэн бызьылонъя ӵошатсконъёс ортчытъяны кутскиз.  Малпазы, вылды, куасэн бызьылӥсьёс тросгес гуртъёсын уло, удмурт газетэз но гуртоос лыдӟо бере, та ӵошатсконъёсты ортчытъяны «Советской Удмуртилы» ӵап киыз-пыдыз.  Вылаз ик, со вакытысь газетлэн редакторез Пётр Яшин, Быдӟым ожысь сӧсырмем пыдын бертӥз ке но,  куасэз туж яратылӥз.

«Советской Удмуртия» газетлэн призэз понна куасэн бызьылонъя нырысетӥ ӵошатсконъёс усьтӥськизы. 1952-тӥ ар. Бур паласен нырысетӥез — валтӥсь редактор П. Яшин.

— Но али  арнялы быдэ сямен олокыӵе но ӵошатсконъёс ортчыло…

— Тодӥськом. Но спортсмен понна  одӥг старт но мултэс ӧвӧл. Собере, та ӵошатскон  луиз милям одӥгез ӟеч йылолмы, сое быдтыны нокызьы но уг яра. «Советской Удмуртия» — «Удмурт дунне» газетлэн призэз понна ӵошатсконъёсын кыдазы спортысь кизилиос Галина Кулакова,  Тамара Тихонова, Владимир Никитин, Нина Парамонова, Юлия Степанова-Шамшурина, Николай Хохряков, гуртъёсысь данак нылъёс но пиос СССР-ысь спортъя мастерозь будӥзы, спортъя  разрядлэсь куронъёссэ быдэстӥзы.

Ӵошатсконъёсы шедён понна гуртъёсысь куасэн бызьылӥсьёс нырысь ик кужымзэс мерталлязы асьсэ колхозъёсын но ёросъёсын. Нырысетӥ стартъёсы поталлязы 10 сюрслэсь уно егит пиос но нылъёс, пӧлысьтызы тросэз — «Колхозник» спорт огазеяськонэ пыремъёс. Нырысетӥ ӵошатсконъёсын 200 пала усто гурт спортсменъёс ёроссылэсь данзэ утьылӥзы газетлэн призэз понна ӵошатсконъёсын.  Отчы пыриськылӥзы Удмуртиысь 25 ёросысь сборной командаос. Куасэн бызьылонъёс 3 нунал ӵоже мыно вылэм. Пиосмуртъёс 30 иськеме бызьылӥллям, нылкышноос — 10 иськеме. Со сяна, ӵошатсконъёсы пыртэмын вылэм трамплинысь тэтчан но!

Туж тунсыко,  ӵошатскемзы бере командаос концерт но возьматъяллям, со, пе, 12 час ӵоже кыстӥське  вылэм.

Табере 1992-тӥ арысен шаерамы  арлы быдэ ортчыло Гурт шудонъёс, отчы люкаськыло быдэс шаерысьтымы  тужгес кужмо спортсменъёс. Та вожвылъяськонъёсты бурд улаз басьтӥз элькунысьтымы спортъя министерство.  Озьы  газетлэн кубокез понна ӵошатскон вужерегес кылиз, огвакытэ вис но луылӥз, но туж шумпотымон, солы бырыны ӧз сётэ асьсэос спортсменъёс. Редакциез «зуркатъязы» спортысь ветеранъёс. Ёросъёсысь мыло-кыдоос ӵошатсконъёсты ортчытонэз ас вылазы басьтыны ӵектӥзы, озьы берло аръёсы ас доразы ӵошатсконъёсты ортчытъязы  якшур-бӧдьяос, вавожъёс. Кӧня ке ар талэсь азьло паймытӥз Дэриысь арлыдо спортсмен Георгий Булычев — со  ачиз спонсор утчам,  коньдон шедьтэм, радъялэ гинэ, пе. Туэ сыӵе сюлмаськонэз ас вылаз басьтӥз Кияса ёрос администрация. Ваньмызлы туж бадӟым тау кариськом.  Зэм, али ӵошатсконъёсты 2 арскын одӥг пол ортчытъяськом, но луонлык  шедьысал ке, пумит ӧвӧл арлы быдэ люкалляны. Оскиськом, кыӵе ке ёрос эшшо мылкыд кароз дораз пумитаны. Нялтас вераса, пӧртэм интыосын ӵошатсконъёс ортчытъяны туж тунсыко вылэм. Милемлы но спортсменъёслы гинэ ӧвӧл — отын улӥсь калыклы но, угось гуртоос понна  со тунсыко  ужрад — ваньмыз  стадионэ пото, асьсэ спортсменъёссы понна дэмен висё.

— Вераськоды,  азьвыл, стадионын сяна, клубын но ӵаш вазьылэм шуыса. Туэ маке тунсыкоез луоз-а?

— Одно ик.  Берло аръёсы та ужрадын  валтӥсь интые потылӥз  спорт люкетэз гинэ, но ӵошатсконъёс удмурт газетэн герӟаськемын бере, туэ милям потэ вылэм талы  тросгес саклык висъяммы. Вылаз ик, туэ ӵошатсконъёс ортчо шаерысьтымы одӥгаз тужгес удмурт гуртын — Уддядиын. Спортсменъёс мед тодматскозы удмуртлыкен, газетэн, газет лэсьтӥсьёсын.  Озьы  школаын ӵукнаысен  ужалоз газет поттонъя мастер-класс,  отчы пыриськыны быгатоз котькуд мылкыд карись — ӵошатсконъёс йылпумъяськытозь, калык ас киыныз  нимысьтыз выпуск поттоз! Со сяна, пиналъёс удмурт калык шудонъёсын шудозы,  лумбыт ужалоз «Удмурт корка», со перепечен-табанен пумиталоз, клубын шулдыртозы «Ерпечкаос» но ёросысь мукет артистъёс, мылкыд карисьёс  удмурт кино учкыны быгатозы.  Стадионын но мӧзмыт уз луы — чузъяськоз удмурт крезьгур,  пӧзёз самовар. Соин ик куастэс эн ватэ на — толэз дэмен келялом! 0+

Ӵошатскон радлык:

11 часын — ужрадэз сӥё-дано усьтон.

11.20 часын — нылъёсын семьяос стартэ пото.

11.45 часын — пиосын семьяос стартэ пото.

12.15 часын — 40-49 аресъем нылкышноос 2 иськеме пото.

12.35 часын — 50 ареслэсь бадӟымгес нылкышноос 2 иськеме пото.

12.50 часын — 60 ареслэсь бадӟымгес воргоронъёс 3 иськеме пото.

13.10 часын — 18-39 аресъем нылкышноос 3 иськеме пото.

13.30 часын — 50-59 аресъем воргоронъёс 3 иськеме пото.

13.50 часын — 40-49 аресъем воргоронъёс 3 иськеме пото.

14.10 часын — 30-39 аресъем воргоронъёс 5 иськеме пото.

14.30 часын — 18-29 аресъем воргоронъёс 5 иськеме пото.

15 часын — суро эстафета.

Сергей Захаров

Удмурт Дунне
By Удмурт Дунне 17 марта, 2017 10:49