Киуж бурмытэ

Удмурт Дунне
By Удмурт Дунне Март 4, 2017 14:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь Н. Вахрушева тэк пуконэз уг тоды.

Можга ёросысь Удмурт Улынвай гуртын вордскем Надежда Вахрушева егит дырысеныз ини киужен тунсыкъяське, туж трос кылбуръёсты наизусть вераны тодэ, уно лыдӟиське.

Школаын дышетсконзэ йылпумъяса, Надя Глазовысь пединститутэ вамыштӥз. Баллъёсыз тырмымтэен, дораз бертоно луиз. Нылызлэн тазьы дораз кылемезлы  анаезлэн кӧтыз ӧз веська, шуиз: тятяед тӥни вань улытозяз колхоз контораын лыдъясь-чотась луыса пукиз, оло, бухгалтере дышетскод?

Вуоно араз ик Надя, анаезлэсь верам кылъёссэ пеляз поныса, Сигаевоысь совхоз-техникуме дышетскыны пыриз. Егит специалистэз ужаны келязы Якшур-Бӧдья ёросысь Порва гуртэ. Собере «Путь Ильича» колхозэ валтӥсь бухгалтере пуктӥзы. Со вакытэ ик Надежда артысь Кунянгуртысь яратонзэ пумитаз, Лена но Оля нылъёссэ вордӥз. Собере Вахрушевъёс улыны выжизы Якшур-Бӧдья черкогуртэ. Но Надежда Анатольевналы кузпалын кема улыны кылдымтэ, егитысен  пал кылиз.

— Коньдонтэк ёрмыса улон вакытъёсмы но вал гинэ, милемыз тэль сюдӥз-вордӥз, — улон-вылонзэ тодаз вае нылкышно. — Али ке но узы-боры бичан сяммы ӧз быры. Нылпиосы пичиесь ке но вал, улонэ секыт шуыса, ӝожтӥськыса ӧй улы. Со дыре ик дышетскыны пыри Ижысь гурт удысъя институтэ. Отӥяз монэ ёросамы ик гурт удысъя управление ужаны басьтӥзы, бӧрысь коньдон ужпумъёсъя управлениын тырши. Сояз но, таяз но валтӥсь бухгалтер вал.

Нылъёсы пичиесь дыръя туж зол висьыны усьылӥ, мырдэм но кызьы улэп кыли. Вот соку улон сярысь зол-зол малпаськи,  со шоры мукет синмын учкыны ӧдъяй, тазалыке борды рос-прос басьтӥськи.

Музъем вылтӥ гольык пыд бызьылӥсько, кезьыт вуэн пыласькисько. Арлы быдэ музон кунъёсы вуылыны тыршисько, юри со понна пенсиме люкасько. Йырсазьы медаз лябӟы шуыса, кылбуръёсты наизусть дышетӥсько. Ма, мон соосты азьло но яратӥсько вал, одӥг нунал но книга лыдӟытэк улэме ӧвӧл. Яратӥсько Евгений Евтушенколэсь, Лариса Рубальскаялэсь (Надежда Анатольевна дӥсяськыны но тодмо кылбурчи кадь ик йӧндыртэ, йырсизэ но со сямен ик вакчи ӵышкыса нуллэ — авт.), Андрей Дементьевлэсь, Юлия Друниналэсь кылбуръёссэс. Асьме кылбурчиос пӧлысь кельше Олег Поскрёбышев. Удмурт гожъясьёслэсь но чуръёссэс мыло-кыдо лыдӟисько. Кырӟанъёс сярысь веранэз ӧвӧл ни.

Надежда Анатольевна кылем арын ачиз сад-бакчаяз улыно-вылыно корка пуктӥз. Талэсь азьвыл мунчо, пе, ӝутӥ.

— Али Ижын улӥсько ини ке но, одӥг но тэк пукеме уг поты, киосылэн ялан мар ке но ужам-лэсьтэмзы потэ, — чильпам салфеткаоссэ но керттэм дӥськутъёссэ возьматыса, вера Надежда Анатольевна. — Нуналлы быдэ мар ке но выльзэ малпасько но лэсьтӥсько. Калыкын юнме уг верало вылэм, киуж, пе, адямиез бурмытэ.

Любовь Тихонова

Удмурт Дунне
By Удмурт Дунне Март 4, 2017 14:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<