Кез ёросысь Кабалуд: Музъем ужен уг выро, коньдон потто палэнын

Удмурт Дунне
By Удмурт Дунне Март 30, 2017 17:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Муниципал кылдытэтлэн йырыз Н. Булдакова.

Кез ёросысь Кабалуд муниципал кылдытэтэ Кабалуд черкогурт гинэ пыре. Татын улэ 595 мурт. Вань нюлэс дасянъя «Лесинвест» огазеяськонзы. Черкогуртын 4 магазинзы ужа. 

Ӝикыт поселение

Муниципал кылдытэтэн кивалтӥсь Наталья Булдакова куд-ог лыдпусъёсты шараяз: черкогуртын улӥсьёс пӧлысь 118-эз 18 аресозь пиналъёс луо, пенсионеръёс 156 кузя, 36 мурт ужтэк пуке. Со вакытэ ик уже интыянъя центре учётэ султэмын 3-ез гинэ. 173 мурт Пермь улосэ ужаны ветлэ. Татын ноку но ӧй вал колхоззы. Калык ужаз леспромхозын. Али нюлэс поттонын ог 30 адями тырше.

— Одӥг ласянь, муниципал кылдытэтмы ӝикыт интыяськемын шуыса, шумпотоно кадь, — шуэ Наталья Арнольдовна. — Но гурт хозяйствомы ӧвӧл бере, палэнысь юрттэт уг вуы, улыны выриськомы Сюрес фондлы луыса. Отысь висъям коньдонэн толалтэ сюресъёсты сузяськомы, гурт калыкен валче 400 мешок жуг-жаг утялтэмын, 2 ульчаысь юбоосы лампаос тыремын.

Наталья Булдакова 4-тӥ созывзэ ужа. Берло ортчем быръёнъёс бере юрттӥсьёсыз трослы егитомизы. Депутатъёс пӧлы шедизы 3 дышетӥсьёс, чугун сюрес вылын ужась, клубын 2 ужась. Быдэстоно ужъёссэс ар кутсконын ик эскеризы.

Библиотекаен кивалтӥсь Л. Невоструева.

Корка воштонъёс

Кылем гужем поселениын оптимизация ортчиз. Нылпи садэз выжтӥзы школалэн бурд улаз, нош нылпи садлэн юртаз потӥзы гурт администрация, культурая юрт, библиотека, райполэн магазинэз. Юртэ ваньмыз ӝикыт интыяськизы кадь, но липетсэ тупатъяно на. Гуртоос Выль арез та юртын пумитазы ни. Клубен кивалтӥсь Ирина Сальникова но худрук Надежда Иванова выль интызылы дурыныз шумпотэмын. Угось азьвылаз артистъёсты но, гурт калыкез но люканы возьыт вылэм.

Гурт библиотекаын 30 арлэсь ятыр тырше ни Лидия Невоструева. Та дыре гуртысь 339 мурт лыдӟиське. Кылем ар ӵоже соос библиотекае 3 сюрслэсь трос пол пыразы, 6 сюрс 500 книга лыдӟизы. Библиотекае вуыло покчиос но, арлыдоос но. Соос понна пӧртэм  кружокъёс радъямын. Пиналъёс бисерен выро, арлыдоос  керттӥсько, чильпасько.

Арлыдоослэн ансамбльзы.

Кабалудысь школаын умой ужало анай-атайёсын. Арлы быдэ ноябрь толэзе школалэсь нуналзэ ортчыто. Нылпиос, мумы-бубыос, песянай-песятайёс визьзэс сынало, мугор кыдатонъя ӵошатсконъёсы пырисько. 3-тӥ арзэ школаын ортче Кабалуд муниципал кылдытэтлэн призэз понна шашкиен шудонъя ӵошатскон. Берлоез сыӵе ужрад вал декабрь толэзе, отчы 30 адями пыриськиз. Воргоронъёс пӧлын вормись луиз Дмитрий Якин, нош пиос пӧлын ваньзэс азьпалтӥз Д. Якинлэн 6 аресъем Даниил пиез. Татысь шашкиен шудӥсьёс ёросысь кужмоосыз луо. Школаысь спортзал но бушаса уг вуттылы. Пиналъёс сяна, гурт калык но волейболэн шудыны ветлэ. Со сяна, нылпиос мыло-кыдо пырисько тхэквандоя кружоке.

Йыр висён

Кабалудын арлэсь ятыр ни ӧвӧл фельдшерзы. Талэсь азьвылэз пенсие потӥз, нош вылез дӥнязы лыктыны уг дырты. Бен, ёросысь врачъёс дӥнязы вуыло ик. Нош со висисьёслэсь сюлмаськонзэс вормыны уг юртты: ФАП ужамтэен, уколъёс пуктылыны нокинлы. ФАП-лы инты висъямын гурт администрацилэн юртаз. Отын  куд-ог лэсьтӥськон-тупатъян ужъёс ортчытоно. Мед гинэ шедьысал фельдшер, гуртоос дэмен юрттӥськыны дась.

Гуртоос мугорзэс кыдато дэмен.

Гуртын мыло-кыдо ужа арлыдоослэн кенешсы. Соин кивалтэ Нина Кондратьева. Трос аръёс ӵоже Нина Борисовна Пермь городын улӥз. Пенсие потыса, вордскем палъёсаз бертӥз, кузпалзэ но сьӧраз вайиз. Арлыдоос тэк пуконэз уг тодо, ёросын ортчылӥсь тол но гужем ӵошатсконъёсы, концертъёсы пырисько. Котыр ласянь  адӟем карымонэсь луо. Кылсярысь, Екатерина Зорина 400 метре бызьылонын котькинлэсь шаплы. Солэсь бере уг кылё Роза Дорофеева, Агния Серебренникова, Валентина Ворончихина, Нина Шудегова, Анатолий Наумов, Анатолий Степанов, Раиса Белослудцева.

Муниципал кылдытэтын гурт хозяйствозы ӧвӧл бере, кабалудъёс оскисько асьсэлы гинэ: кулэ дыръяз огазеясько но вань ужзэс огкылысь быдэсто.

Татьяна Трефилова

Удмурт Дунне
By Удмурт Дунне Март 30, 2017 17:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<