Калык дунъя тыршисьсэ

Удмурт Дунне
By Удмурт Дунне 9 марта, 2017 15:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2-тӥ мартэ Ижысь одӥгаз ресторанын «Адӟем карымон» конкурслы йылпумъянъёс лэсьтэмын. 5 номинациын адӟем карымон удмурт воргоронъёсты но нылкышноосты бырйиз калык. Ужрадэз ортчытӥзы «Мынам  Удмуртие» телерадиокомпания но «Удмурт дунне» газет. Ма малпало вормисьёс бадӟым данъет басьтэмзы пумысен?

Политика удыс

Кун Кенешлэн Тӧроез Владимир Невоструев:

— Бадӟым тау шуисько «Мынам Удмуртие» телерадиокомпанилы но «Удмурт дунне» газетлы таӵе бадӟым ужрад пӧрмытэмзы, удмурт калыкез, кылэз данъяны быгатэмзы понна. Элькунамы трос быгатӥсь адямиос, туннэ та ужрадын соосын тодматскыны луонлык кылдӥз. Соос зэмзэ но адӟем карымон луо, удмурт калыкмы, элькунмы понна вань сюлмысьтызы тыршо. Бадӟым тау удмурт калыклы, кин монэ кылзэ, адӟе, лыдӟе. Азьланяз но тыршо калыкмес данъяны, солы юрттыны, Удмурт Элькунмес азинтыны.

 

 

 

 «Удмурт Кенеш» огазеяськонлэн Глазов ёросысь ёзэныз кивалтӥсь Инесса Рябова:

— Макем шумпотӥ но пайми, монэ политика удысын адӟем карымон адями каризы шуыса. Бадӟым тау Балезино ёросысь мыло-кыдо нылкышнолы Анна Наговицыналы. Со Балезино но Глазов ёросъёсысь  калыкез мон понна дурбасьтыны ӝуткам. Малпасько, калыкен ужаме понна озьы дунъязы, мон Глазов ёросысь «Удмурт Кенешен» 13 арлэсь кема кивалтӥсько ни. Адямиос понна лулысь-сюлмысь тыршид ке, тонэ дунъялозы но гажалозы. Данъямысьтызы ас поннам гинэ уг, вань удмуртъёс понна шумпотӥсько, со мед юрттысал удмуртлыкез ӝутонэн герӟаськем трос ужъёсты-проектъёсты берыктыны. Каль ёросысь «Удмурт Кенешен» сюлмаськиськом Глазовын удмурт гимназия усьтон сярысь.

Гурт удыс

Можга ёросысь «Заря» хозяйстволэн кивалтӥсез, Кун Кенешысь депутат Валентин Владимиров:

— Гурт удысын тыршон — со туж секыт но огвакытэ туж кулэ луись уж. Гурт адями вылын возиське улонмы, угось со вань калыкез сюдэ.  Данъямысьтызы эшшо но кужмогес ужам потэ. Удмуртилэн Тӧроез пуктӥз курон — йӧл кысконэз 1 миллион  тоннаозь ӝутоно, та ужпумез быдэстон понна, вань кужыммес сётыса, тыршом.

 

Эгра ёрос администрациысь гурт удысъя управленилэн кивалтӥсез Ольга Соловьёва:

— Уг но тодӥськы вал, конкурсэ мон ӵектэмын шуыса. Бадӟым тау шуисько гурт калыкелы. Эгра ёросысь Левой Кушъя но Правой Кушъя гуртъёсысь, ачим сопалъёсын вордӥськемын, калык мон понна куаразэ сётэм. Гуртоосты конкурсэ пыриськыны ӝуткам туж мыло-кыдо кышномурт Капитолина Чиркова. Малпаськыны кутскисько ке, малы монэ сыӵе данъязы, номыр сыӵезэ-таӵезэ ӧй лэсьты кадь. Кылем ар гурт удыс понна секыт вал, ваньзэ пуктэм ужпумъёсмес ӧм пӧрмытэ. Но адямиос ужме дунъяло бере, выль кужымен эгра калык понна тыршыны мылкыды ӝутскемын.

Наука но дышетон удыс

Кылосбур наукаосъя доктор Василий Ванюшев:

— Монэ но наука понна тыршемме калык сокем дунъя шуыса, уг ик малпаськы вал. Соин таӵе дунъетлы туж но  туж шумпотӥ. Вормеме понна бадӟым тау карисько ивор вӧлмытон удысын тыршисьёслы — газет-журналъёслы, радио-телевиденилы. Соос мынэсьтым ужъёсме калык дорозь вуттыны юртто. Соослэн тыршемзылы луыса монэ кыло, ужъёсме лыдӟо. Шуыны луоз, ми соосын валче одӥг уж бордын тыршиськом — удмуртлыкез азинтӥськом.  Калыкмылэсь вылӥ дунъетсэ басьтыса, мылкыды эшшо но бурдъяськиз наука удысын тросгес пайдаё ужъёс лэсьтыны.

Кылосбур наукаосъя кандидат Вера Пантелеева:

— «Мынам Удмуртие» телеканалэн, «Удмурт дунне» газетэн ялэм конкурсъёсты туж умоен лыдъясько, соос асьме удмурт калыкез сайкато, бугырто, культурамес но асшӧдонмес ӝуто. Кылем арын «Адӟем карымон» вожвылъяськонын номинант вал, туэ вормисе потӥ, но та дунъет мон понна шӧдтэк шорысь басьтэм кадь луиз. Мон асме наука удысысь адями шуисько, та ӧрын аслэсьтым кужымме шӧдӥсько. Мон понна дурбасьтэм адямиос ужме — удмурт кылэз дышетонъя книгаосме, журналистика но критика удысын тыршемме — дунъяло, вылды. Туж бадӟым тау шуисько Дышетон удысысь йӧскалык ужпумъёсты тодон-эскеронъя институтысь ӵош ужась эшъёсылы, Удмурт кун университетын дышетскись но сое йылпумъям студентъёсылы.

Ужбергатон удыс

Пичи Пурга ёросысь ужбергатӥсь Павел Чушъялов:

— Таӵе бадӟым ужрадын вормисьёс пӧлы сюро шуыса ӧй малпалля. Соин туж шумпотӥ, калыкмы монэ но, ужме но дунъя шуыса. «Адӟем карымон» шуэмысь  валасько, иське, мон шонер сюрестӥ мынӥсько, калыке понна мар ке но пайдаёзэ но ӟечсэ лэсьтӥсько. Таӵе дунъет басьтэме бере эшшо но кужмогес, тыршысагес ужаме потэ.

 

Можга ёросысь фермер Галина Белозёрова:

— Данъетъёс басьтон понна уг ужаськы, гуртын улӥсьлэн ужан интыез, улон котырез ӟеч мед луоз шуыса, сюлмаськисько. Али хозяйствоям 11 адями тырше. Но азьланяз удысме паськытатыны чакласько. Али ёросысьтымы Ныша гуртын 200 йыр сюро таза пудолы ферма ӝутӥсько. Йырын малпанъёс трос бергало, туж потэ нимысьтыз лавка пуктэме, нянь пыжон цех усьтэме.

Мон ёросысь черкъёслы, ветеранъёслы коньдонэн юрттӥськисько. Озьы ик пыриськисько «Россиысь гуртын улӥсь нылкышноослэн дуннезы» огазеяськонлэн ужаз. Тыршиськомы гуртын улӥсь кышноослэсь правооссэс утьыны, данзэс ӝутыны.  Быгатэмея гуртоосы понна сюлмаськисько, сое ик, вылды, дунъяса, мон понна куаразэс сётӥзы.

Культура но искусство удыс

Удмурт кун филармонилэн кивалтӥсез Алексей Фомин:

— Ӧй но тодылы, мон понна кыӵе ке но конкурсын куара сётон мынэ шуыса. Удмурт калыкмы дунъя, ужмес адӟе шуыса, туж шумпотӥсько. Вераны кулэ, та вормон мынам гинэ ӧвӧл, филармониын вань ужасьёслэн. Мон 2015-тӥ арын Ижын «Городлэн адямиез» ним утӥ вал, тазьы ик адямиос куразэс сётъязы, но «Адӟем карымон» конкурсын басьтэм данъет мон понна дуногес. Угось ачим удмурт бере, асьме калыкмы понна ик тросгес ӟечсэ лэсьтэме потэ.

Удмурт театрысь артистка Наталия Буранова:

— «Мынам Удмуртие» телеканалысь «Адӟем карымон» конкурсын ворми шуыса иворлы пайми но, шумпотӥ но. Таӵе бадӟым дунъет мон понна — бадӟым кыл кутон. Туж бадӟым тау шуисько ваньмызлы, кин мон понна куаразэ сётӥз. Азьланяз но тыршо удмурт культураез азинтыны, удмурт калыке солэсь чеберзэ вӧлмытыны.

Ангелина Снигирёва

Удмурт Дунне
By Удмурт Дунне 9 марта, 2017 15:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<