Игнатий Гавриловлы — 105 арес

Удмурт Дунне
By Удмурт Дунне 30 марта, 2017 13:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 

Игнатий Гаврилов.

Игнатий Гаврилов — Удмурт театрлэн огез кылдытӥсез но нырысетӥ кивалтӥсез. Огъя вераса, со гожтӥз 40-лэсь уно пьесаос. Писательлэн вордӥськем дырысеныз 30-тӥ мартэ тырме 105 ар.

Игнатий Гавриловлы литератураез яратон пыӵатӥз Вера Толстая Можга ёросысь Сибы школаын. Ӟуч дышетӥсь тодматъяз нылпиосты вашкала удмурт кырӟанъёсын, выжыкылъёсын, мадёсъёсын. 1924-тӥ арын вуоно драматург пыре дышетскыны  Можга педтехникуме, мыло-кыдо ветлэ литературной кружоке.

Иже вуыса, 1928-тӥ арын,  И. Гаврилов кыстӥське Удмурт клуб борды, ветлэ солэн театральной курсъёсаз. Нош 2 ар ортчыса, егит пиез артистъёсын кивалтыны куро ни… Та аре ик сое гожтыны косо Удмурт автономилэн кылдэмез дырысен 10 арлы сӥзем пьеса. Вакчи дыр куспын пӧрме «Вало ӧр куашетэ» драма — 1931-тӥ арын 7-тӥ тулыспалэ сое нырысьсэ возьмато. Та бордысен кутске Удмурт театрлэн сюресэз. И. Гаврилов луэ кивалтӥсь но, режиссёр но, актёр но, пьесаос гожъясь но.

Али вераны луэ: Игнатий Гаврилов кылдытӥз удмурт драматургилэсь сям-йылолъёссэ, солэн пьесаосыз вылын будӥзы трос актёръёс, режиссёръёс. Драматурглэн произведениосаз образъёс но сямъёс басьтэмын улонысь, котькуд геройзэ, уродзэ-а, умозэ-а, солы гинэ тупась сямъёсъя тодманы луэ, пьесаосыз возьмато вакытэз, паймиськод солэн узыр кылызлы. Котькуд пьеса мур пуштросэныз тодэ кыле.  Удмурт интеллигенция сярысь «Чагыр синъёс», революциез возьматӥсь «Геройёс», удмурт калыклэн нюръяськемез сярысь «Кезьыт ошмес», Граждан ож вакытэ кышномуртлэсь чидамзэ усьтӥсь «Груня Тарасова», историез бугыртӥсь «Азин» пьесаос…

50-тӥ аръёсы Игнатий Гаврилов басьтӥське проза борды. Гожтэ гурт калыклэн ужамез сярысь «Кыдёкын бригадаын», удмурт интеллигенцилэн кылдэмез сярысь «Вордӥськем палъёсын» романъёс.

Мыным удалтӥз адӟыны И. Гавриловез. Мугорызъя со туж ӝужыт ӧй вал, со понна — чупрес но котьку мынясь. Театрын со ялан уж пӧлы выемын вал ке но, мылкыдыз ӧз пуксьылы выль произведениос гожъяны, со понна изёнэз, шутэтскон вакытъёсты вунэтылӥз. Игнатий Гавриловлэсь произведениоссэ нырысь ик лыдӟылӥз, дунъялляз Клавдия Кузьминична Гаврилова кышноез, юрттӥськисез, буйгатӥсез — Удмуртиысь калык артистка. Клавдия Кузьминичналэн улэм-вылэмез юрттӥз писательлы «Вордӥськем палъёсын» романысь Катялэсь но Варваралэсь образъёссэс кылдытыны.

Анна Евсеева

«УД» редакцилэн архивысьтыз

Удмурт Дунне
By Удмурт Дунне 30 марта, 2017 13:27