Дуннеысь цирк — Ижын

Удмурт Дунне
By Удмурт Дунне 10 марта, 2017 12:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Юн сямо дрессировщик В. Смолянец.

Ижын йылпумъяськиз 10-тӥез цирк искусствоя калыккуспо фестиваль. Шаерамы  вуылӥзы кылем аръёсы вормылэм артистъёс.

Семьяез огазеян

10 ар куспын дуннелэн пӧртэм сэрегъёсаз кошкизы 26 зарни, 31 азвесь но 34  туй гондыръёс — фестивальлэн пусъёсыз. Кошкизы выльысен берытскон понна. Уго туэ фестиваль вожвылъяськон сямен радъямын ӧй вал.

— Туэ ми конкурс ӧм лэсьтэ. Та малпанэз асэстӥм Монте-Карлоын ортчылӥсь калыккуспо фестивальлэсь, — вера Россиысь кун циркъёслэн компаниенызы кивалтӥсь Дмитрий Иванов. — Вань ӧтем артистъёс пыро дуннеысь тужгес устоосыз пӧлы. Соос фестивальлэсь данзэ трослы вылӥе ӝуто. Артистъёсты ӧтьыны юрттӥзы Россиысь, Удмуртиысь лулчеберетъя министерствоос, «Росгосцирк» компания.

Артистъёс сяна, фестивале мукет тодмо адямиос но лыктӥзы. Кылсярысь, Казаньысь, Пермьысь, Екатеринбургысь циркъёслэн кивалтӥсьёссы, озьы ик Россиысь но кунгож сьќрысь дунне циркез лэсьтӥсьёс.

— Мон шумпотӥсько татысь адӟыны тодмо адямиосты, тросэз соос фестивале 10-тӥзэ вуо ни, — вераз Удмуртилэн Тӧроез Александр Соловьев. — Удмуртия та фестивальтэк улыны уз быгаты ни, со шаермылэн тодметэз луэмын. Фестивале билетъёс но туж ӝог быро — толэзь талэсь азьло соос кассаосын ӧй вал ни.

Клоун С. Просвирнин котьмаин шудыны быгатэ.

Тросэз куноос та фестивале арлы быдэ вуыло. Соос пусъё, 10 ар ӵоже макем зол кужмояз фестиваль, соин валче Ижысь цирк дуннелы тодмо луиз.

— Та ужрад дуннеысь мукет фестивальёсын оградын сылэ, — вера Франциысь Монте-Карлоын ортчылӥсь  калыккуспо цирк фестивальлэн вице-президентэз Урс Пилс. — Со ялан мед ортчылоз. Уго цирк — со сыӵе инты, кытчы луэ семьяен мыныны. Адӟисько, Ижын циркез гажась калык улэ, циркты бордын ужась школае но быгатӥсь пиналъёс ветло. Монте-Карлоын толэзь талэсь азьло ортчиз нылпиос пӧлын цирк фестиваль. Туэ отчы вуылӥзы Ижысь  6-7 аресъем 3 нылъёс-акробатъёс.

Шаерамы циркез ярато, отчы ветло. Кызьы оскытӥзы кивалтӥсьёс, фестиваль уз быры, арысь аре радъяськылоз.

Лулсэръёсты кыскан

Ижын цирклэн нырысетӥ юртэз ӝутскиз 1895-тӥ арын, сое пуктӥз ужбергатӥсь А. Коромыслов. Фестивалез нуись В. Кожевник ӵапак солы пӧрмытскемын вал — тодманы луиз очкиезъя но мыйыкезъя. Со ик манеж вылын пумиталляз паймымон артистъёсты — Швейцариысь пӧртэм куараосын вераськыны быгатӥсь Виллер Николодиез, Россиысь клоунъёсты — Просвирнин вын-агайёсты, Кореяысь, Монголиысь, Китайысь акробатъёсты но мукетъёссэ.

Китайёс возьмато «Лебединое озеро» балетъя аспӧртэм номерзэс.

Фестивалез усьтӥзы Китайысь  акробатъёс, соос асьсэ сямен возьматӥзы Пётр Чайковскийлэсь «Лебединое озеро» балетсэ. Паймоно кадь, кызьы луэ, киосын ог-огед вылэ йырин-чукин султыса, пирамида кылдытыны. Нош Монголиысь акробатъёс омырез «кыткизы» кадь. Син азяды пуктэ: кык воргоронъёс ог-огзы вылын сыло, нош соос вылэ эшшо тэтче на нылаш. Собере нылмурт лобӟыса султэ мукет «адямиослэсь пагӟа» вылэ. Та выллем номеръёс учкисьёслэсь лулсэръёссэс сиосты кадь кыскизы. Калыкез серекъятћз Просвирнин вын-агайёс, соос котьмаин крезьгур кылдытыны быгато: крезьгуро инструментъёсын сяна, тэркыен, клаксонэн но… пыд куара шуккиськемен. Серекъян бере манеже потӥзы мумы арысланъёс но тигръёс. Соослэн кузёзы — Виталий Смолянец.  Та дрессировщик — паймымон адями. Валля арын, секыт учыре шедьыса, пыдъёстэк кылиз, циркысь ӧз кошкы. Фестиваль дыръя артист нуналлы быдэ 2 пол манеж вылэ потаз.

 

Вераны кулэ, арня ӵоже залын одӥг буш инты но ӧй вал. Озьыен, шаерамы циркез ярато, отчы ветло. Кызьы оскытӥзы кивалтӥсьёс, фестиваль уз быры, арысь аре радъяськылоз. Сое азинтӥсьёс но вань — Ижысь цирк бордын дышетско 90 пиналъёс.

Мария Векшина

Туспуктӥз Диана Кадрова

Удмурт Дунне
By Удмурт Дунне 10 марта, 2017 12:45