«Долг» огазеяськон Быдӟым ож ортчем бервылтӥ утчаське

Музъемысь поттэм арбериосыз туж чакласа асьсэ музеязы утё.

Элькунысьтымы егитъёслэн «Долг» огазеяськонзы 25 аръёс ӵоже ни Быдӟым ож ортчем бервылтӥ утчаське.

«Долге» пыриськисьёс Фаиль Ибрагимов кивалтэм улсын потало экспедициосы. Соос вуылӥзы ни Мурманск, Ленинград, Новгород, Псков, Тверь, Смоленск, Краснодар улосъёсы, Карелие но Белоруссие. Музъемысь шедьтэм сыномем ож тӥрлыкез, медальонъёсты, солдат дӥськутлэсь кылем-мылемъёссэ, вашкала гожтэтъёсты-документъёсты сьӧразы ваё, эскеро, кузёоссэ тодыны тыршо. Музъемысь поттэм арбериосыз туж чакласа асьсэ музеязы утё. Ужзы быдэс ар ӵоже уг йылпумъяськы, палэнысен уг адӟиськы ке но.

Поисковикъёслы луыса тросэз адямиос тодӥзы ӵыжы-выжыоссылэсь ож сюрессэс, ватэм интызэс. Одӥг берыктэм ним — шумпотон ини, нош сыӵе берыктэм нимъёс сюосын лыдъясько ке — со туж бадӟым, кылъёсын мертантэм уж. Сое быдэстыны бадӟым кужым кулэ, соин Удмуртиысь поисковикъёс кусып возё мукет утчаськись огазеяськонъёсын, архивъёсын.

«Долглэн» будон но азинскон сюресэз, утчанъёсыз но шедьтонъёсыз, экспедицие ветлэмъёсыз сярысь тодыны луэ «Нокин уг вуны, номыр уг вуны: «Долглы» 25 ар» адӟытонын. Отчы поттэмын уно туспуктэмъёс, экспедициосысь дневникъёс, пӧртэм документъёс но ож тӥрлык. Выставка оштолэзьлэн кутсконозяз ужалоз Удмуртилэн туала историезлэн документациезъя центрын.

Елена Рябина

Туспуктэм: vk.com/dolgizhevsk